Read Beembe Biy 2 Bible Online

Biy 2 - Beembe bible

Biy 2

¹Kiluumbu kya Pantekote bu kyayisa, bobanso baba bakutukuna ha kibeendu kyokimosi.

²Na sisuu, kwayisa lusuku lwafumuna ku yulu, bunu kiteembu kyamakwa, kyalulusa nzo yoyinso, yi baba badzakala.

³Milaka miri bunu mya mbaawu, myamonoko kuri bo, myakabama na myasunduka ha yulu mosi mosi mu bo.

⁴Bobanso baluula mu Mpeeve Yangisi, na bo babaandika mu kudzoonso mu mandiinga makaka, bunu bwa baheeriri Mpeeve mu kudzoonso.

⁵Ku Yerusalemi kwaba dzakalaana Bayudayo bari na kinzaambi kyamakwa, bafumuni mu makaanda momanso mari ha butoto.

⁶Lusuku lulwo bu lwayukukina, mpuumbu baatu yakutukina, na yakimuka, bukuri muutu-muutu waba yukaana bo, badzoonso mu ndiinga bula.

⁷Bo bapamuka na bakimuka, baleele ti: "Buri bobanso ba, kari bari Ngalili bari mu kudzoonso ko?

⁸Ngo buri muutu-muutu mu beetu, kari mu kuyuka badzoonsolo mu ndiinga bula?

⁹Kuri bari Paroto, bari Medo, bari Elamite, na badzakala ku Mesopotamya, ku Yudaya, ku Kapadokya, ku Ponto, ku Asya,

¹⁰ku Firingya, ku Pamfilya, ku Ngipiti na bari mu mankoonsi ma Libya, ma ku Kirene na bari Loma.

¹¹Bayudayo, na baatu bakimi, bakoto mu Nzaambi bo, bari Kerese na bari Arabya, beetu tuyuka bo, badzoonso mu mandiinga ma beetu, myabweeye mya Nzaambi.

¹²Bobanso bapamuka na madyeele mabawa; balelesene bo na bo ti: "Sa bi nki?"

¹³Bakaka basaana, baleele ti: "Malu maaku bari mu kwekolo."

¹⁴Petelo, bu kateleme kintwaari na bo kuumi na mosi, watoombolo mbeembu yaandi, waleele kuri bo ti: "Bari Yudaya, na badzakala mu Yerusalemi beenu bobanso, dimadi dyayelemene kuba dyayabakana kuri beenu, kebeenu maampu ma me.

¹⁵Pele, ka ma luri mu kutsima beenu ko, ti bamaba bakolo malu, bukuri twakiri mu kilookolo kyabitatu.

¹⁶Mamama ma leeriri mubikiri Yoweli:

¹⁷"Mu biluumbu bya manunu, bwa leeriri Nzaambi, me sa nyatsaamuna Mpeeve yaami ha yulu muutu-muutu, na baala beenu ba babakalala, na baba bakyeetu sa babikula, bituuti sa bamono mamono-miisu, na binuni byeenu sa balooto mandosi.

¹⁸Na ha yulu bisari byaami se, bya babakala na bya bakyeetu, mu biluumbu bibyo, me sa nyatsaamuna Mpeeve yaami, na bo sa babikula.

¹⁹Me sa nyayirika bimaangu ku yulu, na bidiimbu ha butoto: sa kwaba makila, mbaawu na matuti ma mwiisi.

²⁰Ntaangu sa yakituka mampimbisi, ngoondo sa yakituka makila, tekesele kiluumbu kyakinene na kyansisi kya Mfumu ki kwiisa.

²¹Haho, mpisi wunde wuteele nkuumbu Mfumu, sa kaba wabvuukusu."

²²"Bari Isaheli, yukeenu maampu mamama: Yesu wa ku Nadzareti, Nzaambi wamusooriri mu kuyirika bimaangu, mya nkimukunu na bidiimbu mu ntoono beenu. Nzaambi wayirika byo mu nde ha kakati dya beetu, bunu bu luyaari beenu-meene

²³Muutu wunde, bunu bwaba nzeengulu na nyaabulu ya Nzaambi, wayekulu mu myooko mya bahele na mangisi, bamudzusa mu kumukomono ha kuruwa.

²⁴Nde Nzaambi kari kafulukisa, mu kumukuula mu myaangala mya lufwa, bukuri bwaketi kuba ko ti, lufwa lumukwaata.

