Read Beembe Luk 4 Bible Online

Luk 4 - Beembe bible

Luk 4

¹Yesu waba waluula mu Mpeeve Yangisi, wanangukina ku Yorodani, na Mpeeve yamutwaalusu mu nsi yankatu,

²mu biluumbu makuumi mana, na dyabulu wamusuusa mu nsindukulu. Nde kasii dya mu biluumbu bibyo ko. Biluumbu bimanaa kukuka, nde wabaka nzala.

³Dyabulu waleele kuri nde ti: «Mbuti ye Mwaana Nzaambi, leele kuri tari di dikituka mpa.»

⁴Ngo Yesu wabvutula kuri nde ti: «Diri dyatinu ti: "Muutu kari mbeele mwooyo mu mana mampa kitsu ko."»

⁵Dyabulu wamunata ku nkati yulu, wamusoongo bimfumu bya nsi yiri baatu, mu kilookolo kimosi,

⁶na wamuleele ti: «Me sa nyakuha lutumu lwolunso lu, na nkeembu ya bimabi bukuri kuri me bari bayiha, na me lo mpeeri yo, kuri wunde wutiiri kuha.

⁷Ngo mbuti ye tsukumini ha busu bwa me, lo yoyinso sa yaba ya ye.»

⁸Yesu wabvutula waleele kuri nde ti: «Diri dyatinu: "Mfumu Nzaambi yaaku yelemini kutsukumina, na wunu nde kitsu ye yelemini kusaambila."»

⁹Nde wanata Yesu ku Yerusalemi, na wamutelemese ku yulu nsoongi Nzo-nzaambi, na wamuleele ti: «Mbuti ye Mwaana Nzaambi, sonoko ye-meene ku nsuku nsi;

¹⁰bukuri diri dyatinu ti: "Nde sa kaha lutumu kuri bambasi baandi mu ntoono ye, mpisi bakukebe."

¹¹Na ti: "Sa bakunaanguna mu myooko, mpisi heki kuulu kwa ye kuhele kubumina kya mu tari."»

¹²Yesu wabvutula, wamuleele ti: «Diri dyaleelu ti: "Yaa suusa Mfumu Nzaambi yaaku mu nsindukulu ko."»

¹³Dyabulu kamana nsindukulu dzodzinso, ha kamusisa natee mu kilookolo kikimi.

¹⁴Yesu wabvutuka ku Ngalili na mpinu dza Mpeeve, na mvuumfu yatsamukina mu nkoonsi yoyinso mu ntoono ya nde.

¹⁵Nde waba kweyikisaa mu manzo ma nkutukunu ma bo, na bobanso bamukeembese.

¹⁶Yesu wayende ku Nadzareti ku kabuukiri. Mu kiluumbu kya mpuumunu, nde wakoto mu nzo-nkutukunu bunu bwaba kifu kyaandi. Nde wateleme mu kutaanga,

¹⁷na bamuyakisa mukaanda wa mubikiri Esaya. Bu kamuyalimina, wamono ha kibeendu kyaba kyatina ti:

¹⁸«Mpeeve ya Mfumu yiri mu me, bukuri nde wankila maasi, mu kunata Musamu Wamubwete kuri bawelu. Nde wampeeke mu kubikisa bunsaalisi, kuri bari mu maboroko, na nsinukunu kuri bafwa miisu, kubvutula bari mu nkwaamusunu kunsa bunsaalisi,

¹⁹kubikisa mubvu wa bweese wa Mfumu.»

²⁰Bu kafutuka mukaanda, wabvutula nde kuri kisari na wadzakala. Bobanso baba munsa nzo-nkutukunu bamusungumina kisoosi.

²¹Haho, nde wabaandika kuleele kuri bo ti: «Lolo di, matinu mamama, ma luyukiri beenu, meensi mu mana.»

²²Bobanso bamuteele kimbaangi, na bakimuka mu maampu ma bweese maba palaana mu munwa waandi, na baleele ti: «Buri wu kari mwaana Yosefi ko?»

²³Nde waleele kuri bo ti: «Beenu nkati sa lwateelile me nkuma yiri ti: "Ngaanga, buka nyutu ya ye-meene." Beetu twayukiri momanso mayirimini ku Kafarnawumi, sa yirika mo se, mu nkoonsi ya ye-meene yimayi.»

