Read Beembe Luk 5 Bible Online

Luk 5 - Beembe bible

Luk 5

¹Yesu bu kaba wateleme, ha teke mubu wa Ngenesareti, mpuumbu baatu yabununa kuri nde, mu nzala kuyuka maampu ma Nzaambi.

²Nde wamono mabwaatu moolo mu teke mubu; bakwelebaa mu mo, baba basuunduka ha nsi, bari mu kuswaakaa masiinga.

³Yesu kanwaataa mu bwaatu bumosi bwaba bwa Simoni, ha kaloombiri kuri nde, mu kweende mwaa lutatu na simu. Nde wadzakala munsa bwaatu na wabeke kuyikisa mampuumbu.

⁴Bu kamana kudzoonso, nde waleele kuri Simoni ti: «Kwese kwasunda maampa, na lutuba masiinga meenu mu kulebe bansu.»

⁵Simoni wabvutula kuri nde ti: «Muyikisi, beetu tusariryee butsuku bwabutsiina, ngo tusii baka kitotolo ko, ngo bukuri ye leeriri, me nyeki tuba masiinga.»

⁶Bo batuba masiinga, na babaka mburi koto dya bansu, kuri masiinga ma bo maba meki kaakaka.

⁷Bo balaba mu kooko, bambaasi baba mu bwaatu bwakaka, mpisi biisa mu kubabakisa. Bo bayisa na baluulusa mabwaatu momoolo, kuri meki kusaka kudyaama.

⁸Simoni Petelo, bu kamono bubwo, watsuka maboongo ha nsi ha busu bwa Yesu, na waleele ti: «Mfumu, sasika kwaaku la na me, bukuri me nyiri muutu ngaa-masumu.»

⁹Simoni na bobanso baba kintwaari na nde, babwilikila kinkuuka, mu bukuri bamwiini koto dya bansu ba babakiri.

¹⁰Bwobumosi se kuri Yakobo na Yowane, baala ba Dzebedayi, bambaasi ba Simoni. Yesu waleele kuri Simoni ti: «Yaa ba na boomo ko; kuholosono mu lumalu ye sa webaka baatu.»

¹¹Bu bamana kubvutula mabwaatu ha simu, babwoongolo byobinso, na banama Yesu.

¹²Mu ntaangu yaba Yesu mu bvula dimosi, mubakala mosi waluula mu bwaasi wayisa; bu kamono Yesu, wabwa kuri watsuka busu ha nsi, wamuyingukila waleele ti: «Mfumu, mbuti ye tiiri, lo ye tsyeemisini me.»

¹³Yesu, kalaambula kooko, wumubelemini na leeriri ti: «Me ntiiri, ba watsyeeme.» Na hanaho, bwaasi bwayisika mu nde.

¹⁴Yesu wamudika ti: «Yaa leele kuri muutu ti mosi ko. Ngo yende wemonokono ye-meene kuri ngaanga-nzaambi, na ha kikabu kya nsyemukunu kya tuma Moose, mpisi kiba kimbaangi kuri baatu.»

¹⁵Maampu mahamisa kutsamukina kwalaka mu ntoono nde, na mampuumbu malaka makutukina mu kumuywiila, na mu kutaambula butsiina mu mabeeru maaku.

¹⁶Ngo kasi, nde ha ka yende ku nsi yankatu mu kwesaambila.

¹⁷Kiluumbu kimosi, Yesu bu kaba mu kuyikisa, Bafarisi na bayikisi ba mangisi baba badzakala. Bo bafumini mu mabula momanso ma ku Ngalili, ma ku Yudaya na ku bvula dya Yerusalemi. Mpinu dza Mfumu dzaba mu nde, mu kutsinikisa babeeru.

¹⁸Na mono, baatu banata muutu mosi wabwa mabwolokoto, ha yulu nkwaala. Basaka bwa kumukotosolo, na bwa kumusuusula ha busu bwa Yesu;

¹⁹ngo basii baka bwa kumukotosolo ko, mu ntoono mpuumbu. Bo banwaata ku yulu muluri, basaalisa waanga mu muluri wa tubuumbu, na bamusundula mu nkwaala, ha kakati dya baatu, ha busu bwa Yesu.

