Read Beembe Biy 24 Bible Online

Biy 24 - Beembe bible

Biy 24

¹Ha mambisa ma biluumbu bitaanu, mukuutu bangaanga-nzaambi Ananya wayisa kintwaari na bakulu ba babakala babamosi, na nzoonsi mosi ya nkariri, nkuumbu yaandi Teretilo, babo bafuundiri Pawulo kuri ngoforo.

²Bu bamuteele, Teretilo wabaandika mu kumufuunda, waleele ti: "Walukiinsu, beetu twataambula kiyeengi kyakinene, na mbweeyulu ya nsi yimayi yiri mu kumonokono mu ntoono bweese bwa ye,

³Walukiinsu Felikisi, beetu tutoondo kwalaka bu tutaambulaa mamo, mu mpisi ntaangu, na mu bibeendu byobinso.

⁴Me ntiiri kudya ntaangu ye yalaka ko, me nyikuloombo mu kuba na mpemisi mu kuywiila beetu, mu mwaa-myamikufi.

⁵Beetu tubakuryee ti muutu wu kiyoolo kiri, mukuutu kisaangila kuri Bayudayo bobanso, munu mu bari bayende kwetuunga; tumi ha yulu haho se, nde mukuutu kabu dya minsaambiri myahaambuka mya ku Nadzareti.

⁶Nde watsiitsiri kusumuna Nzo-nzaambi, mu didyo, beetu twamukaangiri. [

⁸Mbuti ye wumufuuriri, lo ye sa mono ti, mi turi mu kumufuundila miri myangwanwa."

⁹Bayudayo basika ti mimyo bunubwo miri.

¹⁰Ngoforo bu kamuha miswa mu kunzoonso, Pawulo wabvutula waleele ti: "Kuholosono mibvu myalaka, me nyaari ti ye wuri nzoonsi mu kaanda dimadi. Hango nkuumbu, me nyikalila nyutu yaami mu nsiitu.

¹¹Ye wayelemene kuyaaba ti, me nyakiri kukukisa pe biluumbu kuumi na byoolo, kuholosono ku nyatoombikiri me ku Yerusalemi, mu kusaambila.

¹²Muutu ti mosi wahele kumono me ti mu nzo-nzaambi, kuri nyikalikisa na muutu, bunu pe nyisinda mpuumbu mu kusa kisaangila, ti mu manzo ma nkutukunu, ti kunsa bvula.

¹³Bo ka babangusina kusoongo kitotolo ti kimosi ko kuri ye, mu mi bari mu kufuundila me.

¹⁴Me ntaambiri musamu wunde wu bari mu kuleele me, mu nzila ya kabu. Mukwongo me nyiri mu kwesaambila Nzaambi yiyo ya bataayi beetu bobanso. Me nyasa kanyi mu matinu mu Mangisi na Babikiri.

¹⁵Nsiitu dzi nyasa mu Nzaambi, dzinidzo se bo bari na dzo, sa kwaba mfulukulu baatu basuunguma na bangaa-bubayi.

¹⁶Me-meene nyisalila kwa mu kumonoko kwahele maseembu mu nsimunu yaami, ha busu bwa Nzaambi, na ha busu bwa baatu mu mantaangu momanso.

¹⁷«Ha mambisa mya mibvu myalaka, me nyiisiri kubvutuka ku Yerusalemi, mu kutwaala lubakusu kuri kaanda dyaami, na kuha bikabu.

¹⁸Mu ntaangu ya bikabu yiyo, bo bamwiini me nyatsyeemeke mu Nzo-nzaambi, kari na mpuumbu ko, kari se mu kisaangila ko.

¹⁹Ngo kasi Bayudayo babamosi ba ku Asya, babeeri haho, bo baketyee kufuunda me kuri ye, mbuti bamwii dyadibi mu me.

²⁰Bunu pe, bamaba baleele, bubi bu bamwiini mu me, ha nyabee nyateleme ha busu bwa kikuutu kya Bayudayo.

²¹Bunu pe mu mbeembu yomosi yi nyabikisiri me, ha kakati dya bo, "mu ntoono mfulukulu ya bafwa, me bari mu kutsuundisa, lolo di ha busu bwa beenu!"»

²²Felikisi wayiinga kiluumbu, bu kaba yaari myominso mi tariri Nzila, na waleele ti: "Tumi ha sunduka Lisya, mukuutu fuunda, me mfyongokono misamu mi tariri beenu."

²³Nde watuma mukuutu nkama mu kumukebe mu boroko, kuri wuri na mwaa-bunsaalisi, na se kuri banduku baandi bamubakisa.

²⁴Ha mambisa ma mwaa-biluumbu, Felikisi bo na mukasi waandi wa Muyudayo, Durusila, bayisa. Batumisa Pawulo na bamuyuka wudzoonsolo mu kanyi dya Kiristo Yesu.

²⁵Bo bayolo na nde mu mi tariri nsungumunu, mu nkebulu nyutu na mu mutsuundu wukwiisa. Felikisi wabwiila kinkuuku, waleele ti: "Mu ntaangu yi, yende; me mbaka mpwaani sa nyikuteele lukimi."

²⁶Nde waba nsiitu ti, Pawulo sa kamuha mboongo; mu didyo nde kaba Muteelaana kinsosi-kinsosi mu kuyolaa na nde.

²⁷Mibvu myoolo bu myalabuka, Felikisi wataambula muyiingisi, nkuumbu yaandi, Porokyo Festo. Wunde se bu katya kubweeye ha busu bwa Bayudayo, wahemese Pawulo mu boroko.