Read Beembe Biy 14 Bible Online

Biy 14 - Beembe bible

Biy 14

¹Bwayirima bumosi ku Ikonyo, Pawulo na Barnaba bakoto mu nzo-nkutukunu ya Bayudayo, na bo badzoonso mu kiteesu kiri mpuumbu yayinene ya Bayudayo na ya Bahelene basa kanyi.

²Ngo kasi Bayudayo, bari basii sa kanyi ko, basinda bangooyi mu kusa bubi kuri bampaangi

³Hango, bo balutisa mwaa-ntaangu yalaka, badzoonsolo mu nsiitu mu Mfumu, wata kimbaangi mu maampu ma bweese bwaandi, na wa baha mpinu mu kuyirika bidiimbu na bimaangu mu myooko mya bo.

⁴Mpuumbu ya bvula yakabuma mu bibari byoolo; bamosi baba mu kibari kya Bayudayo, bakaka mu kya bantumu.

⁵Bukuri kwamonoko kutya kuri bangooyi na kuri Bayudayo kintwaari na bamfumu ba bo, mu kubakwaamisa na mu kubadzusila mu matari,

⁶bo bu bayaaba, bayitika ku mabvula ma Likahonya, Listara, Derbe na mari loonde didyo.

⁷Kukwo bo bayikisa Musamu Wamubwete.

⁸Ku Listara, kwaba muutu mosi waba wabobo miilu, wabeeriri miilu bu kaba wakiri mu mwooyo nguri; nde kaba kweyendaa ko.

⁹Nde wayuka Pawulo mu kunzoonso. Pawulo bu kamutala na bu kamono ti waba na kanyi mu kuba wabvuukusu,

¹⁰waleele mu mbeembu yamakwa ti: "Teleme kwaaku kuri wasuunguma mu miilu mya ye-meene." Nde wadumuka na wadyaata.

¹¹Mampuumbu ma baatu bu bamono ma yirikiri Pawulo, badzaangisa mambeembu ma bo, baleele mu ndiinga ya ku Likahonya ti: "Banzaambi bakitikiri baatu na basundukiri kuri beetu,"

¹²bo bateele Barnaba mu nkuumbu Dzese na Pawulo Ereme, bukuri Pawulo ngo waba mutuburi misamu.

¹³Ngaanga-nzaambi Dzese waba munsa bvula, waholo balumi ba bangoombo ba bayende kweleleke bifulu, na wasuusa ha myeelu mya bvula, kintwaari na mampuumbu, mu kudzusa mu kikabu.

¹⁴Bantumu bu bayuka, Barnaba na Pawulo bakaakala binkuta, babingikila kuri mpuumbu, bafula misaakulu

¹⁵na baleele ti: "Bampaangi, buri lusa mya bu mi? Beetu se turi na bitsimi byobimosi na beenu, beetu turi baatu bunu beenu; Musamu Wamubwete wutuluyaabisiri, ngo mu kubwoongolo myahele mufunu mi, mu kusyeeteke kuri Nzaambi ya mwooyo, wayirika yulu, butoto, mubu na byobinso biri mu byo;

¹⁶nde Nde wuri mu biseendu byaluta, waha miswa kuri makaanda momanso, mu kunama manzila ma bo-meene.

¹⁷Ngo ti hayuku bubwo, mani mamabwe nde ka kooluyirikilaa: ku yulu, wuluhaa bvula, mantaangu ma bikunu bibuta, na wululuulusaa mu byandya na kiminu mu mitima myeenu."

¹⁸Bu kaleele mamo, bamono mpasi mu kukabikisa mampuumbu, mu kuri ti bahele kubayokolo bikabu.

¹⁹Bayudayo bafumini ku Antyoke na ku Ikonyo bu bayisa, bu basinda mampuumbu ma baatu, na bu balata Pawulo mu matari, bo bamukoko ku mbasi bvula, bu batsima ti kampe wafwa.

²⁰Bayiki baandi bu bamudyengekele, nde wateleme, na wakoto ku bvula. Bu bwakya, wapala bo na Barnaba mu kweende ku Derbe.

²¹Bu bamana kuyikisa Musamu Wamubwe kunsa bvula dimadi, na kusa bayiki balaka, bo babvutuka ku Listara, ku Ikonyo na ku Antyoke,

²²bo bakumisa mitima mya bayiki, babasyaamisa mu kunamitina mu kanyi, na kubaleele ti mu nwanusunu dza makwa, tukotoleenu mu Kimfumu kya Nzaambi.

²³Mu mpisi dibuundu, bo basoolo bakulu ba babakala, babasaambikila, na bakoto loomi, bayekele bo kuri Mfumu mu wunde wubari basa kanyi.

²⁴Bu bataba Pisidya, bayisa ku Pamfilya,

²⁵bu bayikisa maampu ku Perenge, bo basunduka ku Atalya.

²⁶Bayisikaa haho, bakoto bwaatu mu kweende ku Antyoke, kukwo ku bataamburi bweese bwa Nzaambi, mu kisalu ki bakukisiri.

²⁷Bu batubuka, bakutukisa dibuundu, bayaabisa momanso ma yirikiri Nzaambi kintwaari na bo, mu kudzibukila bangooyi mweelu wa kanyi.

²⁸Bo balutisa mwaa-mantaangu malaka kukwo kintwaari na bantumu.