Read Beembe Yow 8 Bible Online

Yow 8 - Beembe bible

Yow 8

²Mu minkya mya bwiisi, nde wabweese kubvutuka ku Nzo-nzaambi, baatu bobanso bayisa kuri nde, na bu kadzakala, wabeke mu kubayikisa.

³Batini ba mangisi na Bafarisi batwaala mukyeetu mosi wu badzuukiri mu kuta kimpala, bu bamusuusa ha kakati dya baatu,

⁴baleele kuri Yesu ti: «Muyikisi, mukyeetu wu bamudzuukiryee kuri wuri mu kuta kimpala;

⁵mu mangisi, Moose watutuma mu kudzusa ba bu mu matari; heki ye buri leeriri?»

⁶Bo baleele bubwo mu kumutekele mweete, mpisi heki bamufuunda. Ngo Yesu bu kaba wayilima, wabeke kutyalikisa ha nsi mu muleembu.

⁷Babaanaa banamitina mu kumuha bifuuri, nde wateleme, na wabaleele ti: «Wunde wahele na masumu mu beenu, kaba watete mu kumulata tari.»

⁸Nde wabweese kuyilima, na wanamitina kutyalikisa ha nsi.

⁹Bo bu bayuka bubwo, bayende mosi na mosi, kubandikila mu babvuriri bukuutu. Nde wasaala nde mukaka na wa mukyeetu ha kakati.

¹⁰Yesu wabweese kuteleme, na waleele kuri nde ti: «Mukyeetu, bo hari bari? Kwahele muutu ti mosi wukubwiisiri?»

¹¹Wa mukyeetu waleele ti: «Kwahele muutu, Mfumu», Yesu waleele ti: «Me se nyahele kubwiisa ye, ha yende kwaaku, kuholosono lumalu, yaa bweese kusa masumu ko.»]

¹²Haho Yesu wabweese kudzoonso kuri bo waleele ti: «Me ngo buungi bwa nsi, wunde wunama me, kari ndyaatila kunsa mampimbisi ko, ngo sa kabaka buungi bwa kidziingu.»

¹³Ngo Bafarisi baleele kuri nde ti: «Ye kimbaangi kuta mu ye-meene, haho kimbaangi kya ye kiri kyangwanwa.»

¹⁴Yesu wabvutula, waleele kuri bo ti: «Ti ha yuka me nyita kimbaangi mu me-meene, lo kimbaangi kya me kyangwanwa, bukuri me nyaari ku nyiri nyafumuna, na ku nyiri mu kweende, ngo kasi beenu, lwahele kuyaaba ku nyiri nyafumuna me, na ku nyiri mu kweende me.

¹⁵Beenu mu kimuutu luri mu kutsuundisa, me nyahele kutsuundisa muutu.

¹⁶Mbuti heki me nyitsuundisa, lo mutsuundu me, wuri wangwanwa, bukuri me nyahele me mukaka, ngo me beetu na Taata wampeeke.

¹⁷Na mu mangisi ma beenu myatinu ti: Kimbaangi kibaanaa kya baatu boolo lo kyangwanwa.

¹⁸Me nyita kimbaangi mu me-meene, na Taata wampeeke se wuta kimbaangi mu me.»

¹⁹Ngo bo bamuleele ti: «Taayi dya ye wuri kuri?» Yesu wabvutula ti: «Beenu lwahele kuyaaba me, na lwahele kuyaaba se Taayi dya me. Mbuti lubee luyaa me, nkani luketyee kuyaaba se Taayi dya me.»

²⁰Nde waleele maampu mamo, ha kibeendu ki basuusa busina, kuri wuri mu kuyikisa mu Nzo-Nzaambi; ngo muutu ti mosi kasii musiimba ko, bukuri kilookolo kyaandi kyaba kyakiri kutubuka pe.

²¹Yesu wabweese kuleele kuri bo ti: «Me nyiri mu kweende, na beenu sa lwasaka me, beenu sa lwafwiila kunsa masumu meenu; kukwo ku nyikweende me, beenu lubangusina kwiisa ko.»

