Read Beembe Luk 21 Bible Online

Luk 21 - Beembe bible

Luk 21

¹Yesu bu kanaanguna kisoosi, wamono bisina bari mu kutuba mboongo mu kisweekulu.

²Wamono se mukyeetu mosi wa mufwiiri wahele na lubaku, watuba mwaa-mipata myoolo myantele.

³Tumi nde waleele ti: «Ngwanwa me nyiluleele ti: "Mufwiiri wamuwelu wumawu, bvuriri kutuba ti na baatu bobanso;

⁴bukuri bobanso babo, bi batubiri mu bikabu, bi bari na byo byayu-yulu; ngo kasi nde kunsa buwelu bwaandi, tubiri byobinso bi kabeeri na byo, bya kidziingu.»

⁵Baatu babamosi, baba bilaana Nzo-nzaambi ti, yabweeyese mu matari mamabwe, na bitotolo byasakumunu.

⁶Yesu wabaleele ti: «Biluumbu biri mu kwiisa biri, mu bi luri mu kukengese beenu bi, ka kusaala tari ha yulu tari ko, dibahele kutsyaamuna.»

⁷Bo bamufuula, baleele ti: «Muyikisi, mu nkya ntaangu mimyo miba, na nkya kidiimbu mbasi-tsuku kisoongo ti mamo matubukiri?»

⁸Nde waleele ti: «Seenee madyeele mpisi luhele kuwumuka; bukuri baatu balaka sa biisa mu nkuumbu me, na sa beleele ti: "Me nyiri", na ti: "Ntaangu yikokisiri!" Ngo yaa lubanama ko.

⁹Mbasi-tsuku ha luyuka beenu badzoonsolo mu midziingu, na mu kisaangila, lo yaa luba na boomo ko, bukuri mimyo miyelemini kutekesele kumonoko. Ngo nsukulu ka yikwiisa mu mawasu ko.»

¹⁰Tumi nde wabweese kuleele kuri bo ti: «Mansi na mansi sa manwaana, na bimfumu na bimfumu sa byanwaana.

¹¹Butoto sa bwatembele kwalaka, na mu mampele malaka sa mwaba manzala na biyoolo, sa kwaba misamu myansisi, na bidiimbu byabinene bifumuna ku yulu.

¹²Ngo tekesele momanso mamo, sa balukaanga na kulukwaamisa, sa balutsuundisa mu manzo mankutukunu, na kulutuba mu maboroko, sa balunata ha busu bwa bambyaasi na batumi, mu ntoono nkuumbu yaami.

¹³Yiyo sa yaba kuri beenu mpwaani ya kuteele me kimbaangi.

¹⁴Seenee dyo mu mitima myeenu ti: Lo yaa lutekisele kunyoongo mu ntoono ya kukalila manyutu meenu ko;

¹⁵bukuri me-meene, sa nyaluha mi ludzoonso na madyeele, kuri lo bataatu ba beenu, babangusina kulutungukila ko, na kuhaakula mi luleele ko.

¹⁶Babo baluyekele sa baba: bataayi na banguri, bampaangi, ba luri nkati-nsi, banduku. Sa badzusa babamosi mu beenu.

¹⁷Bobanso sa balubele mu ntoono nkuumbu yaami.

¹⁸Ngo kuri ti lufu lumosi lwa mutu weenu ludziimbila ko.

¹⁹Bu lunamitini, lo sa lwabvuukisa miheebulu myeenu.»

²⁰«Mu ntaangu yilumono, mikaangu mya bayongolo, midyeengikiri Yerusalemi, lo yaabeenu ti ntaangu ya kutsyaamuna bvula yikokisiri.

²¹Haho, babo baba ku Yudaya, lo bayitika kwaaku ku yulu milaandu; babo baba kunsa bvula, lo bapala kwaaku, na babo baba ku manseke, lo yaa bakoto mu dyo ko.

²²Bukuri bibyo sa byaba biluumbu bya nsundusulu, biri momanso matinu sa meende mu mana.

²³Kyaari kuri bakyeetu baba na mayimi, na babo bakwenwiisa baala mabeene, mu biluumbu bibyo; bukuri sa kwaba manyoongi malaka mu nsi yi, na nkesi dza Nzaambi sa dzabwa ha yulu baatu bamaba.

²⁴Sa bafwiilila mu mbeesi yayila, na sa babanata ku bunkutu, mu mansi momanso, na bangooyi sa batsaamuna Yerusalemi natee ntaangu ya bangooyi yikukiri.»

²⁵«Sa kuba bidiimbu mu ntaangu, mu ngoondo na mu bambwetete; na ha butoto, makaanda sa mabwilikila kinkuuka, mu nsisi dza kiyomo kya mubu na mipaku mya maampa.

²⁶Baatu sa bafwiila mu boomo, na mu kukiingila mamo mabwa mu nsi yoyinso ya baatu; bukuri mpinu dza mayulu sa dzibwa.

²⁷Haho, bo sa bamono Mwaana muutu wukwisikila mu matuti, kunsa mpinu na nkeembu yayinene.

²⁸Misamu mimyo, mibaanaa myeki baandika kumonoko, lo suungumeenu na siimbileenu mitu myeenu, bukuri nkuululu yeenu yikokisiri.»

²⁹Yesu wabateele nkuma yimayi: «Taleenu mungenge na miti myominso;

³⁰mibaanaa myeki teete, lo beenu-meene bu lutala, lu mwaayaaba ti ntoombo yeki bebele;

³¹bunubwo se beenu, mbasi-tsuku lumonaa ti mamo matubukiri, lo yaabee ti Kimfumu kya Nzaambi kyeki bebele.

³²Mu ngwanwa me nyiluleele ti: Kiseendu ki ka kilabuka ko, lo momanso mamo mayirimini.

³³Nsi na yulu sa byaluta, ngo Maampu maami, ka mari ndutila ko.»

³⁴«Seenee madyeele mu beenu-meene, mu kubata ti mitima myeenu mikwiisa kuba malemu, mu ntoono nwiinu yamansaalisi, nkolulu malu, na minyoongi mya kidziingu kimaki, na kuri ti kiluumbu kikyo kihele kulutubukila na sisuu,

³⁵bunu siinga; bukuri sa kiisa ha yulu baatu bobanso badzakalaa mu nsi yansiina.

³⁶Beenee naana, saambileenu mu mpisi ntaangu, mpisi lubaka makwa ma kubvuuka mu momanso makwiisa mamo, na kuba bateleme ha busu bwa Mwaana muutu.»

³⁷Mu ntaangu ya mwiini, Yesu waba baanaa mu Nzo-nzaambi, ngo mu ntaangu ya butsuku, waba palaana mu kweba ku yulu mulaandu, wubateelaa ti wa Mi-olive.

³⁸Mu minkya, baatu bobanso, baba kwiisa ku Nzo-nzaambi mu kumuywiila.