Read Beembe Biy 11 Bible Online

Biy 11 - Beembe bible

Biy 11

¹Bantumu na bampaangi bari ku Yudaya bayuka ti bangooyi se bataamburi maampu ma Nzaambi.

²Ha toombokiri Petelo ku Yerusalemi, bateende bubakala bakalikisa na nde

³baleele ti: "Ye wakotiri mu manzo ma baatu bahele kuteende bubakala na wadiiri kintwaari na bo!"

⁴Haho Petelo, bu kabaandika, wabasoongo bunu bwa yookiri misamu, waleele ti:

⁵"Me nyaba ku bvula dya Yope, kunsa lusaambulu. Na nyabaka mamono-miisu, kitotolo kimosi kyasunduka, bunu nsaanda yayinene, yikwe sunduka mu manto mo mana, yatsingisa mu yulu, yatubuka natee ha nyaba me.

⁶Bu nyaba tala, me nyamono bibulu bya miilu mina bya ha butoto, bya ku bitiiti, banyoko na banoni ba mayulu.

⁷Me nyayuka mbeembu yaleele kuri me ti: "Teleme, Petelo, dzusa na dya.

⁸Ngo me nyaleele ti: "Ka buba ko! Mfumu, bukuri kyasumuka bunu pe kyabviimfuka ti kimosi kyakotiri mu munwa me ko.

⁹Mbeembu, mu lwadzoolo, yayukukuna mu yulu ti: "Bi tsyeemisini Nzaambi, ye yaa hololo byo ti byasumuka

¹⁰Mimyo myamonoko mbala tatu, na byobinso ha byeki kweendaa ku yulu.

¹¹Hanaho baatu batatu bantelemini ku nzo ku twaba; bari Kayisareya babaheekiri kuri me.

¹²Mpeeve yaleele kuri me ti, me nyeende kintwaari na bo, kwahele kusa maket-keti Bampaangi basaamunu, biisiri na me ha, bakoto mu nzo muutu wunde.

¹³Nde watuyaabisa bunu bu kamwiini mbasi yateleme munsa dzo yaandi na yaleele ti: "Heeke baatu ku Yope, na tumisa Simoni wu bateelaa ti Petelo,

¹⁴nde wukuleele maampu, mu mo ye wubvuuka, ye na nzo yaaku yoyinso.

¹⁵Me bu nyabaandika mu kudzoonso, Mpeeve Yangisi yabwa ha yulu bo, bunu bu yabwiiriri beetu kunu mbandukulu.

¹⁶Me nyibaambuka mwooyo mu maampu ma Mfumu, bunu bu kaba leele: "Yowane wabotokiri mu maampa, ngo beenu sa lwaba lwabotoko mu Mpeeve Yangisi

¹⁷Ngo mbuti Nzaambi heeri kuri bo kikabu kyokimosi na beetu twasa kanyi mu Mfumu Yesu Kiristo, lo buri me nyaketi kubangisina kuhaakula Nzaambi?

¹⁸Bo bu bayuka mamo, bawura na badumisa Nzaambi, baleele ti: "Na kuri bangooyi se Nzaambi heeri nyiingulu madyeele ma kidziingu.

¹⁹Hango babo babatsyamikisa mu nwanusunu yanata lufwa lwa Estefano, bayookolo natee ku Foyiniki, ku Kiporo, na ku Antyoke, kwahele kuyikisa maampu kuri muutu, mbuti ka kunu ku Bayudayo.

²⁰Bunu bamosi mu bo, baba bari Kiporo na bari Kirene, bayisiri ku Antyoke bayikisa kuri Bahelene mu nyabusulu Musamu Wamubwete wu Mfumu Yesu.

²¹Kooko kwa Mfumu kwaba na bo, na lutaangu lwa baatu balaka basiiri kanyi na basyeetukiri kuri Mfumu.

²²Musamu wayukukuna mu makutu ma badibuundu bari ku Yerusalemi. Bo baheeke Barnaba mu kuyookolo kukwo natee ku Antyoke.

²³Nde bu katubuka, wamoono bweese bwa Nzaambi, wakeembe na wasyaamisa bobanso mu mutima mosi, mu kukaangama mu Mfumu,

²⁴bukuri nde waba muutu wamubwete, waluula mu Mpeeve Yangisi na mu kanyi. Na mpuumbu yalaka yabweeseme kuri Mfumu.

²⁵Barnaba wayende ku Taraso mu kwesaka Sawulo,

²⁶na bu kamumono, nde wamunata ku Antyoke. Bo balutisa mubvu wamutsiina, mu kukutukunaa mu dibuundu, na mu kuyikisa mpuumbu yalaka. Ku Antyoke, mbala yatete bateele bayiki ti bakiristo.

²⁷Mu biluumbu bibyo babikiri basunduka ku Yerusalemi mu kweende ku Antyoke.

²⁸Angabo, mosi mu bo, bu kateleme, wayaabisa mu Mpeeve ti, sa kwaba nzala yayinene mu nsi yoyinso, na yamonoko mu ntaangu ya Kolodyo.

²⁹Bayiki bakaanga kitsimi, kya kuheeke, bunu buri lubaku lwa muutu-muutu, lubakusu kuri bampaangi badzakala ku nsi ya Yudaya.

³⁰Bubwo se basiiri, baheeke lubakusu kuri bakulu ba babakala mu myooko mya Barnaba bo na Sawulo.