Read Beembe Yow 11 Bible Online

Yow 11 - Beembe bible

Yow 11

¹Kwaba mubeeru mosi, nkuumbu Ladzaro, wa ku Betanya, bula bwa Mariya bo na Malata, kibusi kyaandi.

²Mariya ngo waba yitila mananaasi mu miilu mya Yesu, na kuyaala myo mu mfu dzaandi. Mpaangi yaandi Ladzaro waba wabeele.

³Bibusi byaandi baheeke mukeensu kuri Yesu ti: «Mfumu, nduku yaaku wabeele.»

⁴Yesu bu kayuka, waleele ti: «Bubeeru bubwo buri bwa lufwa ko, ngo mu ntoono nkeembu Nzaambi, mpisi heki Mwaana Nzaambi kaba wakeembese.»

⁵Yesu waba tiri Malata na kibusi kyaandi, na Ladzaro.

⁶Mu ntaangu yi kayukiri ti Ladzaro wabeele, nde wabweese kulutisa biluumbu byoolo ku kaba.

⁷Ha mambisa haho, nde waleele kuri bayiki ti: «Tubvutukee ku Yudaya.»

⁸Bayiki baleele kuri nde ti: «Labi, mpe-luulu yimayi, Bayudayo babee saka kukudzusa mu matari, ye weki bweese kubvutuka kukwo!»

⁹Yesu wabvutula ti: «Buri kwahele bilookolo kuumi na byoolo mu kiluumbu? Mbuti muutu wukweyende mu mwiini, lo kabumina nkya ko, bukuri nde wumono buungi bwa nsi yi.

¹⁰Ngo, mbuti muutu wukweyende mu butsuku, lo nde bumina nkya, bukuri buungi bwahele mu nde.»

¹¹Kamanaa kuleele bubwo, ha mambisa haho, nde bweese kuleele kuri bo ti: «Nduku yeetu Ladzaro wuri tolo, ngo me bee nyeensi mpisi nyimusiimbila.»

¹²Bayiki baandi baleele kuri nde ti: «Mfumu, mbuti tolo kabwiiryee, lo sa kabvuuka.»

¹³Yesu mu ntoono lufwa lwa nde kabadzoonsolo, ngo bo kutsima ti, mu ntoono tolo twa kuwuuma kaba dzoonsolo.

¹⁴Haho Yesu kadzoonso kuri bo na pwelelee ti: «Ladzaro wafwa.

¹⁵Ngo me nyiri na kiminu mu beenu bukuri me bee nyahele kuba kukwo, mpisi heki beenu lusiila kanyi. Ngo kasi tweendee kuri nde.»

¹⁶Toma wu bakooleelaa ti Didimo waleele kuri bambasi bayiki ti: «Tweendeenu beetuneenu se, mpisi tufweene na nde.»

¹⁷Hango, Yesu bu kayende, wamono kuri ti Ladzaro waba mwaasa biluumbu bina munsa mukala.

¹⁸Betanya dyaba bebele na Yerusalemi, mu kiteesu kya mafuunda matatu ma bitaki.

¹⁹Balaka mu Bayudayo baba bayisa kuri Malata na Mariya, mu kubaboondo mu ntoono mpaangi yaaku.

²⁰Ngo Malata kayukaana ti Yesu weki mu kwiisa, nde wayende mu kumubwaana; ngo kasi Mariya waba wadzakala munsa nzo.

²¹Malata waleele kuri Yesu ti: «Mfumu, mbuti ye wabeeri hamaha, nkani mpaangi me kaketi kufwa ko.

²²[Ngo] ti ha yuka mu lumalu, me nyaari ti, byobinso bi wuloombo ye kuri Nzaambi, lo Nzaambi sa kakuha.»

²³Yesu wamuleele ti: «Mpaangi yaaku sa yafuluka.»

²⁴Malata wabvutula ti: «Me nyaari ti, nde sa kafuluka haba mfulukulu ya kiluumbu kya mpotulu.»

²⁵Yesu wamuleele ti: «Me ngo mfulukulu na bumwooyo. Wunde wusiila kanyi mu me, ti hayuku wafwa, lo sa kaba mwooyo;

²⁶na mpisi wuri mwooyo, na wusa kanyi mu me, lo kari mfwiilu ko mu mantaangu momanso. Ye siiri kanyi mu mimyo?»

²⁷Nde waleele kuri Yesu ti: «Heehe, Mfumu me nyasa kanyi ti ye ngo Kiristo, Mwaana Nzaambi, wayisa ha nsi.»

²⁸Malata kamanaa kuleele mamo, nde wayende na wateele kibusi kyaandi Mariya, mu nsweeki, wamuleele ti: «Muyikisi weki haaka, na wukuteele.»

²⁹Mariya bu kayuka, wateleme mu mawasu, na wayende kuri nde.

³⁰Yesu waba wakiri kutubuka pe kunsa bula, ngo waba wakiri ha kibeendu kyaba mubwaana Malata.

