Read Beembe Biy 19 Bible Online

Biy 19 - Beembe bible

Biy 19

¹Ntaangu yaba Apolo ku Korinto, Pawulo wataba mankoonsi ma ku yulu milaandu, mu kweende ku Efeso. Bu kabwaana bayiki bamosi,

²wabaleele ti: "Buri beenu lwataambiri Mpeeve Yangisi ha lwasii kanyi?" Bo babvutula ti: "Beetu twahele kuyuka ti, kuri badzoonsolo ti, Mpeeve Yangisi yiri."

³Pawulo wabafuula ti: "Nkya mbotokulu beenu luri lwataambula?" Bo babvutula ti: "Mbotokulu ya Yowane."

⁴Pawulo waleele ti: "Yowane wasalila mbotokulu ya nyiingula madyeele, waleele kuri baatu, mpisi heki baatu basa kanyi, mu wunde wukwiisa ha mambisa ma nde, mbangukulu Yesu."

⁵Bamanaa kuyuka mamo, bataambula mbotokulu mu nkuumbu Mfumu Yesu.

⁶Pawulo bu kabatetekele myooko, Mpeeve Yangisi yayisa ha yulu bo, bo badzoonso mandiinga na babikula.

⁷Baatu baba kampe kuumi na boolo.

⁸Bu kakoto mu nzo-nkutukunu, nde wayikisa mu bunsaalisi, mu mangoondo matatu, nde waba dzoonsaana na waba yukusaana mu mitariri Kimfumu kya Nzaambi.

⁹Bukuri bamosi baba kubisaa mitima na baba bisaa kusa kanyi, bo badzoonsolo bwabubi mu nzila, ha busu bwa mpuumbu, nde wabasiisa, Ngo mpisi kiluumbu nde waba holaana bayiki kintwaari na nde, wabayoloso mu nzo nyikulu ya muutu mosi wuri nkuumbu Tirano.

¹⁰Mimyo myayirima, mu mibvu myoolo, kuri bobanso badzakalaana ku Asya, Bayudayo na Bahelene, bayuka maampu ma Mfumu.

¹¹Nzaambi waba yirika bimaangu bya nkimukunu mu myooko mya Pawulo,

¹²kuri lo babumusa mu babeeru, mansaanda bunu pe biteendi bi babumusinyee mu nyutu nde, mabeeru matsiinika na mampeeve mamabi mapala.

¹³Bayudayo babamosi bakookwepalisaa mampeeve baba kweyendaa mu mabula, bo se batsiitsa mu kusalila nkuumbu Yesu ha yulu baatu baba na mampeeve mamabi, baleele ti: "Me nyiloombo kuri beenu, mu nkuumbu ya Yesu wuri Pawulo wuri mu kweyikisa!"

¹⁴Bo baba baala nsaamu ba Keva, mukuutu bangaanga-nzaambi, Muyudayo, baba kwesalila bubwo.

¹⁵Mpeeve yayibi yaha mvutu, yabaleele ti: "Me nyaari Yesu, na me nyaari se Pawulo, heki beenu ba na luri?"

¹⁶Bu kabasungumina, muutu waba na mpeeve yayibi wababwiisikila kikiindu, wabvula kwa na bo, mu kiteesu kiri, bu baba pala mu nzo yiyo, mu ntiinu, mpene na balemene.

¹⁷Mimyo mya yabakana kuri Bayudayo bobanso na Bahelene, badzakalaana ku Efeso na boomo bwabwiila ha yulu bobanso, na badzaangisa nkuumbu Mfumu Yesu.

¹⁸Balaka mu babo basii kanyi, batambukila na bayaabisa nsalulu yaaku.

¹⁹Balaka mu baba salilaa mu mpiitunu, bakutukisa mikaanda, bayoko myo ha busu bwa baatu, bu batangumisa ntalu, kampe mafuunda mataanu ma mboongo.

²⁰Bunubwo, bunu buri makwa ma Mfumu, maampu maba kweyalamika na mamonoko na makwa.

