Read Beembe Biy 25 Bible Online

Biy 25 - Beembe bible

Biy 25

¹Ha mambisa ma biluumbu bitatu bi katubukiri, Festo wayisika ku Kayisareya, mu kutoomboko ku Yerusalemi.

²Bakuutu ba bangaanga-nzaambi na Bayudayo ba lukiinsu, bafuunda Pawulo, na bayingukila Festo.

³Bo baloombo bweese kuri nde, mpisi kaba bvutukila Pawulo ku Yerusalemi, na kukwo, bamulebekele mweete mu nzila mu kumudzusa.

⁴Ngo kasi nde wabvutula ti: Pawulo wuri mu boroko dya ku Kayisareya, na me-meene Festo nyiri mu kubvutuka mu mawasu.

⁵Nde wabweese kuleele ti: "Hango babo bamono ti bakuka ngo bari basunduka ha kimosi na me; mbuti bari na kibila mu muutu wunde, lo bamufuunda!"

⁶Bu kalutisa biluumbu mpoomo bunu pe kuumi, nde wasunduka ku Kayisareya. Kiluumbu kyanama, bu kaba kadzakala mu nzo ya mutsuundu, waloombo ti bamutwaalikila Pawulo.

⁷Bu kayisa, Bayudayo bafumini ku Yerusalemi bamudyengekele, bamufuunda mu myalaka, miri bahele kubangisina kusoongo.

⁸Pawulo wakalila nyutu yaandi waleele ti: "Me nyahele kuyirika sumu ti dimosi, ti ha busu bwa Mangisi ma Bayudayo, ti mu mya mu Nzo-nzaambi, ti mu mi tariri Kayisari."

⁹Festo bu katya kubweeye ha busu bwa Bayudayo, mu mpeelu mvutu kuri Pawulo, waleele kuri nde ti: "Buri ye tiiri kutoomboko ku Yerusalemi, mu mimami, mpisi bakutsuundisa, kuri me nyiri ha nsi?"

¹⁰Pawulo waleele ti: "Me nyateleme ha busu bwa mutsuundu wa Kayisari, kukwo me ntiiri ti bansuundisa. Me nyahele kuyirika dyadibi kuri Bayudayo, bunu bu yirikiri ye kuyaaba.

¹¹Mbuti me nyasa lumvuki, na nyayirika ntoono, yiri nyayelemene kufwa, lo me nyahele kubisa kufwa. Ngo mbuti kwahele ntoono yangwanwa mu mi bari mu kumfuundila, lo kuri muutu wuri na miswa mu kuyekele me mu myooko mya bo ko. Ngo me ndoombiri bansuundisa ha busu bwa Kayisari"

¹²Haho Festo, bu kayende ku mfuundu na ba nde, wabvutula ti: "Ku Kayisari ye loombiri mu kweende, kunukwo ye wukweende."

¹³Mwa biluumbu bu byaluta, mbyaasi Angiripa na Berenike batubuka ku Kayisareya, baha Festo mboto.

¹⁴Bo badzakala kukwo biluumbu byalaka; Festo wayala mampolo kuri mbyaasi, mu mi tariri Pawulo, waleele ti: "Boroko dimosi Felikisi kasiisiri.

¹⁵Me bu nyayeensi ku Yerusalemi, bakuutu ba bangaanga-nzaambi, na bakulu ba babakala ba Bayudayo banyaabisiri misamu mya mu nde, na baloombiri ti me nyimukesele mukanu.

¹⁶Me nyabvutiri kuri bo ti, bari Loma bahele na kifu kya kuyekele mu myooko mya baatu, muutu wu bafuundiri, tekesele kabaka mpwaani ha busu bwa bamufuundiri mu kukalila nyutu, mu mi bamufuundiri.

¹⁷Hango [bo] bobanso bayisiri ha, kwahele kumpa laki. Bu bukyeeri, me nzakiri mu nzo muyalu, na ntumisini bantwalikila muutu wunde.

¹⁸Bu twadzakala, bafuundi bateleme, ngo kuri ti dimosi ko, mu mi bamufuundiri myabwanikina na mi nyabee tsima me myamibi.

¹⁹Ngo dzini mwaa-nkalikisi mu mi tariri nsaambukulu yaaku; mi bari bamubelele mitariri muutu mosi, nkuumbu yaandi Yesu, wuri wafwa, ngo kasi Pawulo wuri mu kuleele ti wuri mwooyo.

²⁰Ngo bukuri me nyahele kuyaaba mi nyisa, me nyafuuriri Pawulo, mbuti tiiri kweende ku Yerusalemi, na kukwo bamutsuundisa mu mimyo.

²¹Kasi Pawulo waloombo ti musamu nde kaba wakebu, natee Oguste lalimini nde. Mu bubwo, me nyatuma ti bamukebe natee ku nyimuheeke me kuri Kayisari.

²²Angiripa waleele kuri Festo ti: "Me se bee ntiiri kuywiila muutu wunde." Festo wabvutula ti: "Bweepari sa wumuywiila."

²³Hango, bu bwakya, Angiripa bo na Berenike bayisa mu lukiinsu na mpuumbu baatu, na bakoto mu nzo mutsuundu kintwaari na bakuutu ba mikaangu mya fuunda, na baatu bari bunu buri lukiinsu lwaaku mu bvula. Festo bu kaha lutumu, batwaala Pawulo.

²⁴Festo waleele ti: "Mbyaasi Angiripa na beenu bobanso luri hamaha, monee muutu wuri mu ntoono nde, mpuumbu Bayudayo yoyinso yayisiri kuri me, ku Yerusalemi, na hamaha se, mu kuloombo mu misaakulu ti yaa kabweese kuba wamwooyo ko.

²⁵Mu bitsimi bya me, me nyahele kumono di kari kasa mu kubwiilila mukanu wa lufwa. Mu bukuri nde waloombo ti musamu waandi, Oguste wuyelemini kudzoonso nde, me nyakaangiri kitsimi mu kumuheeke.

²⁶Me nyahele na dya butswiswikii dya kutinina mukuutu, mu didyo me nyikutweesikiri nde hamaha, mpisi heki ha lumbisa lwa bifuuri bya beenu, me mbaka mya kutina.

²⁷Me madyeele mawa, mu kuheeke ku Loma boroko kwahele kusoongo bubi, bu bari mu kumufuundila.