Read Beembe Yow 7 Bible Online

Yow 7 - Beembe bible

Yow 7

¹Ha mambisa haho, Yesu waba kwesaa budyeengi mu nsi ya Ngalili; mukwongo, nde waba wahele kutya kusa budyeengi mu nsi ya Yudaya, bukuri Bayudayo baba sakaana kumudzusa.

²Munkeembu Bayudayo wa misaampu, waba weki bele.

³Bampaangi ba Yesu baleele kuri nde ti: «Sisa nkoonsi yi, na yende mu nsi ya Yudaya, mpisi heki bayiki ba ye, bo se bamono biyiriki bi wukwesa ye;

⁴kuri muutu ti mosi ko, wuyirikaa kitotolo mu nsweeki, mbuti tiiri kuba wayabakana kuri bobanso. Mbuti ma bubwo ye wuri mu kweyirika, lo yabakana kuri baatu.»

⁵Mukwongo, bampaangi baandi, baba bahele kusiila kanyi mu nde.

⁶Ngo Yesu waleele kuri bo ti: «Ntaangu ya me yakiri kutubuka pe, ngo kasi ntaangu ya beenu, bunu bu luri na yo.

⁷Nsi lo, yibele beenu ko, ngo kasi me lo yimbele, bukuri me nyiri mu kuta kimbaangi ti, biyiriki byaandi byabibi.

⁸Beenu ngo bari yendee ku munkeembu; me ngo wuri nyitoomboko ku munkeembu wunde ko, bukuri ntaangu ya me yakiri kukuka pe.»

⁹Kamanaa kuleele mamo, nde wanamitina kuba ku Ngalili.

¹⁰Bampaangi baandi bamanaa kutoomboko ku munkeembu, haho nde se katoomboko, kari kuri wumonokono ko, ngo [bunu] ti musweeki.

¹¹Bayudayo babeke kwemusaka munsa munkeembu, na baba leele ti: «Nde kuri kari?»

¹²Baatu baba kwemungutaa kwalaka, mu ntoono nde, kunsa mampuumbu. Bamosi baba leelaa ti: «Nde wamubwe,» bakaka ti: «Nde wuri mu kudziimbisa mpuumbu.»

¹³Kuri muutu ti mosi ko, waba tsiisa kudzoonso mu nde mu bunsaalisi, mu kubata Bayudayo.

¹⁴Munkeembu kabaanaa weki ha kakati, Yesu watoomboko munsa Nzo-nzaambi, na wabeke kuyikisa.

¹⁵Haho Bayudayo bakimuka, na baleele ti: «Dyaburi muutu wumawu, kari kayaabila mimyo myatinu, bunu nde wahele kuyika?»

¹⁶Yesu wabvutula na waleele kuri bo ti: «Nyikusulu dza me dziri dza me-meene ko, ngo dza wunde wampeeke.

¹⁷Mpisi wutiiri kuyirika kutya kwa nde, lo sa kayaaba mbuti nyikusulu dzidzo dza Nzaambi, bunu pe, mu me-meene nyiri mu kwedzoonsolo.

¹⁸Wunde wudzoonsolo mu nde-meene wusaka nkeembu ya nde-meene, ngo kasi wunde wusakaa nkeembu ya wunde wamuheeke, lo wuri wangwanwa, na bubayi bwahele mu nde.

¹⁹Buri Moose kasii luha mangisi ko? Ngo kwahele ti muutu ti mosi mu beenu wuri mu kumasalila. Buri beenu lusaka me kudzusa?»

²⁰Mpuumbu yabvutula ti: «Ye wuri na mpeeve yayibi; na wusaka ye kudzusa?»

²¹Yesu wabvutula na waleele kuri bo ti: «Kiyiriki kimosi me nsiiri, na beenu-banso lukimuka!

²²Mu didyo Moose kari kaluha nteendulu bubakala, ka kuri ko ti ya Moose, ngo ya bataayi, na beenu luteendaa muutu bubakala mu kiluumbu kya mpuumunu.

²³Mbuti muutu wutaambulaa nteendulu bubakala mu kiluumbu kya mpuumunu, mpisi heki mangisi ma Moose, mahele kuba masinunu, dyaburi beenu luri mu kubakila me nkesi, bukuri me nsinikisi muutu, mu kiteesu kyakuka, mu kiluumbu kya mpuumunu?

²⁴Yaa lwetsuundisa bunu buri kinzeri kya muutu ko, ngo tsuundisee mu nsungumunu yasuunguma.»

²⁵Bari Yerusalemi bamosi baba leelaa ti: «Buri wumawu kari wu bari mu kusaka kudzusa ko?

²⁶Mono: nde wuri mu kudzoonso mu bunsaalisi, ngo bahele kumuleele ntoono ti mosi! Ngwanwa kwaandi ti bakuutu bayaari ti wu Kiristo?

