Read Beembe Luk 22 Bible Online

Luk 22 - Beembe bible

Luk 22

¹Munkeembu wa mampa mahele lufunusu wubateelaa ti Paaka waba weki bele.

²Bakuutu ba bangaanga-nzaambi, na batini ba mangisi basaka bwa kudzusila Yesu, ngo babata baatu.

³Satana wakoto mu Yuda wubateelaa ti Iskaryote, waba mu lutaangu lwa bo kuumi na boolo.

⁴Yuda wayende kweyukusuna na bakuutu ba bangaanga-nzaambi, na bakuutu ba bakebi ba Nzo-nzaambi, dyaburi nde kasa mu kumuyekele kuri bo.

⁵Bo bamono kiminu, na bayukisina mu mboongo dza kumuha.

⁶Nde wataambula, na wasaka mpwaani yayibwete, mu kumuyekele kuri bo, kuri mpuumbu yo pe.

⁷Kiluumbu kyatubuka kya mampa mahele lufunusu, ki bakekaa kibulu kya Paaka.

⁸Yesu waheeke Petelo na Yowane, wabaleele ti: «Yendeenu lwelutuyirikila Paaka mpisi tudidyeeneenu.»

⁹Bo bafuula kuri nde ti: «Kuri ye tiiri ti beetu twetuyirika?»

¹⁰Nde waleele kuri bo: «Luyuka, bu lukoto kunsa bvula, sa lwabwaana muutu mosi wukwenata yuku dya maampa; munameenu natee ku nzo yi kakweekoto;

¹¹na leelee kuri ngaa-nzo ti: "Muyikisi bu kaleeriri kuri ye ti: kihekiri ki nyidiila me Paaka na bayiki baami, kuri kiri?"

¹²Na nde sa kalusoongo kihekiri kya ku yulu kyakinene kyabweeyese; seenee nyirikulu haho.»

¹³Bu bayende, bo bamono misamu bunu bu kaba baleele, na bo basa nyirikulu Paaka.

¹⁴Kilookolo bu kyatubuka, nde wadzakala mu kudya kintwaari na bayiki baandi.

¹⁵Waleele kuri bo ti: «Me nyabee na musoongo walaka, mu kudya Paaka dimadi, kintwaari na beenu, tekesele me nyimono mpasi;

¹⁶bukuri me nyiluleele ti: Me ka nyibweese kudya Paaka ko, natee ku diyirimini mu Kimfumu kya Nzaambi.»

¹⁷Bu kaholo basa, wabvutula matoondo, na waleele ti: «Holee yo, na kabulee beenu na beenu;

¹⁸bukuri me nyiluleele ti: Me ka nyibweese kunwa malu ma bviinya ko, natee Kimfumu kya Nzaambi kiisiri.»

¹⁹Tumi bu kaholo mpa, wabvutula matoondo, wabukuna yo, wabaha, na wabaleele ti: «Yimayi ngo nyutu yaami, yaha mu beenu. Seenee bumabu mu kubambukila me mwooyo.»

²⁰Wasa bunubwo se mu mbasa, bu kamana kudya, waleele ti: «Mbasa yimayi, ngo lulelusunu lwamoono mu makila maami, matsaamuka mu beenu.

²¹Ngo kasi mono, kooko kwa wunde wunyekele, kuri kintwaari na me ha taabala.

²²Bukuri Mwaama muutu wuri mu kweende bunu bu diri dyakaangu; kasi kyaari kuri muutu wunde wumuyekele.»

²³Bo babaandika mu kusa nkalikisi bo na bo, mu nzala kuyaaba kari na mu bo wuyirika ma bubwo.

²⁴Nkalikisi dzabwa ha kakati dya bayiki, mu nzala kuyaaba kari na mu bo, na bvuriri bukuutu.

²⁵Nde wabaleele ti: «Bambyaasi ba mansi bakoomatumaa, na babo bari na lutumu ha yulu mo, bakoobateelaa ti "bangaa-mamabwe."

²⁶Ngo kari bubwo mu beenu ko. Kasi wubvuriri bukuutu ha kakati dya beenu, kaba bunu wubvuriri bulesi, na mutwaalisi kaba bunu kisari.