²²Bayudayo baleele ti: «Buri nyutu keki kweedzusa, bukuri wuleele ti: "Ku nyikweende me, beenu lubangusina kwiisa ko"?»

²³Nde waleele kuri bo ti: «Beenu luri ba ku nsuku, me nyiri wa ku yulu. Beenu luri ba nsi, me nyiri wa nsi yi ko.

²⁴Hango me nyileele kuri beenu ti: Beenu sa lwafwiila kunsa masumu meenu. Mukwongo, mbuti lwahele kusiila kanyi ti "me nyiri", lo sa lwafwiila kunsa masumu meenu.»

²⁵Hango bo baleele kuri nde ti: «Ye na wuri?» Yesu waleele kuri bo ti: «Wunde wu nyiri mu kululeelaana kuholosono kunu mbandukulu.

²⁶Me nyiri na myalaka mya kuleele na mya kutsuundisa mu ntoono beenu; ngo wunde waheeke me wuri wangwanwa, na mamo ma nyiri nyayuka kuri nde, mamo me nyileele kuri nsi.»

²⁷Bo baba bahele kuyaaba ti, Yesu waba badzoonsolo mu ntoono Taayi.

²⁸Hango, Yesu waleele [kuri bo] ti: «Mu ntaangu yiba Mwaana muutu wadzaangusu, haho beenu lwayaaba ti "me nyiri"; na ti mu me-meene nyahele kusaa kitotolo ti kimosi, ngo mamo ma yikisa me Taata, mamo me nyiri mu kweleele.

²⁹Wunde wampeeke, wuri kintwaari na me; nde wahele kusiisa me, me mukaka, bukuri me kooyirikaa ma katiiri nde, mu mantaangu momanso.»

³⁰Nde bu kaleele mamo, baatu balaka basiila kanyi mu nde.

³¹Hango Yesu waleele kuri Bayudayo basiiri kanyi mu nde ti: «Mbuti beenu lunamitini mu maampu maami, lo ngwanwa, beenu luri bayiki ba me;

³²beenu sa lwayaaba ngwanwa, na ngwanwa sa ya luha bunsaalisi.»

³³Bo babvutula kuri nde ti: «Beetu twapalila mu Abalaami, na beetu ka twabeeri mu bunkutu kuri muutu ko. Dyaburi ye wuleele ti: "Beenu sa lwaba mu bunsaalisi"?»

³⁴Yesu wabvutula kuri bo ti: «Ngwanwa mu ngwanwa, me nyiluleele, mpisi wusa masumu, lo nde weki nkutu masumu.

³⁵Nkutu kakoonamitinaa kuba munsa nzo kwakinkulu ko, ngo mwaana wunamitina kuba kwakinkulu mu nzo.

³⁶Mbuti Mwaana wulukuuriri, lo ngwanwa beenu sa lwaba mu bunsaalisi.

³⁷Me nyaari ti beenu lwa palila mu Abalaami, ngo beenu lusaka me kudzusa, bukuri maampu maami mahele mu beenu.

³⁸Ma nyidzoonsolo ma nyiri nyamono kuri Taata, ngo kasi beenu, ma luyirika ma luri lwayuka kuri taayi dyeenu.»

³⁹Bo babvutula baleele kuri nde ti: «Taayi dya beetu, Abalaami.» Ngo Yesu waleele kuri bo ti: «Mbuti beenu lubeeri baala ba Abalaami, nkani beenu luketyee kusa biyiriki bya Abalaami.

⁴⁰Ngo mu lumalu, beenu lusaka me kudzusa, me muutu nyiluleeriri ngwanwa yi nyiri nyayuka kuri Taata. Abalaami kasii yirika, mamo ko.

⁴¹Beenu luri mu kwesa biyiriki, bya taayi dyeenu.» Hango bo baleele kuri nde ti: «Beetu turi baala babutuka kunsa buyala ko, beetu Taayi dimosi turi na dyo, wunu Nzaambi.»

