Read Beembe Luk 20 Bible Online

Luk 20 - Beembe bible

Luk 20

¹Kiluumbu kimosi, Yesu bu kaba yikisaa baatu mu Nzo-Nzaambi, na kuyaabisa Musamu Wamubwete, bangaanga-nzaambi, na batini ba mangisi na bakulu ba babakala bayisa.

²Bo bamufuula, baleele kuri nde ti: «Leele beetu, mu nkya lutumu ye wuri mu kweyirikila mamo? Bunu pe, na wakuha lutumu lumalu?»

³Yesu wabvutula, waleele kuri bo ti: «Kifuuri kimosi me nyiluha. Mpeenee mvutu:

⁴Mbotokulu ya Yowane, yaba ya ku yulu hoti ya baatu?»

⁵Bo balelesene bo na bo ti: «Mbuti tuleeriri ti ya ku yulu", lo nde bee leeriri ti: "Hango buri lwaheriri kusiila kanyi mu nde?"

⁶Mbuti tuleeriri ti "ya baatu", baatu bobanso sa batudzusila mu matari; bukuri bo bamwaabakula ti Yowane mubikiri kari.»

⁷Bo babvutula ti: «Beetu tuyaari ko kari ya kuri.»

⁸Na Yesu waleele kuri bo ti: «Me se nyiluleele ko, mu nkya lutumu me nyiri mu kweyirikila mamama.»

⁹Yesu wabaandika kuleele kuri baatu nkuma yimayi: «Muutu [mosi] wakuna nseke bviinya, na wayukusina na bakamuni ba bviinya, na wayende ku budyeengi mu mantaangu mamala.

¹⁰Ntaangu bu yayelemene, nde waheeke nkutu mosi kuri bakamuni ba bviinya, mpisi baha kikuuku kya bviinya kya nde. Bakamuni ba bviinya bamulata nkuba, na bamubvutula myooko myamukangala.

¹¹Nde wabweese kuheeke nkutu yikimi; ngo bo balata wunde se nkuba, bamusaana na bamubvutula myooko myamukangala.

¹²Nde watsiitsa kubweese kuheeke wabatatu; ngo wunde se bamulata maboko na bamutuba ku mbasi.

¹³Ngaa-bviinya waleele: "Buri me nyisa? Me nyelemini kuheeke mwaana waami wa mutima, kampe sa bamubvumina."

¹⁴Bakamuni ba bviinya, bu bamono mwaana wunde, basa nkalikisi bo na bo, baleele ti: "Wumawu ngo mukondiri saala. Tumudzuseenu, mpisi heki saala diba dya beetu-meene."

¹⁵Bo bamutuba ku mbisa nseke bviinya, na bamudzusa. Heki ngaa-bviinya lo buri kabasa?

¹⁶Nde sa kiisa, na sa kadzusa bakamuni ba bviinya babo, na sa kaha bviinya kuri bakimi.» Bamanaa kuyuka, bo baleele: «Mya bubwo miri mbeele ko.»

¹⁷Yesu wabasungumina kisoosi na wabaleele ti: «Matinu mamama mambangukulu ti kwe: "Tari dyaloosiri batuungi, didyo ngo dyeki dyanguri ha kuumbu?"

¹⁸Mpisi wubwa ha yulu dyo sa kakosoko; na mpisi wuri dimubwirikiri, sa dyamunyifuna.»

¹⁹Batini ba mangisi, na bakuutu ba bangaanga-nzaambi, basaka bwa kumukaangila mu kilookolo kikyo, bukuri bo babakuri ti nkuma yiyo, mu bo nde kateeriri yo, ngo baba na boomo bwa baatu.

²⁰Bo babeke mu kwekete Yesu. Baheeke baatu bafuta kumonokono bunu ti baatu basuunguma, mpisi bamubakila kibila mu ma kadzoonso, mpisi bamuyekele mu myooko mya mutumi, wuri na mpinu na lutumu.

²¹Bo bamufuula, baleele ti: «Muyikisi, beetu tuyaari ti ye wuri mu kwedzoonso, na kweyikisa misamu mya nsungumunu, ye wataambulaa kinzeri kya baatu ko, ngo ye wukweyikisa nzila Nzaambi mu ngwanwa.