²⁷Mukwongo, na bvuriri bukuutu, ha kakati dya wunde walaambula miilu mu kudya, na wunde wuri mu kusala? Buri kari wunde walaambula miilu mu kudya ko? Ngo ha kakati dya beenu, me nyiri bunu wunde wuri mu kusala.

²⁸Ngo kasi beenu ngo lwanamitini kuba na me kunsa mpasi dzaami;

²⁹na me nyalususukila Kimfumu, bunu bwa nsusukila se Taata kyo,

³⁰mpisi heki beenu ludya, na lunwa ha taabala dya me, mu Kimfumu kyaami, na beenu sa lwadzakala ha yulu mamboloko mu kutsuundisa makaanda kuumi na moolo ma Isaheli.»

³¹«Simoni, Simoni, mono, Satana waluloombiri mu kuluyengese, bunu bu basaanaa mankono.

³²Ngo me nsambirye mu ye, mpisi heki kanyi dya ye dihele kubwa; ngo ye bu wubweese kubvutuka, lo kumisa bampaangi baaku.»

³³Petelo wamuleele ti: «Mfumu, me nyayirima mu kweende na ye ti mu boroko, ti ku lufwa.»

³⁴Yesu waleele ti: «Me nyikuleele, Petelo, lolo di, tekesele mulumi nsusu kakookolo, lo ye mwaatuna me mbala tatu.»

³⁵Tumi Yesu waleele kuri bo ti: «Mu ntaangu yi nyabee luheeke kyahele kimpokoro kya mboongo, nkangala na masapaatu, buri lwaheriri kitotolo ti kimosi?» Bo babvutula: «Ti kimosi pe.»

³⁶Nde waleele kuri bo ti: «Kasi mu lumalu, wunde wuri na kimpokoro kya mboongo kakiholo, bunubwo se kuri wuri na nkangala; na wunde wahele na mbeesi yayila, kayarika kiyuungu kyaandi mpisi kasuumba yo.

³⁷Bukuri me nyiluleele ti, mimyo matinu miyelemini kuyirima mu me: "Bamusuusa mu lutaangu lumosi na bahele na mangisi." Mukwongo, mimyo mitariri me bwee miyirimini.»

³⁸Bo baleele ti: «Mfumu, mambeesi moolo mamala moma.» Nde waleele kuri bo ti: «Bukukiri.»

³⁹Bu kapala, wayende bunu bwaba kifu kyaandi, ku mulaandu wa Mi-olive. Bayiki baandi se bamunama.

⁴⁰Bu katubuka ha kibeendu kikyo, nde waleele kuri bo ti: «Saambileenu, mpisi luhele kukoto mu nsindukulu.»

⁴¹Tumi nde wayende mwaa kibeensi, kiri lo kampe bunu kimpeelu kya tari, na bu katsuka maboongo ha nsi, wasaambila,

⁴²waleele ti: «Taata, mbuti ye tiiri, tatula mbasa yimayi la na me; ngo kari kutya kwa me ko, kasi kwa ye kuyirima.» [

⁴³Haho, mbasi ya ku yulu yamumonokono, mu kumusyaamisa.

⁴⁴Wabwilikila kinkuuka na wasyaama mu kusaambila; tukutu twaandi twaba tweki bunu mabete ma makila, mari mu kubwa ha nsi.]

⁴⁵Bu kamana kusaambila, wateleme, na bu kayende kuri bayiki, wabamono babwa tolo mu ntoono ngebe.

⁴⁶Nde wabaleele ti: «Ha nki! Luri tolo? Telemee lusaambila mpisi luhele kukoto mu nsindukulu.»

⁴⁷Bu kaba wakiri mu kudzoonso, mono, mpuumbu baatu yayisa, mosi mu bo kuumi na boolo, wuri nkuumbu Yuda, waba ku mankula ma bo, nde wakokosolo bebele na Yesu mu kumunyumutuna.

⁴⁸Ngo Yesu wamuleele ti: «Yuda, mu nyumutunu ye yekiri Mwaana muutu?»