²⁷Wumawu, beetu tuyaari ku kafumuni; ngo ha kwiisa Kiristo, kuri muutu ti mosi wuyaaba ku kafumuna ko.»

²⁸Haho, Yesu bu kaba yikisa mu Nzo-nzaambi, wabikisa waleele ti: «Beenu luyaari me, na luyaari ku nyiri nyafumuna; ngo me nyahele kwiisa mu me-meene, ngo wunde wampeeke wuri wangwanwa, na beenu lwahele kumuyaaba.

²⁹Me ngo wuri nyimuyaari, bukuri me nyafumuna kuri nde, na nde wampeeke.»

³⁰Bo baba kwesakaana bwa kumusiimbila, ngo muutu ti mosi kasii kumubelemene ko, bukuri kilookolo kya nde, kyaba kyakiri kutubuka pe.

³¹Kunsa mpuumbu, baatu balaka basii kanyi mu nde na baba leelaa ti: «Mbasi-tsuku ha kwiisa Kiristo, tumi kahele kuyirika bidiimbu bibvuriri bunene na bi mwaayirika wu?»

³²Myaba kwemungutuna baatu kunsa mpuumbu mu ntoono nde, myayukukuna kuri Bafarisi. Bakuutu ba bangaanga-nzaambi na Bafarisi, ha baheeke bayongolo mu kweemukaanga.

³³Yesu ha kaleele ti: «Me nyakiri na beenu mu mwaa-ntaangu yantele, tumi nyeende kuri wunde wampeeke.

³⁴Beenu sa lwasaka me, ngo lo ka ludzuukila [me] ko, na haho ha nyiba me, beenu ka lubangusina kwiisa ko.»

³⁵Hango Bayudayo balelesene bo na bo ti: «Nde kuri kari mu kweende, kuri lo beetu twahele kumumono? Buri, kuri Bayudayo batsamukina mu mansi ma Bahelene ka kweende, na kweeyikisa Bahelene?

³⁶Nki kari mu kuleele mu maampu mamama, ti: Beenu sa lwasaka me, ngo ka ludzuukila [me] ko, na kukwo ku nyiba me, beenu ka lubangusina kwiisa ko?»

³⁷Mu kiluumbu kya mpotulu, kyakinene kya munkeembu, Yesu, bu kateleme, wabikisa waleele ti: «Mbuti muutu wuri na mpwiisu, lo kiisa kuri me na kanwa.

³⁸Bunu buri mu kuleele Matinu: "wunde wusa kanyi mu me, manyari ma maampa ma mwooyo sa matsirimika mu mutima waandi."»

³⁹Nde waleele mamo mu ntoono Mpeeve, yiri babo basiila kanyi mu nde sa bayitaambula. Mukwongo, Mpeeve yaba yakiri yo pe, bukuri Yesu waba wakiri wahele kuba wakeembusu.

⁴⁰Kunsa mpuumbu, babamosi bayukiri maampu mamo, baleele ti: «Ngwanwa muutu wumawu Mubikiri kari!»

⁴¹Bakaka baleele ti: «Wumawu ngo Kiristo.» Bakimi ti: «Buri Kiristo lo fumuni ku Ngalili?»

⁴²Buri, kari Matina bu mari mu kuleele ti: «Mu kaanda dya Davidi, ku bula bwa Beteleemi, kwaba Davidi, Kiristo kakwisikila.»

⁴³Nkabunu yakoto mu mpuumbu, mu ntoono nde.

⁴⁴Babamosi mu bo, baba batiiri kumusiimba, ngo muutu ti mosi kasii kumubelemene ko.

⁴⁵Bayongolo babvutuka kuri bakuutu ba bangaanga-nzaambi na kuri Bafarisi, bamaba baleele kuri bo ti: «Buri luheri kumutwaala?»

⁴⁶Bayongolo babvutula ti: «Kuri muutu ti mosi wumwaadzoonso bunu muutu wunde ko.»

⁴⁷Bafarisi babvutula kuri bo ti: «Buri beenu se lutaambiryee ti baluwuna?

⁴⁸Buri kuri muutu ti mosi mu bakuutu, bunu pe, mu Bafarisi wusiiryee kanyi mu nde?

⁴⁹Ngo mpuumbu baatu yiyo, bu bahele kuyaaba mangisi, bo bari baloko!»

⁵⁰Nikodemo, mosi mu bo, watekisiri kweende kuri Yesu, waleele kuri bo ti:

⁵¹«Buri mangisi ma beetuneenu makoobwiisa muutu, kwahele kutekesele kumuywiila, na kuyaaba ma kayirikiryeenu?»

⁵²Bo babvutula na baleele kuri nde ti: «Buri ye se wa ku Ngalili? Fyongokono na sa mono kuri ti, mubikiri wahele ku kupalila ku Ngalili.» [

⁵³Mpisi muutu wayende ku nzo yaandi.