Read Beembe Biy 1 Bible Online

Biy 1 - Beembe bible

Biy 1

¹Tehofile, mu mukaanda me watete, me nyatina myominso, mya baandukiri Yesu mu kusala na mu kuyikisa,

²natee mu kiluumbu kiri, kamana kuha, mu Mpeeve Yangisi, ntumu dzaandi, kuri bantumu babo ba kasooriri, nde wanaangunu.

³Nde-meene wamonikini kuri bo, kuri wamwooyo, mu bidiimbu byalaka, ha lumbisa lwa mpasi dzi kamwiini. Mu biluumbu makuumi mana, nde waba kwemonokono kuri bo, na waba kwebadzoonsolo mu mitariri Kimfumu kya Nzaambi.

⁴Bu kaba mu kudya na bo, nde wabadika ti: "Yaa lusasika na Yerusalemi ko, ngo kiingileenu lusiilulu lwa Taata, lu luri lwayuka kuri meenu,

⁵ti: Yowane wabotoko mu maampa, ngo beenu sa balubotoko mu Mpeeve Yangisi, ha lumbisa lwa mwaa biluumbu byantele".

⁶Hango bu baba bakutukuna, bamufuula ti: "Mfumu, buri mu ntaangu yi, ye wudzakisa kimfumu kya Isaheli"?

⁷Yesu wababvutula ti: "Diri dya beenu ko, mu kuyaaba mantaangu bunu pe bilookolo biri Taata wakaanga, mu lutumu lwa nde-meene,

⁸ngo kasi beenu sa lwataambula mpinu dzifuma kuri Mpeeve Yangisi ha yulu beenu, na sa lwaba bambaangi baami mu Yerusalemi, [mu] Yudaya dyodinso, mu Samariya, natee ku nsukulu butoto".

⁹Bu kamana kuleele mamo, nde wanaangunu kuri bo bari mu kutala, na tuti dyamusweeke, ha miisu mya bo.

¹⁰Bu baba mu kutala ku yulu ku kaba kweende, baatu boolo bamonokono kuri bo, mu binkuta byahembeke,

¹¹na baleele kuri bo ti: "Bari Ngalili, mu nki ntoono beenu luri mu kutala ku yulu? Yesu di, wu bayisiri ha kakati dya beenu, weensi ku yulu, bunubwo se mbasi-tsuku kabweese kwiisikila, bunu bu lumumwiini bu kensikiri ku yulu."

¹²Bo babvutuka ku Yerusalemi, kuholosono ku mulaandu wa Mi-olive, wuri bebele na Yerusalemi, kiteesu kiri ha kakati haho, mu mweendu lo ndaambu kilookolo.

¹³Bu bakoto mu bvula, bo batoomboko ku kihekiri kya ku yulu, ku baba na kifu kya kukutukunaa; kwaba Petelo, Yowane, Yakobo, Andere, Filipo, Toma, Bartelemi, Matayi, Yakobo mwaana Alafayi, Simoni mudzeloti na Yuda mwaana Yakobo.

¹⁴Bobanso babo, baba basyaama mu mutima mosi, mu lusaambulu, kintwaari na bakyeetu na Mariya nguri Yesu na bampaangi ba Yesu.

¹⁵Mu biluumbu bibyo, Petelo wateleme ha kakati dya bampaangi. Mpuumbu baatu yaba ha kibeendu kikyo, yaba kampe nkama na makuumi moolo ma baatu. Nde waleele ti:

¹⁶"Bampaangi, bwaba bwayelemene ti mya leeriri Mpeeve Yangisi, mu munwa Davidi, mu ntoono Yuda, wakitukiri munatisi babo, baba kaanga Yesu, mayirima,

¹⁷bukuri nde wabee mosi mu lutaangu lwa beetu, na nde wabakiri kibari kya kisalu kimaki.

¹⁸Hango nde, wasuumbiri nseke mu mufutu wa bubayi; wabwiila kya mutu, wabuuluka mwooyo na midya myaandi myominso myatsamukina;

¹⁹na dyayabakana kuri bobanso badzakala mu Yerusalemi, mu kiteesu kiri baluka nseke yiyo mu ndiinga ya bula bwa bo ti Akeledama, mbangukulu ti "Nseke ya makila."

²⁰Mukwongo, dyaba dyatinu mu mukaanda Mikuunga ti: "Nzo yaandi yiba yayekele, na yaa kuba na muutu wudzakala mu yo ko." Na ti: "Muutu mukimi kaholo kisalu kya nde."

²¹Hango, buri bwayelemene ti, ha kakati dya baatu babee kweyende na beetu, mu mantaangu momanso mari, Mfumu Yesu wabee kweyende ha kakati dya beetu,

²²kubaandika kunu mbotokulu Yowane, natee mu kiluumbu kikyo ki kayisikiri ha kakati dya beetu, mosi mu babo, kaba mbaangi ya mfulukulu yaandi, kintwaari na beetu."

²³Bo batelemese baatu boolo: Yosefi wubateelaa Barsaba, wu baheeri nkuumbu ya kusakana Yusto, na Matya.

²⁴Bu basaambila baleele ti: "Mfumu ye yaari mitima mya baatu bobanso, soongo na mu bo boolo ye sooriri

²⁵mu kuholo kibeendu kya kisalu kya nde kya buntumu, kiri Yuda nde-meene yisukiri, mu kweende kukimi.

²⁶Bo bata wari mu bo, na wari dyabwa ha yulu Matya, na bamukotoso mu mpuumbu ya bantumu kuumi na mosi.