²⁴Nde waleele ti: «Mu ngwanwa me nyiluleele ti: kuri mubikiri ti mosi ko wubataambulaa mu nkoonsi ya nde-meene.

²⁵Mu ngwanwa me nyileele kuri beenu ti: bakyeetu ba bafwiiri baba balaka mu ntaangu ya Eliya, mu Isaheli, ha kaangimini yulu mu mibvu mitatu na mangoondo masaamunu, na ha yisiri kwaambala mu nsi yansiina.

²⁶Ngo basii heeke Eliya kuri mufwiiri ti mosi ko mu bo, ha yulu kunu ku Salepeta mu nkoonsi ya Sidoni, kuri mukyeetu mosi wa mufwiiri.

²⁷Babeeru ba bwaasi se baba balaka mu Isaheli, mu ntaangu ya mubikiri Elise, ngo kuri ti mosi ko mu bo wu batsyeemisini, ha yulu wunu Nayimani wa ku Sirya.»

²⁸Bobanso baba mu nzo-nkutukunu, bu bayuka mamo, babaka nkesi.

²⁹Bu bateleme, bamubingisa ku mbisa bvula, na bamunata natee ku teke beenge, dya mulaandu wu baba batuunga bvula, mpisi bamusindikila kunsuku beenge.

³⁰Ngo nde kafyolomokaa ha kakati dya bo, weensi kwaandi.

³¹Yesu wakulumuka ku Kafarnawumi, bvula dya mu nkoonsi ya Ngalili, kukwo nde kaba yikisaana baatu, mu kiluumbu kya mpuumunu.

³²Baatu bakimuka mu nyikusulu dzaandi, bukuri maampu maandi maba na lutumu.

³³Mu nzo-nkutukunu mwaba muutu mosi, waba na mpeeve yayibi. Nde wabikisa mu mbeembu yamakwa:

³⁴«Ha! Nkya ntoono ha kakati dya ye na beetu, Yesu wa ku Nadzareti? Buri ye wiisiri mu kutufuukisa? Me nyaari ye na wuri, Wangisi wa Nzaambi!»

³⁵Yesu waŋaŋana mpeeve yayibi yiyo, na waleele ti: «Kaanga munwa waaku, na pala mu muutu wu!» Mpeeve yayibi yatuba muutu wunde ha nsi, ha kakati dya baatu, na yapala mu nde kwahele kumumonoso mpasi.

³⁶Bobanso bamono boomo, na balelesene bo na bo ti: «Nkya maampu ma? Muutu wumawu wudzoonso mu lutumu, na mu mpinu kuri mampeeve mamabi, na mapala!»

³⁷Haho, mvuumfu yatsamukina mu ntoono ya nde, mu nkoonsi yoyinso.

³⁸Yesu kapalaana mu nzo-nkutukunu, weekoto mu nzo Simoni. Kukwo nguri mukasi Simoni waba luungaa na baawu dya makwa. Baatu basa ndoombolo kuri Yesu mu ntoono ya nde.

³⁹Nde, kayilimina mubeeru, ha kaŋaŋini baawu, na baawu dipariri mu nde. Hanaho, mukyeetu wunde, bu kateleme ha kabeke kubasalila.

⁴⁰Mu nsinsika, bobanso baba na babeeru, babeele mabeeru ma bitsuumbu-bitsuumbu, babatwaala kuri Yesu. Nde wateeteke myooko ha yulu mosi mosi mu bo, na wabatsinikisa.

⁴¹Mampeeve mamabi se mapala mu babeeru balaka, kuri makwebikisa ti: «Ye ngo Mwaana wa Nzaambi!» Ngo Yesu wamaŋaŋina, na kasii kumaha miswa mu kuleele mimyo ko, bukuri maba mayaari ti nde ngo Kiristo.

⁴²Bwiisi bu bwakya, Yesu kapalaana weensi ku kibeendu kyankatu. Mampuumbu mabeke kwemusaka, natee beensi ku kaba nde. Bo baba batiiri kumukebe, mpisi kahele kweende la na bo.

⁴³Ngo nde waleele kuri bo ti: «Me nyelemini kweyaabisa se Musamu Wamubwete, wa kimfumu kya Nzaambi ku mabvula makaka, bukuri mu bubwo me bari bampeeke.»

⁴⁴Haho, nde wayende mu kweyaabisa mu manzo mankutukunu, mu nkoonsi ya Yudaya.