⁴²Yesu waleele kuri bo ti: «Mbuti Nzaambi beeri Taayi dya beenu, nkani beenu luketyee kutya me, bukuri me nyapalila mu Nzaambi, na kuri nde me mfumini, me nyahele kwiisikila mu me-meene, ngo nde wampeeke.

⁴³Bukuri nki beenu lwahele kubakula ma nyiluleele me? Buri beenu luri nzoonsulu me, kubakula pe? Bukuri beenu lwahele kubangisina kuyuka maampu maami.

⁴⁴Taayi dya beenu ngo dyabulu, na beenu kutya kuyirika ma tiiri taayi dyeenu. Kuholosono kunu mbandukulu, nde mudzusi kari, na kasii ba kunsa ngwanwa ko, bukuri ngwanwa yahele mu nde. Habaanaa wudzoonso mya mpya, lo nde kusa bunu wudzoonso myamibwe, bukuri nde ngaa-mpya na taayi dya mpya.

⁴⁵Ngo kasi bukuri me ngwanwa nyileele, lo beenu lwahele kusiila kanyi mu me?

⁴⁶Na mu beenu, wuri lo bwiisiri me mu mana mu ntoono masumu? Mbuti ngwanwa me nyileele, buri luri kusiila pe kanyi mu me?

⁴⁷Wunde wuri wa Nzaambi, wuyukaa Maampu ma Nzaambi; ngo beenu lwahele mu kuyuka, bukuri beenu luri ba Nzaambi ko.»

⁴⁸Bayudayo babvutula, baleele kuri Yesu ti: «Buri beetu twahele na buungu mu kuleele kuri ye ti, ye Musamariya wuri, na ye wuri na mpeeve yayibi?»

⁴⁹Yesu wabvutula ti: «Me nyiri na mpeeve yayibi ko, ngo me nyiri mu kukiinsa Taayi dyaami, na beenu lwahele kukiinsa me.

⁵⁰Me nyahele kusaka nkeembu ya me-meene, kuri wusaka, na wutsuundisa.

⁵¹Ngwanwa mu ngwanwa me nyiluleele: Mbuti muutu kebiri maampu maami, lo nde kamono mfwiilu ya mibvu ngo mibvu ko.»

⁵²Haho Bayudayo baleele kuri nde ti: «Mu lumalu beetu tumwayaaba ti ye wuri na mpeeve yayibi. Abalaami wafwa, babikiri se bafwa, ngo ye wuleele ti: "Mpisi wukebe Maampu, lo nde kamono mfwiilu ko mu mantaangu momanso."

⁵³Buri ye bvuriri bukuutu, na taayi dya beetu Abalaami, wafwiiri? Na babikiri se bafwiiri. Heki, ye na wuri?»

⁵⁴Yesu wabvutula ti: «Mbuti heki me nyikeembese me-meene, lo nkeembu yaami yabuunu. Ngo Taata wuri mu kunkeembese, wu luri mu kuleele beenu ti: "Nzaambi yeetu."

⁵⁵Beenu lwahele kumuyaaba, ngo kasi me nyimuyaari. Na mbuti me ndeeriri ti me nyahele kumuyaaba, lo me nyeki ngaa-mpya, nyafwanikina na beenu. Ngo me nyimuyaari, na nyakebe maampu maandi.

⁵⁶Taayi dya beenu Abalaami wakeembiri mu nsiitu ya kumono kiluumbu kya me; nde wakimono, na wakeembe.»

⁵⁷Bayudayo baleele kuri nde ti: «Wubaanaa ye wakiri ti makuumi mataanu ma mibvu kukukisa pe, ti ye wamwiini Abalaami?»

⁵⁸Yesu waleele kuri bo ti: «Mu ngwanwa mu ngwanwa me nyiluleele, tekesele Abalaami kaba, lo "me nyiri."»

⁵⁹Haho bo banaanguna matari mpisi heki bamulata. Yesu wasweeme na wapala mu Nzo-nzaambi.