²¹Mamo bu mayirima, Pawulo wabaka kitsimi mu kutaba Makedonya na Akaya mu kweende ku Yerusalemi. Nde waleele: "Bu nyiyisika kukwo, bwayelemene ti me mono Loma."

²²Nde waheeke ku Makedonya boolo mu bisari byaandi, Timoteho na Erasto, mu ntaangu yi kabakiingila ku Asya.

²³Mu ntaangu yiniyo, kwayirimini kisaangila kya makwa mu ntoono nzila.

²⁴Muyiriki miluungu mosi, nkuumbu yaandi Demeteryo, waba yirikaana biteki bya woolo mu kifwaani kya manzo-nzaambi ma Artemi, na wabahaanaa ndaandu yalaka kuri baba salila byo.

²⁵Nde wakutukisa ba bari kisalu kimosi kintwaari na nde, waleele ti: "Banduku baami, beenu luyaari ti kisalu ki ngo busina bwa beetuneenu,

²⁶lutala na luyuka ti ka kunu ku Efeso ko, ngo kampe mu Asya dyodinso, Pawulo, wayukusa baatu, na mpuumbu yalaka yahoomboko kuri nde, wukweleele ti, banzaambi bayiriku mu myooko mya baatu, bari banzaambi ko.

²⁷Kari kini kisalu kya beetu kinyaafuka ko, ngo se nzo-nzaambi ya Aretemi, nzaambi yayinene, yiba yabwoongolo, nzaambi yi bari mu kwesaambila mu nkoonsi yoyinso ya Asya na mu nsi yansiina!"

²⁸Bu bayuka bubwo, bo baluula mu nkesi, bafula misaakulu, baleele ti: "Wadzaangama, Aretemi wa bari Efeso!"

²⁹Bvula dyodinso dyaluula mu kisaangila, bakwaata Ngayo na Aristarako wa ku Makedonya, bambaasi ba Pawulo, babanata mu kitsimi kimosi ku nzo bimpa.

³⁰Pawulo waba tiiri kukoto kunsa mpuumbu yiyo, kasi bayiki bamudika.

³¹Bamosi mu bambaasi baandi ba ku Asya se, bamuyingukila mu kuhele kweende nde-meene ku nzo bimpa.

³²Kisaangila kyakinene kyakoto kunsa buundu, babamosi babikisa mi, bakaka kubikisa mikimi; na balaka mu bo baba bahele kuyaaba mu nki ntoono baba bari bakutukina.

³³Munsa mpuumbu baatu bayaabisa kuri Alekandere, wuri Bayudayo basuusa ha mankula. Alekandere bu kanaanguna koko watya kukalila nyutu ha busu bwa baatu.

³⁴Bu bayaaba ti nde Muyudayo, bobanso bafula mu mbeembu mosi kampe mu bilookolo byoolo: "Wadzaangama, Aretemi wa bari Efeso!"

³⁵Mutini wa bvula wadzuunisa mpuumbu waleele ti: "Baatu ba ku Efeso, nani mu baatu dziimbiri ti bvula dya Efeso ngo mukebi nzo nzaambi ya wadzaangama Aretemi na kiteki kwafumini ku yulu?

³⁶Mimyo myahele na bwa kutununa, beenu luyelemini kuba badzuuna, yaa lubingukila kusa kitotolo ti kimosi ko.

³⁷Beenu lutweesi baatu bamaba hamaha. Bo bari bangaa-kwiibi ko, bunu pe basaani ba Nzaambi yeetu ko.

³⁸Hango, mbuti Demeteryo na bisari bya miluungu biri kintwaari na nde, bari na kooti mu muutu, lo kuri biluumbu bya miyalu na banzoonsi se na bo, lo be bafundusuna bo na bo.

³⁹Na mbuti luri na kitotolo kikimi ha yulu, lo buundu dikootala misamu sa dyaha mvutu.

⁴⁰Bukuri bee batuhoriri bunu bangaa-ntungu mu mya lolo. Bukuri kwahele ntoono ti yimosi yisoongo bunu buyirimini buundu dya bangaa-tungu dimadi. Kaleelaa mimyo nde tsyaamini buundu.