Read Beembe Yow 9 Bible Online

Yow 9 - Beembe bible

Yow 9

¹Bu kaba luta mu nzila, Yesu wamono muutu wuri, bu kaba butuka miisu myafwa.

²Bayiki baandi bamufuula baleele ti: «Labi, na wasiiri masumu, muutu wumawu hoti taayi na nguri, kuri heki nde kabutuka na miisu myafwa.»

³Yesu wabvutula ti: «Kari nde ko, kari se taayi na nguri ko, mu kuri ti biyiriki bya Nzaambi biba byamonoko mu nde.

⁴Beetu tuyelemini kusala kisalu kya wunde wampeeke, mwiini bu kakiri; butsuku buri mu kwiisa, kuri muutu ko wubangisina kusala.

⁵Mu ntaangu yiri me nyiri ha nsi, lo me buungi bwa nsi.»

⁶Kamanaa kuleele bubwo, ha kalobiri mante ha nsi, sobiri tamba mu mante, na kiriri tamba mu miisu mya muutu wunde,

⁷ha kamuleeriri ti: «Yende weyoolo mu kidzinga kya Silowa» mbangukulu ti: «waheeku.» Nde wayende, wayoolo, na wabvutuka kuri weki kwemono.

⁸Bakoobaanaa ha teke nde, na bamumwiini hatete kuri wukwesa luloombo, baleele ti: «Kari wumawu wukoobaanaa wadzakala wusa luloombo ko?»

⁹Bakaka baleele ti: «Wumawu nde.» Bakimi ti: «Kari nde ko, ngo wafwanikina na nde.» Ngo nde-meene ha kaleeriri ti: «Wumawu me.»

¹⁰Baleele kuri nde ti: «Dyaburi miisu mya ye myeki myadzibulu?»

¹¹Nde wabvutula ti: «Muutu wuri nkuumbu Yesu, wuri bu kasobiri tamba, kiriri mu miisu mya me, ha kandeeriri ti: "Yende ku Silowa na yoolo." Me bu nyeensi, na bu nyooriri, miisu myeki mono!»

¹²Bo bamufuula ti: «Muutu wunde hari kari?» Nde waleele ti: «Me nyahele kuyaaba.»

¹³Bo banata muutu waba wafwa miisu, wuri mwaatsiinika kuri Bafarisi.

¹⁴Kyaba kiluumbu kya mpuumunu, kiri Yesu kasobaa tamba dzibiri miisu mya muutu wunde.

¹⁵Bafarisi se babweese kumufuula ti, buri kasiiriri kuri ye weki mono. Nde waleele kuri bo ti: «Tamba kakiridyee me mu miisu; na me bu nyooriri, mwiini.»

¹⁶Bafarisi babamosi baleele ti: «Wunde kari muutu wafumuni kuri Nzaambi ko, bukuri nde wahele kubvumina kiluumbu kya mpuumunu.» Ngo kasi bakaka baleele ti: «Muutu wuri na masumu, lo bangusini kuyirika bidiimbu bya bumabu?» Haho nkabunu yakoto mu bo.

¹⁷Bafarisi babweese kuleele kuri muutu wunde ti: «Heki buri leeriri mu nde, bukuri wukudzibiryeenu miisu?» Nde wabvutula ti: «Mubikiri kari.»

¹⁸Bayudayo babisa kusa kanyi mu nde, kuri ti muutu wubee wafwa miisu, weki kwemono, natee batumisa taayi na nguri ba muutu wunde weki kwemono.

¹⁹Bo babafuula baleele ti: «Wumawu mwaana beenu, wu luri mu kuleele ti wabutuka na miisu myafwa? Heki mu lu buri kekimono?»

²⁰Taayi na nguri ba nde babvutula baleele ti: «Di tuyaari beetu diri ti wumawu mwaana beetu, na wabutukiri na miisu myafwa.

