Read Beembe Luk 9 Bible Online

Luk 9 - Beembe bible

Luk 9

¹Yesu wakutukisa bo kuumi na boolo, wabaha mpinu na lutumu ha yulu mampeeve momanso mamabi, na mu kwebuka mabeeru,

²wabasindika mu kwebikisa Kimfumu kya Nzaambi, na mu kwetsinikisa [babeeru].

³Nde waleele kuri bo ti: «Yaa lunata kitotolo ti kimosi ko mu nzila, ti luboto, ti nkangala, ti mpa, ti mboongo. Yaa luba se na binkuta byoolo mu muutu mosi ko.

⁴Mu nzo yilukoto, dzakalee mumwo natee ku lupala.

⁵Babo babisa kulutaambula, lubaana lupala mu bvula didyo, lo kubulee fuunda diri mu bitaambi byeenu, mpisi kiba kimbaangi mu bubi bwa bo.»

⁶Bu bayende, baluta mu mpisi bula mu kweyaabisa Musamu Wamubwete, na kwebuka baatu mwomunso.

⁷Erode, mutumi nkoonsi bu kayuka momanso mayirimini, waba weki dunga, bukuri babamosi baba leelaana ti: «Yowane wafulukiri mu bafwa.»

⁸Bakaka ti: «Eliya wamonikini.» Bakimi ti: «Mosi mu babikiri ba bakulu wafulukiri.»

⁹Ngo Erode waleele ti: «Yowane, me nyamutabiri mutu. Heki wunde na wu nyiri mu kuyuka me misamu mya bubwo?» Nde wasaka mu kumumono.

¹⁰Bantumu bu babvutuka, bayaabisa kuri nde momanso ma bayirikiri. Yesu wabaholo na wayende na bo ku lumperi, ku teke bvula di bakooteelaa ti Betesayida.

¹¹Mampuumbu bu bayaabila, bamunama. Nde wamataambula, wabeke kumadzoonsolo mu ntoono Kimfumu kya Nzaambi, na watsinikisa baba na nzala butsiina.

¹²Bwiisi bubaanaa bweki yila, bo kuumi na boolo bakokosolo, na baleele kuri nde ti: «Bvutula mpuumbu, mpisi heki baatu beende, mu mabula mari bebele, na mari mu manseke, basaka ha baba na babaka bya kudya, bukuri hamaha, turi ku nsi yankatu.»

¹³Ngo nde wabaleele ti: «Baheenee beenu-meene bya kudya!» Bo babvutula ti: «Mampa mataanu kitsu na bansu boolo turi na byo. Sa ti, kuri ti twesuumba byandya bya baatu bobanso ba tumi.»

¹⁴Kwaba kampe mafuunda mataanu ma babakala. Yesu kuri bayiki baandi ti: «Badzakisee mu makabu, [kampe] ma makuumi mataanu mu mpisi dyo.»

¹⁵Bo basa bubwo, badzakisa baatu bobanso.

¹⁶Bu kaholo mampa mataanu na bansu boolo, watala ku yulu, wasakumuna byo, wabukuna, na waha kuri bayiki mu kukabula kuri mpuumbu.

¹⁷Bobanso badya na bayukuta. Bakutukisa bitsuri byasaariri: mitooto kuumi na myoolo.

¹⁸Kiluumbu kimosi, Yesu waba saambilaana ha lumperi, na bayiki baandi se baba kintwaari na nde. Nde wabafuula ti: «Mampuumbu makweleele ti me na nyiri?»

¹⁹Bo babvutula ti: «Babamosi ti: ye ngo Yowane Mubotiki; bakaka ti: Eliya; na bakimi ti: mosi mu babikiri babakulu wafulukiri.»

²⁰Nde wafuula kuri bo ti: «Heki beenu ti me na? Petelo wabvutula, waleele ti: Ye ngo Kiristo dya Nzaambi.»

²¹Nde wabaŋaŋina, wabadika ti yaa baleele kuri ti mosi ko.

