Read Beembe Biy 16 Bible Online

Biy 16 - Beembe bible

Biy 16

¹Ha mambisa haho, Pawulo watubuka ku Derbe, tumi ku Listara. Kukwo kwaba muyiki mosi, nkuumbu Timoteho, mwaana mukyeetu wa Muyudayo wuri na kanyi, ngo kasi taayi waba Muhelene.

²Bampaangi ba ku Listara na ba ku Ikonyo baba tanaa kimbaangi kyakibweete mu nde.

³Pawulo waba tiiri kweende na nde. Bu kamuholo, wa muteende bubakala, mu ntoono Bayudayo baba mu loondolo didyo; bukuri bobanso baba bayaari ti taayi dya nde Muhelene kaba.

⁴Mu mabvula ma baba kwelutaana, bo baba kweyikisaana mu kukebe mangisi ma heeri bantumu na bakulu ba babakala bari ku Yerusalemi.

⁵Mabuundu maba kwesyaama mu kanyi na kwefununa mu lutaangu lwa baatu mpisi kiluumbu.

⁶Mpeeve Yangisi bu kabadika kuyaabisa musamu ku Asya, bo bataba nkoonsi ya Firingya na ya Ngalatya.

⁷Bu batubuka bebele na Misya, bo basaka kukoto ku Bitinya ngo kasi Mpeeve Yesu ya bisiri kubaha miswa.

⁸Bu batabaa Misya, bo basuunduka ku Torowasi.

⁹Ngo mu butsuku, Pawulo wabaka mamono-miisu: muutu mosi wa ku Makedonya waba wateleme na waba muyiingikila, na kumuleele ti: "Wasa ku Makedonya, wutubakisa."

¹⁰Hanaho, bu kamono mamo, beetu twasaka mu kweende ku Makedonya, mu nsiitu ti Nzaambi wututeeriri mu kunata Musamu Wamubwete kuri bo se.

¹¹Bu twaholo bwaatu ha Torowasi, twasuunguma na soongo-soongo ku Samotarake, na mu kiluumbu kyanama twayende ku Neyapoli.

¹²Bu twayisika haho, twayende ku Filipo, bvula dyatete dya nkoonsi ya Makedonya, kimvuka kya bari Loma. Beetu twalutisa mwaa-biluumbu ha bvula didyo.

¹³Mu kiluumbu kya mpuumunu, beetu twapala ku mbasi, mu kukweende ku simu dya muwiilu maampa, kukwo twaba tsima ti kuri kibeendu kya lusaambulu. Beetu twadzakala kukwo na twadzoonso kuri bakyeetu baba bakutukini haho.

¹⁴Ngo mukyeetu mosi, nkuumbu Lidya, waba tuywiilaana, nde waba muyariki mansaanda mamabwe mabeenge, waba ku bvula dya Tyatira, nde waba bvuminaa Nzaambi. Mfumu wa dzibula mutima nde, kuri nde kangamini mu mimyo mya ba dzoonsaana Pawulo.

¹⁵Bamanaa kumubotoko, nde na kaanda dyaandi, ha katuyiingukila, na waleele ti: "mbuti beenu lumono ti me nyiri na kanyi mu Mfumu, lo wasee lukoto na ludzakala ku nzo me." Na nde watukwiikisa mu kutaambula.

¹⁶Kiluumbu kimosi bu twaba kweende ku kibeendu kya lusaambulu, kisari kimosi kya mukyeetu kyaba na mpeeve ya mboomo, wayisa kutubwaana. Nde waba bakilaa bamfumu baandi ndaandu yalaka mu mbikukulu dzaandi.

¹⁷Nde wabeke mu kwetunama, Pawulo na beetu, kuri wukwefula misaakulu wukweleele ti:" Baatu bamaba, bisari bya Nzaambi Mwa-Yulu bari, bo bari mu kweluyaabisa nzila ya mvuukulu.

¹⁸Nde wasa bubwo mu biluumbu byalaka. Nduungusu dzibvulilaana, Pawulo wasyeeteke, na waleele kuri mpeeve yiyo ti: "me nyikutumini mu nkuumbu Yesu Kiristo, pala mu nde!" Mu kilookolo kinikyo, mpeeve ya pala.