²¹Ngo mu lumalu, buri kekimono? Haho ngo hari twahele kuyaaba! Bunu pe ti na wumudzibiryee miisu? Haho se beetu twahele kuyaaba, fuulee nde-meene, nde weki wabuuka, sa kadzoonso nde-meene.»

²²Taayi na nguri baleele mamo, bukuri baba bataana Bayudayo. Mukwongo, Bayudayo, baba bamwaayukusuna ti, mbuti muutu leeriri ti Yesu ngo Kiristo, lo wakupalisa mu nzo-nkutukunu.

²³Hango nkuumbu, taayi na nguri baleeriri ti: «Nde weki wabuuka, fuulee nde-meene!»

²⁴Bafarisi bateele lwadzoolo muutu waba wafwa miisu, na bamuleele ti: «Leele ngwanwa ha busu bwa Nzaambi. Beetu ngo bari tuyaari ti muutu wunde ngaa-masumu kari.»

²⁵Nde wabvutula kuri bo ti: «Mbuti ngaa-masumu kari, lo me nyahele kuyaaba; me di nyaari diri ti, me nyabee nyafwa miisu, ngo mu lumalu nyimono.»

²⁶Bo bamuleele ti: «Nde nki kakusiiryeenu? Dyaburi kasiiryee mu kudzibula miisu mya ye?»

²⁷Nde wabvutula kuri bo ti: «Me mbee mwaaluleele, ngo beenu lwahele kuyuka; bukuri nki beenu lutiiri kubweese kuyuka? Buri beenu se lutiiri kuba bayiki ba nde?»

²⁸Bo bamutukaa na bamuleele ti: «Ye wuri muyiki nde! Nkani beetu, bayiki ba Moose turi.

²⁹Beetu tuyaari ti Nzaambi wadzoonso kuri Moose, ngo wumawu, beetu twahele kuyaaba ku kari kafumina!»

³⁰Muutu wunde wabvutula kuri bo ti: «Diri dya nkimukunu, ti beenu luhele kuyaaba ku kari kafumina, koomosoko nde dzibiryee me miisu!

³¹Beetu tuyaari ti, Nzaambi kakooyukilaa bangaa-masumu ko, ngo mbuti wuri na kinzaambi, na wuyirikaa kutya kwa nde, lo nde wumuywiilaa.

³²Twayukiri mu ntaangu ti mosi ko ti, kuri muutu wudziburyeenu miisu mya wabutuka na miisu myafwa.

³³Mbuti nde beeri wahele wa Nzaambi, lo ka ketyee kusa kitotolo ko.»

³⁴Bo babvutula kuri nde ti: «Habaanaa ye-meene wabutukila kunsa masumu yemunso, lo wuri na mi wuyikisa beetu?» Ha bamutubiri ku mbasi.

³⁵Yesu wayuka ti bamutubiryee ku mbasi, bu kamumono wamufuula ti: «Buri ye wasa kanyi mu Mwaana muutu?»

³⁶Nde wabvutula waleele ti: «Heki nde na kari, Mfumu, kuri heki me nsiila kanyi mu nde?»

³⁷Yesu waleele kuri nde ti: «Ye mwaamumono, na wunde wuri mu kudzoonso na ye, ngo nde.»

³⁸Muutu wunde waleele ti: «Me nsii kanyi Mfumu!» Na nde watsukuma ha busu bwa Yesu.

³⁹Yesu waleele ti: «Mu ntoono mutsuundu me nyiri nyayisa ha nsi yimayi, mpisi heki bahelaa kumono, bamono, na babo bamono, bahele kumono.»

⁴⁰Bafarisi baba kintwaari na nde, bayukaa bubwo, baleele ti: «Buri beetu se miisu myafwa?»

⁴¹Yesu waleele kuri bo ti: «Mbuti beenu lubeeri lwafwa miisu, nkani luketyee kuba na sumu ko; ngo mu lumalu beenu luri mu kuleele ti: "Tukwemono", sumu dya beenu bunu diri.»