²²Nde wabweese kuleele ti: «Mwaana muutu yelemini kumono mpasi dzalaka, bakulu ba babakala, bakuutu ba bangaanga-nzaambi na batini ba mangisi sa bamuyekele, na kumudzusa, tumi mu kiluumbu kyabitatu kafuluka.»

²³Nde wabweese leele kuri bobanso ti: «Mbuti muutu tiri kunama me ha mambisa, lo katuna nyutu ya nde-meene, kenata kuruwa dyaandi mpisi kiluumbu, na kenama me.

²⁴Mpisi wutiiri kubvuukisa kidziingu kyaandi, lo sa kakidziimbisa; ngo kasi wunde wudziimbisa kidziingu kyaandi mu ntoono me, lo sa kakibvuukisa.

²⁵Mukwongo, nkya ndaandu yiri na muutu mu kubaka nsi yansiina, ngo nde-meene dziimbiri bunu pe fwiiri?

²⁶Mpisi wunde wuba na nsoni mu me, na mu Maampu maami, lo Mwaana muutu se sa kaba na nsoni mu nde, ha kakwiisa mu nkeembu yaandi, ya Taata na ya bambasi.

²⁷Ngwanwa me nyiluleeriri ti, babamosi mu bateleme hamaha, bafwa ko, natee bakiri kumono Kimfumu kya Nzaambi.»

²⁸Biluumbu kampe mpoomo byalutiri ha mambisa ma maampu mamo, [tumi] Yesu kaholaa Petelo, Yowane na Yakobo wanaaka na bo ku yulu mulaandu mu kwesaambila.

²⁹Mu ntaangu yi kaba saambilaana, kidziri kyaandi kyayiinga nzelu, na kinkuta kyaandi kyaba kyeki kyahembeke na kiseme bunu nseremi.

³⁰Na mono, baatu boolo baba dzoonsaana na nde. Baatu babo ngo Moose na Eliya,

³¹bapalikiri kunsa nkeembu, na baba dzoonsolaana mu nyendukulu yaandi yaba yeki yirima ku Yerusalemi.

³²Hanaho, Petelo na bambaasi baandi baba beki kunsa tolo twamusundu. Ngo bu basiimbuka bamono nkeembu yaandi na baatu boolo bateleme kintwaari na nde.

³³Mu ntaangu yi baba beki hambikisa, Petelo waleele kuri Yesu ti: «Mfumu, buri bwabubwete ti tubeenee haaka. Beetu tutuunga misaampu mitatu: mosi kuri ye, mosi kuri Moose, na mosi kuri Eliya.» Ngo Petelo waba wahele kuyaaba ma kaba leelaana.

³⁴Bu kaba wakiri mu kudzoonso mamo, tuti dyayisa na dyabafuka kunsa mposi. Bo bamono boomo mu ntaangu yibakoto kunsa tuti.

³⁵Mbeembu yapala kunsa tuti, yaleele ti: «Wumawu ngo Mwaana waami, wu nyiri nyasoolo, muywiileenu!»

³⁶Mbeembu bu yayukukuna bubwo, Yesu waba weki kuba nde-kaka. Bo bawura lusuku, na mu ntaangu yiyo, bo basii yaabisa kuri muutu ntoono ti mosi ko, mu ma bamwiini.

³⁷Bu basunduka ku mulaandu, kiluumbu kyanama, mpuumbu yayinene yayisa mu kumubwaana.

³⁸Na mono, muutu mosi kunsa mpuumbu wabikisa, waleele ti: «Muyikisi, me nyikuyingukila mu kusyeetele kisoosi ha yulu mwaana me, bukuri wunu nde nyiri na nde.

³⁹Mono, mpeeve mosi bu yimusiimba, lo hanaho nde bekiri kufula. Mpeeve yimunyingisa mu makwa, na fula dipala mu munwa, yimubamisa na yahele kutya kumupatula.

⁴⁰Me nyingukiryee bayiki ba ye mpisi bapalisa mpeeve yiyo, ngo basii bangusinaa ko.»

⁴¹Yesu wabvutula, waleele ti: «Ha! Kiseendu kyahele na kanyi, na kyawumuka. Natee mantaangu makwe me nyiba bele, na me nyikuunda beenu? Twaala mwaana waaku hamaha!»

