Read Beembe Yow 21 Bible Online

Yow 21 - Beembe bible

Yow 21

¹Ha mambisa haho, Yesu nde-meene wabweese kumonokono, kuri bayiki ku teke mubu wa Tiberya. Wamonokono bumabu:

²Bobanso baba kibeendu kimosi, Simoni Petelo, na Toma, wubakooteelaa ti Didimo, na Natanahele wa ku Kana mu nkoonsi ya Ngalili, na baala ba Dzebedayi, na bayiki boolo bakaka.

³Simoni Petelo waleele kuri bo ti: «Me nyeensi ku kulebe.» Bo bamuleele ti: «Beetu se tweensi na ye.» Bo bapala na bakoto mu bwaatu. Ngo mu butsuku bubwo, basii baka kitotolo ko.

⁴Mu nkyeelu bwiisi, Yesu wayisa na wateleme ha simu; ngo bayiki baba bahele kuyaaba ti wunde Yesu.

⁵Ngo Yesu waleele kuri bo ti: «Baala ba me, buri luri na mwaa-byandya?» Bo babvutula kuri nde: «Pele!»

⁶Yesu waleele kuri bo: «Tubee siinga mu mpele ya lubakala ya bwaatu, na sa lwabaka.» Haho, bo batuba na baba beki makwa pe ma kunana siinga, bukuri dyaba dyaluula mu bansu.

⁷Ngo muyiki wunde, wuri Yesu waba mutyaanaana waleele kuri Petelo: «Wu Mfumu!» Simoni Petelo bu kayuka ti: «Wu Mfumu», walwaata kinkuta, bukuri waba kimpene, na wadumuka munsa mubu.

⁸Bayiki bakaka baba mu bwaatu bwantele, bayisa mu kunana siinga, bukuri baba bahele la na simu, kampe kibeensi kya bitaki nkama.

⁹Bu basunduka ha nsi, bamono mbaawu ya makeengele ha kibeendu kikyo, na banyoonsi na mpa bateeteke ha yulu.

¹⁰Yesu waleele kuri bo ti: «Twaaleenu banyoonsi balulebiri mpeelulu.»

¹¹Simoni Petelo wanwaata mu bwaatu, na wakoko siinga ha nsi, dyaluula mu nkama makuumi mataanu na bansu batatu babanene. Ngo ti bukuri bansu baba balaka, siinga dyasii kaakika ko.

¹²Yesu waleele kuri bo ti: «Wasee ludya.» Ngo kuri ti mosi ko mu bayiki, watsiitsiri mu kumufuula ti: «Ye na?» Bukuri baba bayaaba ti wu Mfumu.

¹³Yesu wayisa, waholo mpa na wabaha; wabaha se banyoonsi.

¹⁴Lumonokunu lulwo lwaba lwatatu, Yesu kamonokini kuri bayiki, kuri mwaafuluka mu bafwa.

¹⁵Bamanaa kudya, Yesu wafuula kuri Simoni Petelo ti: «Simoni, mwaana Yowane, buri ye bvuriri kutya me ti na bamaba?» Nde wabvutula kuri nde ti: «Heehe Mfumu, ye yaari ti me nyikutiiri». Nde wamuleele ti: «Diisila baala ba bimeeme bya me.»

¹⁶Yesu wabweese kumufuula mbala yadzoolo ti: «Simoni, mwaana Yowane, buri ye tiiri me?» Nde wabvutula kuri nde ti: «Heehe Mfumu, ye yaari ti me nyikutiiri.» Nde wamuleele ti: «Buungula bimeeme bya me.»

¹⁷Nde wabweese kumufuula mbala yatatu ti: «Simoni, mwaana Yowane, buri ye tiiri me?» Petelo wanyoongo mu bukuri wamufuuriri mu mbala yatatu ti: «Buri ye tiiri me?» Nde wamuleele ti: «Mfumu, ye yaari myominso, ye yaari ti me nyikutiiri.» [Yesu] waleele kuri nde ti: «Buungula bimeeme bya me.

¹⁸Ngwanwa mu ngwanwa, me nyikuleele ti: ha waba mwaa-kituuti, ye-meene waba kwekaangaa musweele, na kweyende kunu ku tiiri; ngo mbasi-tsuku, ha wununa, sa naanguna myooko myaaku, na muutu mukimi sa kakukaanga musweele, na kwenata ye kukwo, kuri wahele kutya.»

¹⁹Nde waleele mamo, mu kusoongo mu nkya mfwiilu nde kakeembesele Nzaambi. Bu kamana kudzoonso mamo, waleele kuri nde ti: «Nama me!»

²⁰Petelo bu kasyeeteke, wamono muyiki wuri Yesu waba mutyaanaana, wuri mu kwebanama. Wunde ngo waba wasiingima ha ntulu Yesu mu ntaangu ya kudya, na waba fuula ti: «Mfumu, na wunde wukuyekele?»

²¹Petelo bu kamumono, wafuula kuri Yesu ti: «Mfumu, heki wumawu nki?»

²²Yesu wabvutula kuri nde ti: «Mbuti me ntiiri ti kanamitina kuba natee ku nyikwiisa me, lo ye nki wubakila? Ye ngo wuri, nama me!»

²³Maampu mamo matsamukina ha kakati dya bampaangi ti muyiki wunde kafwa ko. Koomosoko Yesu kasii leele ko ti, nde kafwa ko. Ngo bu kaleeriri ti: «Mbuti me ntiiri ti kanamitina kuba, natee ku nyikwiisa me, lo ye nki wubakila?»

²⁴Muyiki wumawu ngo mbaangi mu mamo, na nde watina mo; beetu tuyaari ti kimbaangi kyaandi kyangwanwa.

²⁵Yesu misamu myalaka kasiiri. Mbuti haba mu kumitina mosi na mosi, nkani me nyitsima ti nsi yansiina yaketi kubaka kibeendu kya kusuusa mikaanda ko.