⁴⁹Baba bamudyengekele bamonaa maba meki yirima, baleele ti: «Mfumu, buri tulata mbeesi yayila?»

⁵⁰Mosi mu bo, walata kisari kya mukuutu bangaa-nzaambi, na wamutabula kutu dya lubakala.

⁵¹Ngo Yesu waleele: «Hemesee bayirika mamo.» Bu kabelemene kutu wamutsinikisa.

⁵²Tumi Yesu waleele kuri bakuutu ba bangaanga-nzaambi, na kuri bakuutu ba bakebi ba Nzo-nzaambi, na kuri bakulu ba babakala, bayisiri mu kumukaanga ti: «Beenu lo lukwiisa na mambeesi mamala, na mboto, bunu ti me ngaa-bumfuna nyiri?

⁵³Mpisi kiluumbu me nyabee kwebaanaa na beenu mu Nzo-nzaambi, ngo kasi lwasii kaanga me ko. Ngo kimaki kyeki kilookolo kya beenu, na kya lutumu lwa mampimbisi.»

⁵⁴Bo basiimba Yesu, na bamukotoso mu nzo mukuutu bangaanga-nzaambi. Petelo waba kwenamaana kila-kila.

⁵⁵Bo banamuka mbaawu ha kakati dya mbasi, na badzakala mu kintwaari. Petelo waba wadzakala ha kakati dya bo.

⁵⁶Kisari kimosi kya mukyeetu, bu kamumono kuri wadzakala ha buungi, wamusungumina kisoosi waleele ti: «Wumawu se beeri kintwaari na nde.»

⁵⁷Ngo Petelo watuna, waleele ti: «Mukyeetu, me nyahele kumuyaaba.»

⁵⁸Mwaa-kidzika kyantele, muutu mukimi se bu kamumono, waleele ti: «Ye se wuri mosi mu bo.» Ngo Petelo waleele ti: «Muutu, me nyiri ko.»

⁵⁹Kilookolo kampe kimosi bu kyaluta, muutu mukimi wabweese kusika ti: «Mu ngwanwa wumawu se beeri kintwaari na nde, bukuri wa ku Ngalili, bunu Yesu.»

⁶⁰Ngo Petelo wabvutula ti: «Muutu, me nyaari mi wuri mu kuleele ye mimyo ko.» Na hanaho, bu kaba wakiri mu kudzoonso, mulumi nsusu wakookolo.

⁶¹Mfumu bu kasyeeteke, wasungumina Petelo kisoosi. Haho, Petelo kabaambuka mwooyo mu maba muleele Mfumu ti: «Lolo di tekesele mulumi nsusu kakookolo, ye sa tuna me mbala tatu.»

⁶²Bu kapala ku mbasi, wadila mu ngebe.

⁶³Baatu baba kebaana Yesu, bamusiila munsiku na bamulata.

⁶⁴Bu bamufuka nsaanda ku busu, bamufuula, baleele ti: «Bikula, leele na wukuleti?»

⁶⁵Bo bamutuka mu mikimi myalaka myamibi.

⁶⁶Bwiisi bukyaanaa, mfuundu ya bakulu ba babakala, bakuutu ba bangaanga-nzaambi, na batini ba mangisi bakutukina, bamunata ha busu bwa mfuundu bo ya kikuutu,

⁶⁷na bamufuula ti: «Mbuti ye ngo Kiristo, tuleele.» Nde wabaleele ti: «Mbuti me nyiluleeriri lo ka lunsiila kanyi ko;

⁶⁸na mbuti me nyiluheeri kifuuri lo ka luri mpeele mvutu ko.

⁶⁹Ngo kuholosono mu lumalu, Mwaana muutu sa kadzakala ha lubakala lwa Nzaambi-Mpuungu.»

⁷⁰Haho, bo baleele ti: «Buri ye ngo Mwaana Nzaambi?» Nde wabaleele ti: «Beenu-meene luleeriri ti me nyiri nde.»

⁷¹Bo baleele ti: «Tusiiri kwaandi ti na nzala kimbaangi ko, bukuri beetu-meene tuyukiri mu munwa wa nde-meene.»