Read Beembe Yow 3 Bible Online

Yow 3 - Beembe bible

Yow 3

¹Kwaba muutu mosi mu Bafarisi, nkuumbu yaandi Nikodemo, mosi mu bakuutu ba Bayudayo.

²Nde wayisa kumono Yesu mu butsuku, wamuleele ti: «Labi, beetu tuyaari ti ye Muyikisi wafumuna kuri Nzaambi, bukuri, kuri muutu wakuka mu kuyirika bidiimbu bi wuri mu kwesa ye ko, mbuti Nzaambi wahele kintwaari na nde.»

³Yesu wabvutula na waleele kuri nde ti: «Ngwanwa mu ngwanwa, me nyikuleele ti, mbuti muutu wahele kubutuka mbutukulu yamoono, lo kabangusina kumono Kimfumu kya Nzaambi ko»

⁴Nikodemo [nde] waleele kuri nde ti: «Dyaburi muutu katsiitsa kubutuka, habaanaa weki kinuni? Buri lo bweesiri kukoto mu mwooyo nguri yaandi, na kubutuka lwadzoolo?»

⁵Yesu wabvutula ti: «Ngwanwa mu ngwanwa, me nyikuleele ti, mbuti muutu wahele kubutuka mu maampa na mu Mpeeve, lo kabangusina kukoto mu Kimfumu kya Nzaambi ko.

⁶Kyabutuka mu muswinyi lo muswinyi kiri, na kyabutuka mu mpeeve, lo Mpeeve kiri.

⁷Yaa kimuka ko, bukuri me nyikuleeriri ti: "Luyelemini kubutuka mbutukulu yamoono."

⁸Kiteembu kilutaana ku kitiiri, ye wuyukaa lusuku lwaandi, ngo ye wahele kuyaaba ku kifumini, na ku kiri mu kweende. Bunubwo se buri, mu mpisi wabutuka mu Mpeeve.»

⁹Nikodemo wabvutula waleele kuri nde ti: «Mimyo buri butsiitsa kuyirimina?»

¹⁰Yesu wabvutula waleele kuri nde ti: «Ye muyikisi wa Isaheli, na ye wahele kuyaaba mimyo?

¹¹Ngwanwa mu ngwanwa me nyikuleele, beetu kudzoonsolo mu ma tuyaari, na kimbaangi kuta mu ma turi twamono, ngo beenu lwahele kutaambula kimbaangi kya beetu.

¹²Mbuti beenu lwahele kusa kanyi, habaanaa me nyiludzoonsolo mu bitotolo bya ha nsi, dyaburi beenu lusiila kanyi, mbuti me nyekiludzoonsolo mu bitotolo bya ku yulu?

¹³Kuri muutu watoomboko ku yulu ko, mbuti kari wunde wakulumuki mu yulu ko, Mwaana muutu.

¹⁴Ngo bunu bwamanikini Moose nyoko mu nsi yankatu, bunubwo se Mwaana muutu, bayelemini kumumanika,

¹⁵kuri heki, mpisi wumusiila kanyi kabaka kidziingu kyahele manunu.

¹⁶Bukuri bumabu Nzaambi watya nsi, nde waha Mwaana waandi ndemosi, kuri heki, mpisi wunde wumusiila kanyi, kahele kufuuka, ngo kabaka kidziingu kyahele manunu.

¹⁷Mukwongo, Nzaambi wahele kuheeke Mwaana mu nsi, mu kuri ti katsuundisa nsi, ngo mu kuri ti, nsi yiba yabvuukusu kuri nde.

¹⁸Mpisi wusa kanyi mu nde, lo wahele kuba watsuundusu; ngo kasi wuhele kusa kanyi mu nde, lo weki watsuundusu, bukuri nde wahele kusa kanyi mu nkuumbu ya Mwaana Nzaambi ndemosi.

¹⁹Mutsuundu wunde wuri bumabu: buungi bwayisa mu nsi, ngo baatu babvuriri kutya mampimbisi ti na buungi; bukuri biyiriki bya bo byaba byabibi.

²⁰Bukuri, mpisi wunde wuyirikaa mamabi wubelaa buungi, na wahele kwiisa kuri buungi, mu kubata kuri ti biyiriki bya nde biba byayabakana;

²¹ngo kasi wunde wusalilaa ngwanwa wukwiisa kuri buungi, mpisi heki biyiriki bya nde biba byayabakana, bukuri biri byayirumunu mu Nzaambi.»

²²Ha mambisa ma mimyo, Yesu wayende na bayiki baandi ku nsi ya Yudaya, na nde wanamitina kuba kukwo na bo, na waba botokaana.

²³Yowane se waba botokaana baatu ku Ayinone, ku mpele Saleyime bukuri maampa maba malaka kukwo. Baatu babakwiisaana na baba babotokaana.

²⁴Bukuri, Yowane baba bakiri kumusoko pe mu boroko.

²⁵Hango nkalikisi dzabwa ha kakati dya bayiki ba Yowane na Muyudayo mosi, mu ntoono nsyemukunu.

²⁶Bo bayende kuri Yowane na bamuleele ti: «Labi, muutu wabeeri na ye ku simu dya Yolodani, wu wabeeteele ye kimbaangi, mono, wuri mu kubotoko, na bobanso bari mu kweende kuri nde.»

²⁷Yowane wabvutula na waleele ti: «Muutu kari ntaambula kitotolo ti kimosi ko, mbuti yulu dyahele kumuha kyo.

²⁸Beenu-meene lo luteeriri me kimbaangi, mu ma nyabee leele [ti]: "Me nyiri Kiristo ko, ngo me nyiri wunde wu bari baheeke ku mankula ma nde."

²⁹Ngaa-mukasi mulumi; nduku mulumi wuri ha teke nde na wuri mu kumuywiila, wuri na kiminu mu kuyuka mbeembu mulumi. Kikyo ngo kiminu kya me kyaluula

³⁰Bwayelemene ti nde kabuuka, na me nkuluka.»

³¹«Wunde wufumuna ku yulu bvuriri na bobanso. Wunde wuri wa butoto, wa ha butoto kari, na wudzoonsolo mu butoto. Wafumuna ku yulu, [bvuriri na bobanso].

³²Nde wuta kimbaangi, mu ma kari kamono na ma kari kayuka, ngo muutu ti mosi wahele kutaambula kimbaangi kya nde.

³³Wunde wataambula kimbaangi kya nde, wasiingisa ti Nzaambi ngaa-ngwanwa.

³⁴Mukwongo, wunde wuri Nzaambi wamuheeke, wuleelaa Maampu ma Nzaambi, bukuri Nzaambi wamuha Mpeeve kwahele bwa kuteesele.

³⁵Taayi tiiri Mwaana, na wayakisa byobinso mu myooko myaandi.

³⁶Wunde wusa kanyi mu Mwaana wuri na kidziingu kyahele manunu; ngo kasi wubisa kusa kanyi mu Mwaana, kabaka kidziingu ko, ngo kasi nkesi dza Nzaambi dzibwa ha yulu nde.»