Read Beembe Biy 22 Bible Online

Biy 22 - Beembe bible

Biy 22

¹"Bampaangi na bataata, yukee ma nyileele me mu kukalila nyutu yaami."

²Bo bu bayuka wuri mu kubadzoonsolo mu ndiinga ya kihebeleho, bahaamisa na kuwura. Nde waleele ti:

³"Me Muyudayo, nyabutuka ku Taraso, mu nkoonsi ya Kilikya. Me nyabuukula ha bvula dimadi, nyayika ha miilu mya Ngamalyele, bunu buyelemini mu kubvumina mangisi ma bakuutu. Me nyaba na kuheme mu Nzaambi, bunu bu luri beenu lolo dimadi.

⁴Me nyakwaamisa natee mu kiteesu kya kudzusa, babo bakwenama nzila yimayi, na nyasoko bakyeetu na babakala mu boroko.

⁵Mukuutu bangaanga-nzaambi, na kikuutu kyokinso, kya bakulu ba babakala lo bateeri kimbaangi. Me kuri bo nyataamburi mikaanda mu ntoono bampaangi bari ku Damasiko, na me nyayende kukwo, mu kwebakaanga na kubatwaala ku Yerusalemi mpisi baba seembe.

⁶«Bu nyaba mu nzila, na nyeki kokosolo na Damasiko mu nkati-mwiini, bu nyeki monaa na sisuu, buungi bwansisi bwandyengekele mpele na mpele.

⁷Me nyabwa ha nsi, na nyayuka mbeembu yaleele kuri me ti: "Sawuli, Sawuli, buri wuri mu kwekwaamisa me?"

⁸Me nyafuula ti: "Ye na, Mfumu?" Nde waleele ti: "Me ngo Yesu wa ku Nadzareti wu wuri mu kwekwaamisa."

⁹Baba kintwaari na me bamwiini buungi, ngo kasi basii yuka mbeembu yaba dzoonso kuri me ko.

¹⁰Me nyafuula ti: "Nki me nyelemini kusa Mfumu?" Mfumu wandeele ti: "Teleme yende ku Damasiko, tumi bakuleele myominso mi bakutumini kusa."

¹¹Ngo bukuri nyaba nyahele kumono mu ntoono buungi bwaba semaana, babo baba kintwaari na me bampolo mu kooko, na banata ku Damasiko.

¹²Kwaba muutu mosi, nkuumbu Ananya, wuri na kinzaambi bunu buri mangisi, wuri na kimbaangi kyakibwete, ha kakati dya Bayudayo bobanso badzakalaa haho.

¹³Nde wayisa, wamono me, na wandeele ti: "Sawuli, mpaangi yaami, miisu myaaku mibweese kumono!" Na ha nsi na nsi, me nyabweese kumono, na nyatala kuri nde.

¹⁴Nde waleele ti: "Nzaambi ya bataayi beetu, wakusoolo mu kuyaaba kutya kwaandi, mu kumono wunde wasuunguma, na mu kuyuka mbeembu ya munwa waandi,

¹⁵bukuri ye sa ba mbaangi yaandi, ha busu bwa baatu bobanso, mu misamu myominso mi mwiini na mi yukiri.

¹⁶Ngo mu lumalu, nki wubweese kukiinga? Teleme, taambula mbotokulu, na mpemusunu ya masumu maaku, mu nteelulu nkuumbu yaandi."»

¹⁷«Me bu nyabvutuka ku Yerusalemi, na bu nyaba saambilaa mu Nzo-nzaambi, Mpeeve ya mbaka,

¹⁸na me nyamono Mfumu, na waleele kuri me ti: "Wasula, na pala mu mawasu mu Yerusalemi, bukuri bo bataambula kimbaangi kya ye mu me ko."

¹⁹Me nyaleele ti: "Mfumu, bo bayaari ti me nyabee kweyendaana mu manzo mankutukunu, mu kwekotoso mu boroko, na kweseembe mu makwa bobanso basiila kanyi mu ye.

²⁰Na mu ntaangu yi baba tsaamuna makila ma Estefano mbaangi yaaku, me nyaba hanaho me-meene, nyataamburi mimyo na nyaba nyakwaata binkuta bya babo baba mudzusa."

²¹Nde wandeele ti: "Yende, bukuri me sa nyakuheeke kuri makaanda mari ku la!"»

²²Baatu baba yukaana Pawulo natee mu ntoono yiyo, tumi bo bafula misaakulu baleele ti: "Yisilee muutu wa bumabu ha butoto, nde wahele kuyelemene kuba wamwooyo."

²³Bo bafula misaakulu, balooso binkuta bya bo, na banaanguna fuunda ku yulu.

²⁴Mukuutu fuunda dya bayongolo watuma ti bamukotoso kunsa lumpaangu, na bamufuulila mu nkwaasulu, mpisi kaleele mu nkya ntoono baatu bari mu kufula misaakulu mu nde.

²⁵Ngo babaanaa beki mukaanga misiinga mu kumulata, Pawulo wafuula kuri mukuutu nkama bayongolo waba haho ti: "Buri beenu luri na miswa mya kulata muutu bari Loma, kuri bahele kumukesele mukanu?"

²⁶Mukuutu nkama bayongolo bu kayuka bubwo, wakokosolo kuri mukuutu fuunda, wamuyaabisa wamuleele ti: "Nki ye keti kusa? Muutu bari Loma nde kari.

²⁷Mukuutu fuunda bu kakokosolo, wamufuula ti: "Leele me, buri ye muutu bari Loma wuri?" Pawulo waleele ti: "Heehe."

²⁸Mukuutu fuunda waleele ti: "Me nyaheeri mboongo dzalaka mu kuba muutu bari Loma." Ngo Pawulo waleele ti: "Me ngo wuri mu mbutukulu."

²⁹Hanaho, babo baketi kumulata nkwaasulu basasika na nde, na mukuutu fuunda wabaka boomo, bu kayaaba ti muutu bari Loma nde kari, na nde bee mwaakumukaanga bikonyi.

³⁰Mu kiluumbu kyanama, mukuutu fuunda dya bayongolo, bu kaba na nzala kuyaaba mu nkya ntoono Bayudayo baba mufuundila, nde waleele bamunyanguna, na watuma ti bakutikisa bakuutu ba bangaanga-nzaambi, na kikuutu kyokinso. Tumi nde bu kasundulaa Pawulo, wamusuusa ha busu bwa bo.