Read Beembe Yow 2 Bible Online

Yow 2 - Beembe bible

Yow 2

¹Mu kiluumbu kya bitatu, kwaba makweele ku Kana, mu nkoonsi ya Ngalili. Nguri Yesu waba hanaho.

²Batumisini se Yesu na bayiki baandi ha makweele mamo.

³Malu bu mawa, nguri Yesu waleele kuri nde ti: «Bo basiiri na malu ko!»

⁴[Na] Yesu wamuleele ti: «Mukyeetu, nki bya ntwaari ha kakati dya ye na me? Kilookolo kya me kyakiri kutubuka pe.»

⁵Nguri yaandi yaleele kuri bisari ti: «Yirikeenu mpisi ma kaluleele.»

⁶Ha kibeendu kikyo, kwaba bisa bisaamunu bya matari byaba salilaana Bayudayo mu nsyemusunu manyutu. Mpisi kisa mu kuluula, lo mbyeengu mpoomo bunu pe kuumi na dzoolo.

⁷Yesu waleele kuri bo ti: «Luuluseenu bisa mu maampa.» Bisari byaluulusa bisa natee mu minwa.

⁸Yesu ha kaleele kuri bo ti: «Sa tekeenu mu lumalu, na nateenu kuri mukuutu munkeembu.» Bo banata.

⁹Mukuutu munkeembu bu kabiimba maampa, meki makituka malu, nde waba wahele kuyaaba kumafumini, ngo bisari batekiri maampa byaba biyaari. Mukuutu munkeembu wateele mukweeri,

¹⁰waleele kuri nde ti: «Mpisi muutu wuhaanaa meti malu mamabwe, baatu bakolaana, tumi keki palisa mahele mamabwe. Kasi ye, wakebe malu mamabwe natee mu lu!»

¹¹Yesu bubwo kari kabandukila kuyirika bimaangu, ku Kana mu nkoonsi ya Ngalili. Nde wasoongo nkeembu yaandi, na bayiki baandi basa kanyi mu nde.

¹²Ha mambisa haho, nde wayende ku Kafarnawumi, kintwaari na nguri yaandi, na bampaangi baandi, na bayiki baandi, na bo badzakala kukwo mu mwa biluumbu kitsu.

¹³Paaka dya Bayudayo dyaba dyeki bebele, Yesu wanwaata ku Yerusalemi.

¹⁴Nde watangusina munsa Nzo-nzaambi baatu bari mu kuyarika bangoombo, bimeeme na mabeembe, na bayiingisi ba mboongo baba badzakala.

¹⁵Yesu bu kayirika lukwaasulu lwa misiinga, wabinga bobanso mu Nzo-nzaambi, na bimeeme, na bangoombo, na watsaamuna mboongo dza bayiingisa na waseengele mataabala;

¹⁶na waleele kuri babo ba bayarikaana mabeembe ti: «Yisileenu bimabi ha kibeendu ki! Yaa lusa nzo Taayi dya me, nzo mumbungu ko.»

¹⁷Bayiki baandi babaambuka mwooyo ti diri dyatinu ti: «Ho! Kuheme ku nyiri na me mu nzo yaaku kwankalimina.»

¹⁸Hango Bayudayo bafuula, baleele kuri nde ti: «Nkya kidiimbu ye wusoongo kuri beetu, ti ye wuri na miswa mu kuyirika mamo?»

¹⁹Yesu wabvutula waleele kuri bo ti: «Tsaaminee Nzo-nzaambi yimayi, na mu biluumbu bitatu me sa mbweese kuyitelemese.»

²⁰Bayudayo baleele ti: «Nzo-nzaambi yi bayituungiri mu mibvu makuumi mana na misaamunu; ngo ye, mu biluumbu bitatu, lo bweesiri kuyitelemese?»

²¹Ngo nde Nzo-nzaambi yi kaba dzoonsolo nyutu yaandi.

²²Ngo nde kafulukaa mu bafwa, bayiki baandi babaambuka mwooyo mu ma kabaleele, na basa kanyi mu Matinu na mu maampu ma baleele Yesu.

²³Yesu bu kaba ku Yerusalemi mu ntaangu ya munkeembu wa Paaka, baatu balaka basa kanyi mu nkuumbu yaandi, mu bu bamwiini bidiimbu bi kayirikiri.

²⁴Ngo Yesu nde-meene waba wahele kusa kanyi mu bo, bukuri nde waba wubayaari bobanso,

²⁵na bukuri nde waba wahele na nzala kuri ti bamuteele kimbaangi mu muutu; bukuri nde-meene waba yaari mari mu muutu.