Read Beembe Yow 4 Bible Online

Yow 4 - Beembe bible

Yow 4

¹Yesu kayaabana ti Bafarisi bamwaayuka, ti nde bvuriri kubaka bayiki, na kubotoko ti na Yowane,

²ti bukuri kari nde-meene Yesu waba botokaa ko, ngo bayiki baandi,

³nde wayisika ku Yudaya na wabweese kubvutuka ku Ngalili.

⁴Ngo mu kweende, bwaba bwayelemene ti nde kataba Samariya.

⁵Nde watubuka ha bvula dimosi dya ku Samariya diri nkuumbu Sikari, bebele na nseke ya heeri Yakobe kuri mwaana waandi, Yosefi.

⁶Haho haba kitekulu kya Yakobe. Yesu waba mwaaholo bito mu kweyende mu nsi, ha kadzakiri bebele na kitekulu; kyaba kweki kampe kilookolo kya bisaamunu.

⁷Mukyeetu mosi wa ku Samariya wayisa mu kuteke maampa. Yesu waleele kuri nde ti: «Ha me maampa ma kunwa.»

⁸Bayiki baandi, baba bayende kunsa bvula mu kweesuumba byandya.

⁹Mukyeetu wa ku Samariya waleele kuri nde ti: «Dyaburi ye wubaanaa Muyudayo, ye wuloombo maampa ma kunwa kuri me, mukyeetu wa ku Samariya?» Mukwongo, Bayudayo na bari Samariya baba bahele na nyukusunu

¹⁰Yesu wabvutula, wamuleele ti: «Mbuti ye beeyaari kikabu kya Nzaambi, na wunde wuri mu kukuleele ti: Ha me maampa ma kunwa, nkani ye ketyee kumuloombo maampa, na nde ketyee kuha ye maampa ma mwooyo.»

¹¹Wa [mukyeetu] waleele kuri nde ti: «Mfumu, ye wahele na mbiinda ya kutekele maampa, na bulu dyasunda kwalaka, kuri ye wubakila maampa mamwooyo?»

¹²«Buri ye bvuri bukuutu na taayi dya beetu Yakobe? Nde watusisikila bulu dimadi, na nde-meene wanwiini maampa ma bulu di, baala baandi na mpuumbu bibulu byaandi se.»

¹³Yesu wabvutula, wamuleele ti: «Mpisi wunde wunwa maampa mamama, sa kabweese kubaka mpwiisu;

¹⁴ngo kasi wunde wunwa maampa ma nyimuha me, lo kabweese kubaka mpwiisu Maampa ko mu mantaangu momanso; ngo maampa ma nyimuha me, sa makituka mu nde kitekulu kipala maampa ma kidziingu kyahele manunu.»

¹⁵Wa mukyeetu wamuleele ti: «Mfumu, ha me maampa mamo, mpisi me mpele kubweese kubaka mpwiisu, na mpele kubweese kwiisa hamaha mu kuteke.»

¹⁶Yesu waleele kuri nde ti: «Yende, weteele mulumi waaku, na bweese kwiisa hamaha.»

¹⁷Wa Mukyeetu wabvutula, waleele kuri nde ti: «Me nyahele na mulumi.» Yesu wamuleele ti: «Bwabubwe leeriri, ti ye wahele na mulumi;

¹⁸Bukuri balumi bataanu, ye wabeeri na bo, na wu wuri na nde mu lumalu, kari mulumi ye ko. Yiyo ngwanwa ye leeriri.»

¹⁹Wa mukyeetu wabvutula, waleele ti: «Mfumu, me nyimono ti ye mubikiri.

²⁰Bataayi ba beetu baba saambilaana ku yulu mulaandu wu, ngo beenu luleele ti: kibeendu ki bayelemini kusaambila Nzaambi kiri ku Yerusalemi.»

²¹Yesu wamuleele ti: «Mukyeetu, siila me kanyi, ti kilookolo kiri mu kwiisa, kiri beenu, kari ku yulu mulaandu wu ko, bunu pe kari ku Yerusalemi ko, lusaambila Taata.

²²Beenu, lusaambilaana kiri lwahele kuyaaba; ngo beetu tusaambilaana kiri tuyaari, bukuri mvuukulu yafumuna kuri Bayudayo.

²³Ngo kilookolo kiri mu kwiisa, na mu lumalu kimwaatubuka, kiri minsaambiri myangwanwa, sa basaambila Taata mu mpeeve na mu ngwanwa, bukuri minsaambiri mya bubwo, Taata kari mu kusaka.

²⁴Nzaambi ngo Mpeeve, na bamusaambilaana bayelemini kumusaambila mu Mpeeve na mu ngwanwa.»

²⁵Wa mukyeetu wamuleele ti: «Me nyaari ti Mesya wuri mu kwiisa, wunde wu bakooteelaa ti Kiristo. Ngo ntaangu yi kakwiisa nde, lo sa katuyaabisa myominso.»

²⁶Yesu wamuleele ti: «Me nyiri nde, wudzoonso na ye.»

