Read Beembe Biy 26 Bible Online

Biy 26 - Beembe bible

Biy 26

¹Angiripa waleele kuri Pawulo ti: "Wuri na miswa mu kukalila nyutu yaaku." Haho Pawulo kalaambula kooko wadzoonso mu kukalila nyutu yaandi:

²"Mu myominso mya fuundiri me Bayudayo, mbyaasi Angiripa, me nyiri na kiminu kyalaka mu kukalila nyutu yaami ha busu bwa ye, lolo dimadi,

³bukuri ye wuri na nyaabulu ya myominso, mitariri bifu bya Bayudayo na mi bakwesiila bo nkalikisi. Ha ngo nkuumbu, me nyikuyingukila mu nkindusulu-mutima mu kunywiila.

⁴"Hango kidziingu kyaami, kuholosono kunu mbandukulu butuuti bwaami, me nyikiyookisiirye hansa kaanda dyaami; Bayudayo bobanso badzakala mu Yerusalemi bayaari.

⁵Kuholosono na kidzika banyaari; lo bateeriri me kimbaangi. Me netyee kidziingu kyaami bunu Mufarisi, bunu buri nsambukulu yeetu.

⁶Na mu lumalu mu nsiitu dza lusiilulu dzasa Nzaambi kuri bataayi beetu, me ntelimini ku mutsuundu.

⁷Kintwaari kya makaanda mo kuumi na moolo meetu, makwesalila mu kifiki, butsuku na mwiini, mari na nsiitu mu kumono nsiilulu dzidzo. Mu ntoono nsiitu dzidzo, mbyaasi, Bayudayo bafuundiri me.

⁸Bukuri ki luri mu kutsima, ti Nzaambi kari mfulukisa bafwa ko?

⁹"Me ngo wuri, nyaba na kitsimi kya kunwaanisa, mu manzila momanso, nkuumbu Yesu, wa ku Nadzareti.

¹⁰Mamo se, me nyasiiri ku Yerusalemi. Nyasoko bangisi balaka mu boroko, bu nyataamburi lutumu lwa bakuutu ba bangaanga-nzaambi. Me nyataamburi kuri ti babadzusa, habaanaa babakesiri mukanu wa lufwa.

¹¹Me nyayende mu manzo ma nkutukunu mu kwebaseembe. Nyabakwiikisa mu kuri basaana nkuumbu Yesu, na mu nkesi dzalutila kiteesu, nyabanama natee mu mabvula manzeense.

¹²Mu ntoono misamu mimyo, me nyayende ku Damasiko, na lutumu na kisalu kya mpeeri bakuutu ba bangaanga-nzaambi.

¹³Mu nkati-mwiini, ha kakati dya nzila, buungi bubvuriri na ntaangu, bwafumuna ku yulu, bwadyengekele me, ha kimosi na baba kwemfila.

¹⁴Beetu bobanso twabwa ha nsi, me nyayuka mbeembu yaba leele me mu ndiinga ya kihebeleho ti: "Sawuli, Sawuli! Mu nki wuri mu kwekwaamisa me? Diri mpasi kuri ye, mu kunwaanisa kutya kwa Nzaambi.

¹⁵Me nyafuula ti: "Mfumu ye na? Mfumu waleele ti: "Me ngo Yesu, wu wuri mu kwekwaamisa.

¹⁶Kasi, siimbika na teleme mu miilu myaaku; me nyikumonokini mu kusa ye kisari kyaami na mbaangi [me] mu ma mwiini, na ma wubweese kumono, ha nyikumonokono me.

¹⁷Mu kukuula ye mu kaanda, na kweende ku nyikuheeke me kuri bangooyi.

¹⁸Me nyikuheekiri mu kudzibula miisu mya bo, mpisi bapala mu mampimbisi biisa ku buungi, bapala na mu lutumu lwa Satana, mu kuba mu lwa Nzaambi, mu kutaambula mpemusunu ya masumu, na bataambula kikuuku ha kakati dya bangisi mu kanyi dibasa mu me."

¹⁹Mu bubwo, mbyaasi Angiripa, me nyasii tungukila mamono-miisu ma ku yulu mamo ko.

²⁰Kubaandukila kuri bari ku Damasiko, tumi bari ku Yerusalemi, nkoonsi yoyinso ya Yudaya, na kuri bangooyi, nyayikisa ti bayiinga madyeele, na babvutuka kuri Nzaambi, na basalila biyiriki byayelemene na nyiingulu madyeele.

²¹Mu ntoono yiyo, [bu nyaba] mu Nzo-nzaambi, Bayudayo bankaanga na basaka bwa kunzusila.

²²Me Nzaambi wa bakisa me, natee mu kiluumbu ki. Me nyiri hamaha, mu kuta kimbaangi kuri bilesi na bakuutu. Babikiri na Moose bayaabisiri miyelemini kwiisa, minimyo se me nyiri mu kwetswiikisa.

²³Mbuti Kiristo wamwiini mpasi, na nde ngo watete mu kufuluka mu bafwa, nde yelemini kuyaabisa buungi kuri kaanda na kuri bangooyi."

²⁴Pawulo bu kari mu kukalila nyutu mu mamo, Festo mu mbeembu yadzaangama waleele ti: "Ye walawuka, Pawulo! Nyaabulu yi wuri na ye, kukunata ku kulawuka!"

²⁵Kasi Pawulo wabvutula ti: "Me nyahele kulawuka, Walukiinsu Festo, ngo ma ndeeriri me ma ngwanwa na ma madyeele.

²⁶Mukwongo mbyaasi yaari myominso mimyo, na me lo nzoonsiri mu nsiitu ha busu bwa nde. Me nyirikiri kuyaaba ti nde kadziimburi ti dimosi mu mamo ko, bukuri mamo mahele kuyirima mu nsweeki.

²⁷Buri ye wusa kanyi mu babikiri, mbyaasi Angiripa? Me nyaari ti ye wusa kanyi!"

²⁸Angiripa waleele kuri Pawulo ti: "Hasiiri, hantele ye tiiri kukitula me mukiristo."

²⁹Pawulo waleele kuri nde ti: "Ntaangu yiba yantele, bunu pe yalaka, me nyisaambila Nzaambi, kari mu wunu ye ko, ngo mu beenu-banso luri mu kuyuka me lolo di, mpisi luba bunu me, ngo kwahele bikonyi bi!"

³⁰Mbyaasi, ngoforo, Berenike na bobanso baba na bo, bateleme,

³¹na bu bayende ku mfuundu, badzoonso bo na bo, baleele ti: "Muutu wu wahele kuyirika ntoono ti mosi wu bayelemini kumudzusa bunu pe kumusa mu bikonyi."

³²Angiripa waleele kuri Festo ti: "Muutu wu beeri wayelemene kumupatula, mbuti bee wahele kuloombo kuri ti Kayisari kalalama."