⁴²Mwaana kabaanaa weki kokosolo mpeeve yamutuba ha nsi na yamunyingisa. Yesu waŋaŋana mpeeve yayibi, na watsinikisa mwaana, na wamubvutula kuri taayi dyaandi.

⁴³Baatu bobanso bamono nkimukunu mu bunene bwa Nzaambi. Bobanso bu baba kimukaa mu momanso ma yirikiri Yesu, nde waleele kuri bayiki baandi ti:

⁴⁴«Yirikee kuyuka maampu mamama: Mwaana muutu weki ba wayekulu mu myooko mya baatu.»

⁴⁵Ngo bo baba bahele kubakula maampu mamo, mambangukulu maba masweeku, mpisi heki bahele kumabakula, na bo baba bataana kumufuula musamu wunde.

⁴⁶Nkalikisi dzabwa ha kakati dya bayiki mu kuyaaba, kari na bvuriri bukuutu mu bo.

⁴⁷Ngo Yesu bu kabakula bitsimi byaba mu mitima mya bo, ha kaholo mwaa-mwaana, wamutelemese ha teke nde,

⁴⁸na waleele kuri bo ti: «Mpisi wunde wutaambula mwaa-mwaana wu mu nkuumbu ya me, lo me kataamburi; na mpisi wunde wutaambula me, lo wunde wampeeke kataamburi. Bukuri wunde wu bvuriri bulesi ha kakati dya beenu, lo nde ngo mukuutu.»

⁴⁹Yowane wabaangula mbeembu, waleele kuri Yesu ti: «Muyikisi, beetu tumwiinyee muutu mosi, wukwebingisa mampeeve mamabi mu nkuumbu ye; na beetu tumudikiryee, bukuri nde wahele kweyende kintwaari na beetu.»

⁵⁰Yesu wabvutula kuri nde ti: «Yaa lumudika ko, bukuri wunde wahele na kitaatu mu beenu, lo wuri kintwaari na beenu.»

⁵¹Mu ntaangu yiri ti biluumbu bya nde, bya kunaanguka ku yulu bi tubukiri, Yesu wakaanga kitsimi kya kweende ku Yerusalemi.

⁵²Nde wasindika binati-mukeensu ku mankula maandi. Bu bayende mu nzila, bakoto mu bula bu mosi bwa bari Samariya, mu kubweeyese nkotulu yaandi.

⁵³Ngo kasi, babisa kumutaambula, bukuri nde waba talisa dya ku Yerusalemi.

⁵⁴Bayiki baandi, Yakobo bo na Yowane bamonaa bubwo, baleele ti: "Mfumu, ye tiiri ti beetu tuloombo mbaawu ya ku yulu, yisunduka na yibayoko?"

⁵⁵Yesu kasyeetuka kuri bo, wubaŋaŋini.

⁵⁶Bo ha bayende ku bula bukimi.

⁵⁷Bu baba kweyendaa mu nzila, muutu mosi waleele kuri Yesu ti: «Me sa nyenama ye mpisi ku wukweende.»

⁵⁸Yesu waleele kuri nde ti: «Mibaku miri na miduku, na banoni ba yulu bari na madzaansa; ngo kasi Mwaana muutu wahele na ha kasuusa muutu.»

⁵⁹Yesu waleele kuri wakaka ti: «Nama me», ngo nde waleele ti: «[Mfumu,] mpa miswa me nyedziikeeti taata.»

⁶⁰Nde wamuleele ti: «Hemese bafwa bedziika bafwa baaku bo-meene. Ye ngo wuri, yende weyaabisa Kimfumu kya Nzaambi.»

⁶¹Mukimi waleele ti: «Mfumu, me sa nyakunama, ngo mpeeneeti miswa, me nyeyaabisa kuri bari ku nzo yaami.»

⁶²Yesu waleele kuri nde ti: «Muutu habaanaa wakwaata kikokolo mu kutsaba nseke, ngo wubweese kukebekele ku mambisa, lo wahele kuyelemene mu Kimfumu kya Nzaambi.»