Read Beembe Biy 12 Bible Online

Biy 12 - Beembe bible

Biy 12

¹Mu ntaangu yiyo, mbyaasi Erode wakwaata bamosi mu bari mu dibuundu, mu kubakwaamisa.

²Nde wadzusa Yakobo, mpaangi Yowane, mu mbeesi yayila.

³Bu kamono ti mimyo myaba myamibwe kuri Bayudayo, nde wakaanga kitsimi mu kusa Petelo mu boroko. Byaba biluumbu bya munkeembu wa mampa mahele lufunusu.

⁴Nde wamukwaata na wamusoko mu boroko, na wamukebese kuri mampuumbu mana, ma bayongolo bana-bana, watya ti ha mambisa ma munkeembu wa Paaka, nde kamutsuundisa ha busu baatu.

⁵Petelo waba mu boroko, ngo dibuundu dyasaambila Nzaambi mu makwa mu ntoono nde.

⁶Erode watya kutsuundisa Petelo. Mu butsuku bubwo, Petelo wabwa tolo ha kakati dya bayongolo boolo, bamukaanga mu bikonyi bya biseengu; ha mweelu boroko basuusiri bakebi boolo.

⁷Mono, mbasi Mfumu yamonokono na buungi bwaluulusa nzo. Bu kamulata mu lubaansi, wasiimbila Petelo na wamuleele ti: "Teleme mu mawasu", na bikonyi byasonoko mu myooko myaandi.

⁸Mbasi yamuleele ti: "Lwaata musweele waaku, na masaapatu maaku, nde wasa bubwo; mbasi yabweese kuleele kuri nde ti: "Teeteke kiyuungu kyaaku na nama me."

⁹Petelo bu kapala, wamunama wahele kuyaaba ti mari mu kweyirika mbasi mangwanwa; nde waba kutsima ti mamono-miisu kari mu kumono.

¹⁰Bu bataba kihekiri kyatete na kyabyoolo kya bakebi, batubuka ha mweelu wa biseengu wa kweende kunsa bvula. Mweelu nde-meene dzibumini mu bo, bu bapala, banamitina kweende mu nzila yomosi, na hanaho, mbasi yasasika na Petelo.

¹¹Petelo bu kabvutuka mu nde-meene, waleele ti: "Mu lumalu, me nyaari mu ngwanwa ti Mfumu heekirye mbasi yaandi, mu kutaandala me mu myooko mya Erode, na mu bubi bu bee bwataasila baatu ba Bayudayo."

¹²Bu kamana kubakula, nde wayende ku nzo Mariya, nguri Yowane, Yowane wuri nkuumbu se Malako, kwaba kwa kutukuna baatu balaka na ku baba saambilaana.

¹³Bu kakomboto ha mweelu, kisari kya mukyeetu kiri nkuumbu Lode, kyakokosolo mu kuywiila,

¹⁴nde wayaabula ti yiyo mbeembu Petelo; mu kiminu, nde wahele kudzibula mweelu, wabvutuka munsa nzo, mu kweyaabisa ti wukombotiri Petelo.

¹⁵Bo baleele kuri nde ti: "Ye wa lawuka." Nde wasika ti ngwanwa nde. Bo baleele ti: "Ngo lo mbasi yaandi."

¹⁶Petelo wanamitina mu kukomboto. Bu badzibula, bamumono na bapamuka.

¹⁷Nde wabawurisa mu naangukunu kooko, nde wayaabisa [kuri bo], dyaburi Mfumu kamupalisiri mu boroko, na waleele ti: "Yaabisee kuri Yakobo na bampaangi mamama. Bu kapala, wayende ku kibeendu kikimi.

¹⁸Bwiisi bu bwakya, kisaangila kyabwa ha kakati dya bayongolo, bakwefulusina ti: "Bee Petelo, na keki.

¹⁹Erode waloombo ti bamunatina Petelo, ngo bahele kumumono. Bafuula bakebi na waha lutumu mpisi baba dzusa. Bu kasunduka ku Yudaya, wayende ku Kayisareya na wadzakala kukwo.

²⁰Erode waba na nkesi dzamakwa mu baatu ba ku Tiro na bari ku Sidoni. Mu nyukusunu mosi, bo baba haho ha busu bwa nde. Bu bayukusa Balasto, kisari kya mbyaasi mu mitariri kihekiri kya tolo, baloombo kiyeengi, bukuri mansi ma bo maba taambulaa byalaka mu nsi Erode.

²¹Mu kiluumbu kya nyukusunu, Erode waba walwaata binkuta bya bumbyaasi [na] wadzakala ha yulu kibala kya mutsuundu, wuri mu kubadzoonsolo.

²²Baatu babikisa ti: "Mbeembu yiyo mbeembu Nzaambi nkani ka ya muutu ko!"

²³Hanaho mbasi Mfumu yamulata, bukuri nde kasii ha nkeembu kuri Nzaambi ko; na mitaka bu myamudya, nde wafwa.

²⁴Hango maampu ma Nzaambi maba kweyukuna kwalaka na kwefununa.

²⁵Barnaba bo na Sawulo haba bvutuka ku Yerusalemi, bamana kusa kisalu, ha banata Yowane wu bateelaana ti Malako.