Read Beembe Biy 13 Bible Online

Biy 13 - Beembe bible

Biy 13

¹Mu dibuundu dyaba ku Antyoke, kwaba babikiri na bayikisi: Barnaba, Simehoni wu baba teelaana ti Ningere, Lukyo wa ku Kirene, Manahene wunde wabuukiri ha kimosi na Erode mfumu mankoonsi mana, na Sawulo.

²Bu baba mu kusaambila Mfumu, na baba bakoto loomi, Mpeeve Yangisi yabaleele bumabu ti: "Nsuusuleenu ha luteke Barnaba na Sawulo mu ntoono kisalu ki nyabateeriri mbila.

³Haho, bu bakoto loomi, bo ba saambila na babatetekele myooko, na ha babasindika.

⁴Mpeeve Yangisi bu kabasindika, bo basunduka ku Selekeya, haho bayende ku nsi ya Kiporo.

⁵Bu batubuka ku Salami, bo bayaabisa maampu ma Nzaambi munsa manzo ma nkutukunu ma Bayudayo. Yowane waba na bo bunu mubakisi.

⁶Bu bataba kibuma kyokinso natee ku Pafo, bo bamono Muyudayo mosi ngaa-mpaanu, mubikiri wampya nkuumbu yaandi Baryesu.

⁷Nde waba kintwaari na ngoforo Serengyo Pawulo, muutu wa madyeele. Nde watumisa Barnaba na Sawulo mu nzala kuyuka kwa ngwanwa maampu ma Nzaambi.

⁸Elima ngaa-mpaanu, bubwo babangulaa nkuumbu yaandi, wasaka kuwumuna ngoforo yiyo la na kanyi.

⁹Hango Sawulo wu bateelaana ti Pawulo, waluula mu Mpeeve Yangisi, wamupana kisoosi

¹⁰waleele ti: "Ho ye waluula mu mawunu na mu kwiibi, mwaana dyabulu, mutaatu nsungumunu, buri ye wuhoto ko mu kwetengemese ma nzila [ma] Mfumu masuunguma?

¹¹Na mono, mu lumalu, koko kwa Mfumu kweki ha yulu ye, na ye sa fwa miisu, wubweese kumono ntaangu ko mu mwaa-kilookolo. Na hanaho mubuungi na mampimbisi mamubwiila, wadyeengele na wasaka bamunata.

¹²Hango ngoforo, bu kamwiini myayirimini, wasa kanyi mu nyikusulu dza Mfumu.

¹³Bu bayende ku Pafo, Pawulo na banduku baandi batubuka ku Perenge, dya ku Pamfilya, Yowane bu kabasisa, wabvutuka ku Yerusalemi

¹⁴Basisaa Perenge, batubuka ku Antyoke dya ku Pisidya. Bu bakoto munsa nzo ya nkutukunu, mu kiluumbu kya mpuumunu ha badzakala.

¹⁵Ha mambisa ma ntaangulu mangisi na babikiri, bamfumu ba nzo-nkutukunu baleele kuri bo ti: "Bampaangi, mbuti luri na dyaambu dya mboondulu dya kudzoonsolo kuri baatu, lo dzoonsee kweenu."

¹⁶Pawulo, bu kateleme na bu kanaanguna koko, waleele ti: "Baatu ba Isaheli na beenu lubvuminaa Nzaambi, yukeenu!

¹⁷Nzaambi ya kaanda dya Isaheli wasooriri ba taayi beetu, na wafunisa kaanda didyo, mu ntaangu yi badzakala ku nsi ya Ngipiti; na mu kwa dya kooko kwaandi, nde wabapalisa mu yo,

¹⁸na wabakuunda mu mibvu kampe makuumi mana mu nsi yankatu.

¹⁹Bu katsyaamuna makaanda nsaamu ma mu nsi ya Kanana, nde wabaha nsi bo yiyo bunu saala.

²⁰Kampe mu nkama na makuumi mataanu ma mibvu. Ha mambisa haho, nde wabaha balarimi natee mu mubikiri Samweli.

²¹Kuholosono haho, bo baloombo mbyaasi, na Nzaambi wabaha Sawuli, mwaana Kise, muutu wa mu kaanda dya Benyamini, wadzakiri mu mibvu makuumi mana,

²²bu kamuyekele, watelemese Davidi, mbyaasi kuri bo, kuri nde kari kaleele mu kimbaangi ki kari kata ti: "Me ndzuukiryee Davidi, mwaana Yesayi, muutu wuri bunu bu ntiiri mu mutima waami, wuyirika momanso ma ntiiri.

²³Mu kaanda dya nde, bunu buri nsiilulu dzaandi, Nzaambi kari kapalisa Mubvuukisi Isaheli, Yesu.

²⁴Yowane wayaabisa, tekesele nyisulu yaandi, mbotokulu ya nyiingula madyeele, kuri kaanda dyodinso dya Isaheli.

²⁵Yowane bu kaba mu kumana kisalu kyaandi, waleele ti: "Beenu na lutsimini ti me nyiri". Pele me nyiri nde ko! Ngo mono kukwiisa muutu ku mambisa ma me, wunde wuri, me nyahele kukuka mu kunyanguna misiinga mya masaapatu ma nde.