¹⁹Bamfumu baandi bubamono ti nsiitu mu ndaandu yaaku yi mwaakweende, bo bakaanga Pawulo na Sila na babanata ha kibeendu kya baatu bobanso ha busu bwa bamfumu.

²⁰Na bu babanata kuri batsuundisi ba bari Loma, baleele ti: "Baatu bamaba bari mu kwesa kisaangila kunsa bvula dyeetu. Bo bayudayo,

²¹na bo bari mu kweyikisaa bifu biri beetu twahele na miswa mu ku bitaambula bunu pe mu kubisalila, beetu bari Loma."

²²Mpuumbu baatu yabaka nkesi mu bo. Batsuundisi batuma ti babasyoonono binkuta, na babalata nkwaasulu.

²³Bu bamana kubalata nkwaasulu, babatuba mu boroko na batumisa kuri mukebi boroko mu kubakebe kwakubwe.

²⁴Bu kataambula lutumu lwa bubwo, nde wabasoko kunsa kihekiri kya boroko na wakaanga miilu mya bo mu kidu.

²⁵Mu kakati dya butsuku, Pawulo bo na Sila baba saambilaana na baba yimbilaana mu kudumusa Nzaambi, na baba mu boroko bakaka baba baywiilaana.

²⁶Hanaho, na sisuu butoto bwateembele mu makwa, kuri lufulu lwa nzo boroko lwawa kutsyaamuka, ha nsi na nsi bidzibuku byobinso byawa kudzibuma na bikonyi bya maboroko byobinso byawa kunyanguka.

²⁷Mukebi boroko bu kasiimbuka, nde wamono myeelu mya nzo boroko myadzibulu; bu kanana mbeesi yayila, nde wasaka kudzusa nyutu nde-meene, nde bu kaba tsima ti maboroko ma mwaayitika.

²⁸Pawulo wafula mu mbeembu yayinene, waleele ti: "yasa bubi mu nyutu yaaku ko, bukuri beetu-banso turi haka."

²⁹Mukebi boroko bu kaloombo buungi, nde wabingukila na kinkuuka kyokinso, wabwa ha miilu mya Pawulo bo na Sila.

³⁰Tumi, bu kabanata ku mbasi, nde waleele ti: "Bamfumu, me nki nyelemini kusa mu kuri ti me bvuuka?"

³¹Bo baleele ti: "Siila kanyi mu Mfumu Yesu na ye sa bvuuka, ye na nzo yaaku."

³²Bo bayaabisa maampu ma Mfumu, kuri nde na kuri bobanso baba mu nzo yaandi.

³³Bunu butsuku bubwo, nde wabaholo, waswaaka mamputa ma bo, na hanaho, nde bamubotoko, na baatu baandi bobanso.

³⁴Bu kabanata ku nzo yaandi, nde wabaha byandya ha taabala. Nde wamono kiminu na nzo yaandi yoyinso, bu basiiri kanyi mu Nzaambi.

³⁵Bu bwakya, batsuundisi baheeke bayongolo, mu kuleele kuri mukebi boroko ti: "patala baatu babo."

³⁶Mukebi boroko wayisa kuleele maampu mamo kuri Pawulo ti: "Batsuundisi baheekiri mukeensu ti balupatula haaka na haaka, ngo palee kweenu, yendee mu kiyeengi."

³⁷Kasi Pawulo waleele kuri bo ti: "bo bu batumini ti balata beetu nkwaasulu ha busu bwa baatu, kwahele kututsuundisa, beetu baatu ba ku Loma, na batutubiri mu boroko; mu lumalu bo batiiri kutupatula mu mansweeki? Ngo pele, bo-meene biisa batupatula."

³⁸Bayongolo bayende kutubula misamu mimyo kuri batsuundisi. Bo babaka boomo bayukaa ti bo baatu ba ku Loma bari.

³⁹Bo bayisa, babayiingukila, babapalisa ku mbasi, na babatuma ti bayisika ha bvula didyo.

⁴⁰Bu bapala mu boroko, Pawulo na Sila ba yende ku nzo Lidya, na bu bamono bampaangi, babasyaamisa, tumi ha bayende.