²⁰Yesu bu kamono kanyi dya bo waleele ti: «Muutu, masumu maaku meki mahemusunu.»

²¹Haho, batini ba mangisi na Bafarisi babaandika mu kutsima na baleele ti: «Na wumawu wukweleele ma nsaanunu? Na wakuka mu kuhemesene masumu, mbuti ka Nzaambi kitsu ko?»

²²Yesu bu kabakula bitsimi bya bo, wabvutula, waleele kuri bo ti: «Nkya mo, luri mu kwetsima kunsa mitima myeenu?

²³Nki bibvuriri kuleenge, kuleele ti: "Masumu maaku meki mahemusunu", hoti kuleele ti: "Teleme na yende?"

²⁴Ngo mu kuri ti, beenu luyaaba ti Mwaana muutu wuri na lutumu lwa kwehemesene masumu ha butoto.» Nde waleele kuri wabwa mabwolokoto ti: «Me nyikuleeriri ti, teleme, holo nkwaala yaaku na yende ku nzo yaaku.»

²⁵Ha nsi na nsi, muutu wunde wateleme ha busu bwa bo, waholo nkwaala yi baba bamuneŋesene, na wayende ku nzo yaandi, kuri wukwekeembese Nzaambi.

²⁶Bobanso bamono dyo dya nkimukunu na bakeembese Nzaambi, baluula mu boomo na baleele ti: «Lolo tumwiini kweetu ma nkimukunu!»

²⁷Ha mambisa haho, Yesu wapala na wamono mutori-mpaku mosi, nkuumbu yaandi Levi, waba wadzakala ha kibeendu kiba loombaa mpaku. Nde wamuleele ti: «Nama me.»

²⁸Levi wabwoongolo byobinso, wateleme na wamunama.

²⁹Levi wayirika ndiilu yayinene mu nzo yaandi. Mburi mpuumbu batori ba mpaku, na baatu bakimi baba hanaho, baba balaambula miilu, mu kudya kintwaari na bo.

³⁰Bafarisi na batini ba mangisi babeke kumunguta, na baleele kuri bayiki ba Yesu ti: «Buri beenu luri mu kudya na kunwa kintwaari na batori ba mpaku na bangaa-masumu?»

³¹Yesu wabvutula waleele kuri bo ti: «Kari babatsiina babaanaa na nzala ngaanga ko, ngo babeele.

³²Me nyahele kwiisa mu kuteele basuunguma, ngo bangaa-masumu mpisi bayiinga madyeele.»

³³Bo baleele kuri nde ti: «Bayiki ba Yowane bakookotaa loomi kwalaka, na basa nsaambulu, bayiki ba Bafarisi se bunubwo; ngo kasi ba ye badya na banwa.»

³⁴Yesu wabvutula kuri bo ti: «Buri beenu lo lukotisiri, banduku ba mukweeri mu loomi, mu ntaangu yiri mukweeri wuri kintwaari na bo?

³⁵Ngo biluumbu biri mu kwiisa, na mbasi-tsuku mukweeri bamuyusulaana ha bari bo, tumi bo bakoto loomi mu biluumbu bibyo.»

³⁶Yesu wabateele se nkuma yimayi: «Kuri muutu ko wuri lo taburi kiteendi mu kinkuta kyamoono, mu kuloondo kinkuta kyakikulu. Bukuri nde nkati lo kaakiri kinkuta kyamoono, na kiteendi kikayisiri mu kyo, kyahele kuyelemene mu kinkuta kyakikulu.

³⁷Bwobumosi, kuri muutu ko, wuri lo sekiri malu mamoono, mu bimpokoro byabikulu; bukuri malu mamoono lo maluukisiri bimpokoro. Malu lo matsaamukini, na bimpokoro se bibvukini.

³⁸Ngo malu mamoono, kusekele mu bimpokoro byamoono.

³⁹Na kuri muutu ko, wuri kanwaa maalu mamakulu, wusaka mamoono; bukuri nde lo kuleele ti: "Malu mamakulu mabvuriri bubwete!"»