³¹Hango Bayudayo baba na nde munsa nzo mu kumuboondo, bu bamono Mariya telemini mu mawasu na pariri ku mbasi, bamunama, bu baba tsima ti ku mampeembe keensi ku kudila.

³²Ngo Mariya katubukaa ha ba Yesu, na bu kamumono, wabwa ha miilu mya Yesu na waleele ti: «Mfumu, ye ngo wabee hamaha, nkani mpaangi yaami kaketi kufwa ko.»

³³Yesu kamonaa Mariya wuri mu kudila, na Bayudayo bayisiri na nde se bari mu kudila, nde wamono ngebe dzalaka, na mutima wabula mangoongo.

³⁴Nde waleele ti: «Hari lumusuusiryeenu?» Bo baleele kuri nde ti: «Mfumu, wasa na mono.»

³⁵Yesu wadila.

³⁶Bayudayo baleele ti: «Monee, nkati bee wumutiiri!»

³⁷Bakaka mu bo baleele ti: «Nde wabee kwedzibula miisu mya wafwa miisu, buri kaherirye kusa kuri ti muutu wu kahele kufwa?»

³⁸Yesu bu kabweese kubaka ngebe ku nsa mutima, wayende ku mampeembe, dyaba bulu dyahaku kunsa ntari, na dyabunduku mu tari.

³⁹Yesu waleele ti: «Yisilee tari», Malata kibusi kya wafwa wamuleele ti: «Mfumu, nde weki pala mfuku, bukuri kiluumbu ki kyeeki kyabina.»

⁴⁰Yesu waleele kuri nde ti: «Buri me nsii kuleelaa ko ti, mbuti ye siiri kanyi, lo ye sa wamono nkeembu Nzaambi?»

⁴¹Bo bayisila tari. Yesu watala ku yulu, waleele ti: «Taata, me mvutiri matoondo, bukuri ye yukiri ma nyikuloombiri.

⁴²Me nyaari ti ye kooywiilaa me mantaangu momanso, ngo me nzoonsiri mu ntoono mpuumbu baatu yandyengekele, mpisi basa kanyi ti, ye waheeke me.»

⁴³Bu kamanaa kuleele bubwo, mu mbeembu yamakwa nde wabikisa ti: «Ladzaro, pala!»

⁴⁴Wunde waba wafwa, wapala, myooko na miilu myakaangu mu bisila, na kidziri mu mutulu. Yesu waleele kuri bo ti: «Munyanginee, na muhemesee keyende.»

⁴⁵Balaka mu Bayudayo baba bayisa kuri Mariya, na bamwiini mya yirikiri Yesu, basiila kanyi mu nde.

⁴⁶Bamosi mu bo, bayende kwemono Bafarisi, na baleele kuri bo mamo ma yirikiri Yesu.

⁴⁷Hango bakuutu ba bangaanga-nzaambi bakutukina na kikuutu kya Bayudayo, baleele ti: «Nki tuseeneenu, bukuri muutu wumawu, wuri mu kwesa bidiimbu byalaka!

⁴⁸Mbuti beetu tumutariri bunubwo, lo bobanso sa basa kanyi mu nde, na bari Loma sa biisa batutsyaamina na kibeendu kyeetu, na kaanda!»

⁴⁹Muutu mosi mu bo, nkuumbu Kayafa, nde waba mukuutu bangaanga-nzaambi mu mubvu wunde, wabaleele ti: «Beenu luyaari kitotolo ko.

⁵⁰Beenu lwahele kumono kuri ti, bubvuriri bubwete mu beenu ti, muutu mosi kafwa mu ntoono baatu bobanso ti na kuri ti, kaanda dyodinso difwa.»

⁵¹Nde kasii leele mamo mu nde-meene ko. Ngo bukuri nde waba mukuutu bangaanga-nzaambi mu mubvu wunde, wabikula ti, Yesu yelemini kufwa mu ntoono kaanda,

⁵²kari munu mu ntoono kaanda ko, ngo se mu ntoono baala ba Nzaambi batsamukina, na se kabakutukisa mu kintwaari kimosi.

⁵³Kuholosono kiluumbu kikyo, bo baholo kitsimi, ti nde wa kudzusa.

⁵⁴Hango nkuumbu, Yesu waba wahele kubweese kweyende ha kakati dya Bayudayo, kuri bobanso bamumono; ngo nde wayende kwa la, ku nkoonsi yiri bele na nsi yankatu, mu bvula dimosi diri nkuumbu Efarayime, nde wadzakala kukwo na bayiki baandi.

⁵⁵Munkeembu Bayudayo wa Paaka waba weki bele, baatu balaka banangukina mu mabula ma bo, na batoomboko ku Yerusalemi, mu kutsyeemese manyutu maaku, tekesele Paaka diba.

⁵⁶Bo basaka Yesu, na balelesene bo na bo kuri bari mu Nzo-nzaambi ti: «Beenu buri lutsimini? Nde kari nyisikila ku munkeembu wumawu ko!»

⁵⁷Bakuutu ba bangaanga-nzaambi na Bafarisi baba leele ti mpisi wuyaaba hari Yesu, lo kiisa kabapyeete, mpisi bamukaanga.