²⁷Bu bari mu kudzoonso mimyo, bayiki baandi batubuka, na bakimuka mu kumono ti Yesu wuri mu kudzoonso na wa mukyeetu; ngo muutu ti mosi kasii kumufuula ko ti: «Nki wuri mu kusaka?» Bunu pe: «Nki luri mu kudzoonso na nde?»

²⁸Wa mukyeetu kasiisa yuku dyaandi, wayende ku bvula, na waleele kuri baatu ti:

²⁹«Waseenu lumono, muutu mosi wuyaabisiri me myominso mi nyiri nyayirika. Kampe wunde ngo Kiristo ko?»

³⁰Bo bapala mu bvula, na bayende kuri nde.

³¹Mu ntaangu yiyo, bayiki bayingukila Yesu, bamuleele ti: «Labi, dya.»

³²Ngo Yesu wabaleele ti: «Me nyiri na byandya bya kudya biri beenu lwahele kuyaaba.»

³³Bayiki bafulusina bo na bo ti: «Buri muutu wumutweesikiryee byandya?»

³⁴Yesu wabaleele ti: «Byandya bya me ngo kuyirika kutya kwa wunde wampeeke, na kuri ti me mana kisalu kyaandi.

³⁵Buri beenu lukooleelaa ko ti: "mangoondo mana masiiri, lo ntaangu ya kutolo bimbutu yitubukiri." Ngo, me nyiluleele ti: Syeetelee miisu, na talee manseke: bimbutu byeki byayele, na byeki byayelemene mu kutolo.

³⁶Mutori bimbutu bakiri mufutu waandi, na kutukisi bimbutu mu ntoono kidziingu kyahele manunu, kuri heki mukuni na mutori bakeembe mu kintwaari.

³⁷Bukuri, nkuma yi yiri yangwanwa: "Wunu wukuna, wakaka wutolo."

³⁸Me nyaluheekiri mu kweetolo bimbutu, mu nseke yiri kari beenu lwasariri ko; bakaka basariri yo, ngo beenu lwakotiri mu kisalu kya bo.»

³⁹Balaka bari Samariya, ba ku bvula didyo, basiiri kanyi mu Yesu, mu ntoono maampu ma wa mukyeetu wateeri kimbaangi ti: «Nde yaabisiryee me momanso ma nyiri nyayirika.»

⁴⁰Hango bari Samariya bu batubuka kuri nde, bamuyingukila mu kunamitina kuba kuri bo, na Yesu wadzakala kuri bo biluumbu byoolo.

⁴¹Baatu balaka, babvuriri basii kanyi mu ntoono ma kabaleelaa nde-meene.

⁴²Bo baleele kuri wa mukyeetu ti: «Beetu twahele kusa kanyi mu mini mi leerirye ye, ngo beetu tusa kanyi bukuri beetu-meene tuyukiryee na tuyaari ti, ngwanwa nde ngo mubvuukisi nsi.»

⁴³Ha mambisa ma biluumbu byoolo bibyo, Yesu wayisika ha bula bubwo, mu kweende ku Ngalili.

⁴⁴Mukwongo, nde-meene Yesu wateeri kimbaangi ti: «Mubikiri bakoomukiinsaa mu nkoonsi ya nde-meene ko.»

⁴⁵Hango, mu ntaangu yi katubukiri ku Ngalili, bari Ngalili bamubwaana, bukuri bo-meene baba bayende ku munkeembu, na bamwiini momanso ma kayirikiri nde ku munkeembu waba ku Yerusalemi.

⁴⁶Nde wabweese kubvutuka ku Kana mu nkoonsi ya Ngalili, ku kakitiri maampa mu malu. Kukwo kwaba kisari bya mbyaasi kimosi, kiri mwaana waba wabeele ku Kafarnawumi.

⁴⁷Nde kayukaana ti Yesu nangukini ku Yudaya, na mwaatubuka ku Ngalili, nde wayende kuri nde, na wamuyingukila mpisi kakulumuka na katsinikisa mwaana nde, bukuri weki mu kufwa.

⁴⁸Yesu wamuleele ti: «Mbuti beenu lwahele kumono bidiimbu na bimaangu, lo beenu lwahele kusiila kanyi!»

⁴⁹Kisari kya mbyaasi waleele kuri nde ti: «Mfumu, kulumuka tekesele mwaana me kafwa.»

⁵⁰Yesu waleele kuri nde ti: «Yende, mwaana waaku wuri mwooyo.» Muutu wunde wasa kanyi mu ma muleeriri Yesu, na wayende.

⁵¹Bu kaba mu kukulumuka, bisari byaandi byayisa mu kumubwaana, na kumuleele ti: «Mwaana ye, wuri mwooyo.»

⁵²Nde wabafuula ti: «Mu nkya kilookolo mwaana katsiinikinyeenu?» Bo bamubvutula ti: «Dzoono, mu kilookolo kyansaamu baawu dyawiiri.»

⁵³Haho taayi dya mwaana kabakula ti mu kilookolo kinikyo Yesu kabee leele kuri nde ti: «Mwaana ye wuri mwooyo. Nde-meene wasa kanyi na nzo yaandi yoyinso.»

⁵⁴Kikyo kyaba kidiimbu kyamoono, kyabyoolo Yesu kayirikiri bu kafumini ku Yudaya, mu kweende ku Ngalili.