²⁶Bampaangi baami, baala ba kitsuubu kya Abalaami, na babo bari ha kakati dya beenu babvumunaa Nzaambi, kuri beetu bari baheeke maampu ma mvuukulu.

²⁷Bari ku Yerusalemi na bamfumu ba bo, bamudziimbiri, na bahele kubakula maampu ma babikiri, ma bataangaa mu mpisi kiluumbu kya mpuumunu, ngo bakukisa mo, mu kumudzeengele mukanu wa lufwa.

²⁸Mu kumono, bahele kumubakila kibila mu kumudzeengele mukanu wa lufwa, baloombo kuri Pilato mu kumudzusa.

²⁹Bu bakukisa momanso maba tinini mu nde, bamusundula ha muti, na bamusuusa mu mukala.

³⁰Kasi Nzaambi wamufulukisa mu bafwa.

³¹Nde wamonoko mu biluumbu byalaka kuri babo batoombikiri na nde kuholosono Ngalili natee ku Yerusalemi, na babo bari mu lumalu bambaangi baandi kuri baatu.

³²Na beetu turi mu kuluyaabisa Musamu Wamubwete, na lusiilulu lu kasa kuri bataayi beetu,

³³luri Nzaambi walukukisiri mu baala [ba bo] beetu, mu kufulukisa Yesu, bunu bu diri dyatinu mu mukuunga wa myoolo ti: "Ye ngo Mwaana me, bwalolo me nyi kubutiri."

³⁴Nzaambi wamufulukisi mu bafwa, mu kuri ti nde kahele kubvutuka ku mbolulu, bu kari kaleele: "Me sa nyaluha byangisi bi nyatambukiri Davidi."

³⁵Hango nkuumbu, nde wabweese kutswiikisa mu matinu makaka ti: "Ye ka wutala ko ti waaku wangisi kamono mbolulu."

³⁶Davidi ha mambisa ma kusalila mya tiri Nzaambi, mu ntaangu yaandi, nde wafwa na bamusuusa ha pele bataayi baandi, na nde wamono mbolulu.

³⁷Kasi mu wumawu, Nzaambi wamufulukisa na wahele kumono mbolulu.

³⁸Hango di diba dyayabakana kuri beenu, bampaangi baami, mu nde bayaabisiri beenu mpemusunu masumu [na] na momanso ma lwaheriri kubangisina kusa mu mangisi ma Moose, mu kuba lwalulukusu,

³⁹Mu nde, mpisi musi kanyi lo sa kaba walulukusu.

⁴⁰Hango, kebeenu kweenu, ma leele babikiri yaa malutubukila ko:

⁴¹"Taleenu beenu bangaa-nsanunu, pamukeenu na dziimbileenu! Bukuri me sa nyakukisa kisalu mu biluumbu bya beenu, kisalu kiri beenu lusiila kyo kanyi ko, mbuti muutu wuluyaabisiri kyo!"

⁴²Bu bapala, babaloombo mu kubweese kwiisa kubvutuka, mu biluumbu bya mpuumunu bikimi, mu kubweese kuyikisa munu mu musamu wunde.

⁴³Buundu bu dyatsyamikina, Bayudayo balaka na minsaambiri mya Nzaambi bo, banama Pawulo na Barnaba. Bamaba badzoonso na bo, babayukusa mu kukaangama mu bweese bwa Nzaambi.

⁴⁴Kiluumbu kya mpuumunu kyanama, kampe bvula dyodinso dyakutukuna mu kuyuka maampu ma Mfumu.

⁴⁵Bayudayo, bu bamono mampuumbu ma baatu, baluula mu musoki, basaana na ba beke kunwaanisa ma leele Pawulo.

⁴⁶Kasi Pawulo na Barnaba bu baba baluula mu nsiitu baleele ti: "Kuri beenu baketyee kuyikiseeti maampu ma Nzaambi; ngo mu bukuri beenu luri mu kulooso mo, na lumono mu beenu-meene ti lwahele kukuka mu kidziingu kya mantaangu momanso; mono beetu tusyeetukiri kuri bangooyi.

⁴⁷Bukuri Mfumu watutumini: "Me nyakusuusa mu kuba buungi bwa mansi, na mu kunata mvuukulu natee ku nsukulu butoto."

⁴⁸Bangooyi bu bayuka bubwo, bamono kiminu, badumusa maampu ma Mfumu, na bobanso ba bataasiri kidziingu kya mantaangu momanso, basa kanyi.

⁴⁹Maampu ma Mfumu matsamukusu mu nsi yoyinso.

⁵⁰Kasi Bayudayo basinda minsaambiri mya bakyeetu balukiinsu na bamfumu ba bvula, mu kutsuba nwanusunu mu Pawulo bo na Barnaba, na bababinga natee ku mandilu mabvula.

⁵¹Bamaba bakubula fufunda dya bitaambi bya bo, na bayende ku Ikonyo.

⁵²Bayiki baba baluula mu kiminu na mu Mpeeve Yangisi.