²²Buri beetu turi na miswa, mu kufuta mpaku kuri Kayisari hoti pele?»

²³Yesu bu kabakula bumpitu-bumpyoongo bwa bo, waleele kuri bo ti:

²⁴«Nsoongeenu kidenali kimosi. Kidzisi ki na bisoni bi bya na?» Bo babvutula ti: «Bya Kayisari.»

²⁵Yesu waleele kuri bo ti: «Hango-nkuumbu, bvutuleenu bya Kayisari kuri Kayisari, na bya Nzaambi kuri Nzaambi.»

²⁶Bo basii bweese kubangisina kumubakila kibila mu nzoonsulu ko, ha busu bwa baatu. Bo bakimuka mu mvutu yi kaheeri na bakaanga minwa.

²⁷Babamosi mu Basaduki, bo bakooleelaa ti mfulukulu ya bafwa yiri ko. Bakokosolo, bafuula Yesu,

²⁸baleele ti: «Muyikisi, Moose watinina beetu ti: "Mbuti mpaangi muutu yifwiiri, ngo kabeeri na mukasi, na kasii buta baala ko; lo mpaangi yaandi kakondolo mukasi, na kubutila wu mwaafwa wunde baala."

²⁹Ngo kwaba bampaangi nsaamu. Watete kweeriri mukasi, na fwiiri kwahele kusiisa mwaana.

³⁰Waboolo,

³¹na wabatatu se bunubwo bakondiri mufwiiri wunde; natee bo nsaamu se bunubwo bahele kusiisa baala, na bafwiiri.

³²Kumanunu mukyeetu se fwiiri.

³³Heki mbasi-tsuku haba mfulukulu, mukyeetu wunde, mukasi na kaba mu bo? Bukuri bo nsaamu bamubakiri bunu mukasi.»

³⁴Yesu waleele kuri bo ti: «Babakala na bakyeetu ba nsi yimayi bakwekwelesene.

³⁵Ngo babakala na bakyeetu mbasi-tsuku bakoto mu nsi yikwiisa, na kufuluka mu bafwa, bo babweese kukwelesene ko.

³⁶Mukwongo, ka babweese kufwa ko, bukuri beki kuba bunu bambasi, na bunu baala ba Nzaambi, bu bari baala ba mfulukulu.

³⁷Moose wasoongo kuri ti mfulukulu ya bafwa yiri, ha kari mu kudzoonsolo mu bvuunda dya miti na bu kari mu kuteele Mfumu ti: "Nzaambi ya Abalaami, Nzaambi ya Isaki na Nzaambi ya Yakobe."

³⁸Nzaambi kari Nzaambi ya bafwa ko, ngo ya bamwooyo, bukuri bobanso bari mwooyo mu nde.»

³⁹Bu kabvutula bubwo, babamosi mu batini ba mangisi baleele ti: «Muyikisi, ye dzoonsiri kwakubwete.»

⁴⁰Bo basii bweese kutsiitsa kumuha kifuuri mu ntoono ti mosi ko.

⁴¹Yesu wabweese kuleele kuri bo ti: «Dyaburi bakooleelaa ti, Kiristo mwaana Davidi?

⁴²Mukwongo, Davidi nde-meene wuleele mu mukaanda Mikuunga ti: "Mfumu waleele kuri Mfumu yaami ti: Dzakala ha lubakala lwa me,

⁴³natee ku nyisuusa me, bataatu ba ye baba nkata-miilu mya ye."

⁴⁴Habaanaa Davidi wumuteele "Mfumu", lo dyaburi nde kabweese kuba mwaana Davidi?»

⁴⁵Baatu bobanso bu baba muywiilaana, Yesu waleele kuri bayiki [baandi ti:]

⁴⁶«Seenee madyeele mu batini ba mangisi, bo batiiri kweyunga mu madzweele mamala, bebaha mamboto mu bibeendu bya bobanso, bidzakukulu byatete mu manzo ma nkutukunu, na bibeendu byatete mu ntaangu ya kudya.

⁴⁷Bo bakweholo bitotolo mu manzo ma bafwiila balumi, na bafuta kwesa nsaambulu dzadzila. Bo sa bataambula maseembu mabvuriri bunene.»