²⁵Mukwongo, Davidi waleele mu ntoono nde ti: "Mu mpisi ntaangu, me nyaba monaana Mfumu ha busu bwa me, bukuri nde wuri ha lubakala lwa me, mpisi me mpele kubwa,

²⁶mu ntoono yiyo, mutima waami wuri mu kumono kiminu, ludima lwaami lukeembe, na nyutu yaami sa yawuuma ha yulu nsiitu,

²⁷bukuri ye wuri nyekele kiluunsi kya me, ku nsi ya bafwa ko, ye ka wutala ko ti wangisi waaku kamono mbolulu.

²⁸Ye wayaabisiri kuri meenu manzila ma bumwooyo, ye Nzaambi sa luulusa me mu kiminu."

²⁹"Bampaangi, bu nyiri na miswa, mya kudzoonsolo mu nsiitu, ha busu bwa beenu, mu ntoono Davidi mwa-nkaanka, ti nde se wafwa na wadziiku, na mukala waandi wuri ha kakati dya beetu, natee kiluumbu ki.

³⁰Hango, nde waba mubikiri, na Nzaambi walabiri maalu kuri nde ti, mosi mu bilesi bya ye, sa kadzakala ha mboloko yaaku.

³¹Bu katekesele kumono, wadzoonso mu ntoono mfulukulu Kiristo ti: "Nde basii muyekele ku nsi ya bafwa ko, na nyutu yaandi yasii mono mbolulu ko."

³²Yesu didyo, Nzaambi wamufulukisa mu bafwa, na beetu bobanso turi bambaangi ba myo.

³³Nde wadzaangusu ha lubakala lwa Nzaambi, bu kataambula kuri Taayi, lusiilulu lwa Mpeeve Yangisi yi kari kanyaka, mamo beenu [se] luri mu kumono na kuyuka.

³⁴Mukwongo, Davidi wahele kunwaata ku mayulu; ngo nde waleele nde-meene ti: "Mfumu Nzaambi waleele kuri Mfumu yaami ti: dzakala ha lubakala lwaami,

³⁵natee me nsiiri bataatu baaku nkata-miilu myaaku."

³⁶Hango, nzo yoyinso ya Isaheli yiyelemene kuyaaba kwa ngwanwa ti: Nzaambi wasa Yesu wu lwakomini beenu, Mfumu na Kiristo!"

³⁷Bu bamana kuyuka mamo, bo bamono mpasi mu mitima, na baleele kuri Petelo na kuri bantumu bakaka ti: "Bampaangi, beetu buri tuyelemini kusa?"

³⁸Petelo waleele kuri bo ti: "Yiingeenu madyeele [bubwo kaleeriri] na mosi-mosi mu beenu kataambula mbotokulu mu nkuumbu ya Yesu Kiristo, mu mpemusunu ya masumu ma beenu, tumi lutaambula kikabu kya Mpeeve Yangisi.

³⁹Mukwongo, lusiilulu basa lwo kuri beenu, kuri baala beenu, na kuri bobanso bari la, bobanso bari Mfumu Nzaambi yeetu wabateele mbila."

⁴⁰Mu maampu makimi malaka, nde watswiikisa na wabasyaamisa, waleele ti: "Bvuukeenu kweenu mu kiseendu kyakibi ki!"

⁴¹Hango, bo bu bataambula maampu maandi, bababotoko, na mu kiluumbu kikyo, kampe mafuunda matatu ma baatu mayikimini.

⁴²Bobanso basyaama mu nyikusulu dza bantumu, mu kintwaari, mu mbukununu mpa na mu nsaambulu.

⁴³Mpisi nde watubuka mu kiteesu kya kuba na kibvumi; bantumu bayirika bimaangu na bidiimbu byalaka.

⁴⁴Bobanso basiiri kanyi, baba kibeendu kimosi, na byobinso byaba byantwaari,

⁴⁵baba yarikaana lubaku na bitotolo byaaku, na baba kabulaana mboongo kuri bobanso, bunu bwaba manzala ma mpisi muutu.

⁴⁶Mpisi kiluumbu, baba namitinaana kuba mu kintwaari mu Nzo-nzaambi, mu kubukuna mpa, na kukabula byandya ku nzo,

⁴⁷badumusa Nzaambi na bataambula mabweese kuri makaanda momanso. Mfumu waba bweesaana mpisi kiluumbu, lutaangu lwa baatu babvuuku mu kintwaari.