Read Beembe Biy 27 Bible Online

Biy 27 - Beembe bible

Biy 27

¹Bu baholo nzeengulu dza kunata beetu ku Italya, baha Pawulo na maboroko makimi kuri mukuutu nkama bayongolo, nkuumbu yaandi Yulyo, mu mukaangu bayongolo wa Oguste.

²Beetu twanwaata mu bwaatu, bwa Adaramitino, bwaba kweende mu mabula ma Asya, mari mu teke mubu. Baba na beetu ngo Aristarako wa ku Makedonya wudzakalaa ku Tesalonika.

³Kiluumbu kyanama, beetu twatuula ku Sidoni. Yulyo waba hololo Pawulo mu bumuutu, wamuha miswa mu kwemono banduku baandi, mu kutaambula lubakusu lukaba na nzala lwo.

⁴Bu twayisika haho, twayende mu teteke dya simu dya Kiporo, mu ntoono kiteembu kyaba tubwaana,

⁵na beetu twataba mubu, bebele dya Kilikya na Pamfilya, na twasunduka ku Mira mya ku Likya.

⁶Haho, mukuutu nkama bayongolo bu kamono bwaatu bwa ku Alekanderi bwaba kweende ku Italya, nde wutunwaatisa mu bwo.

⁷Mu biluumbu byalaka, beetu twaba kweyende buke-buke mu maampa; na mu mpasi dzalaka beetu twatubuka ku teke bvula dya Kinido, ngo twasii bangusina kusunduka haho ko, mu ntoono kiteembu kyaba tukakisila. Beetu twayendekele mu teteke dya simu, twabwa ha kakati dya maampa dya Salemone, mu kutubuka ku Kerete.

⁸Mu mpasi, beetu twatubuka ku kibeendu ki bateela ti Masabu Mamabwete, bebele na bvula dya Lasaya.

⁹Ntaangu yalaka yaba yimwaaluta, na bwaba bweki bwabubi mu kweyendekele mu maampa, mu bukuri ntaangu ya loomi yaba yimwaaluta. Pawulo walubula,

¹⁰waleele kuri bo ti: "Banduku baami, me nyimono ti budyeengi bu, buri na nsisi, kari munu mu bitotolo ko, ngo se na mu kidziingu kya muutu-muutu mu beetu."

¹¹Kasi mukuutu nkama waba bvuriri kusiila nsiitu mu munati na mu ngaa-bwaatu, ti na mu maba leele Pawulo.

¹²Ngo bukuri sabu dyaba bwa kulutisila pe ntaangu ya kyoosi, balaka baha kitsimi kya kuyisika haho, mu kuri ti kampe tutubukiri ku Foyiniki, sabu dya Kerete, ku teke sude bebele na weste na ku node bebele na weste.

¹³Kiteembu kyadzuuna kyafumuna ku sude kyabeke kupeepe. Bo batsima ti lo beensi kwaaku; ngo bayende mu nzila ya Kerete.

¹⁴Mwaa-kidzika kyantele kiteembu kya makwa, ki bateelaana Erakilo, kyasangumuka.

¹⁵Kiteembu kyanata bwaatu, na bu twaba bwakusiila pe, twayendekele bunubwo.

¹⁶Bu twaba mu kuluta ku nsuku kibuma ki bateelaa Kawuda, mu mpasi dzalaka beetu twabangisini kaholo mwaa-bwaatu bwantele bwa lubakusu.

¹⁷Bakolokoso bwaatu bubwo mu misiinga mya lubakusu. Mu kubata kuri ti bakwiisa kutukoko natee ku Siriti, bo basundula bitsuri bya miti bikoobaanaa byakolokoso mu bwaatu, na bahemese bee yendekele mu kiteembu bunubwo.

¹⁸Kiluumbu kyaba nama, kiteembu bunu kyaba kyakiri mu kutuningisa. Baatu babeke kulooso bitotolo mu kuleengese bwaatu.

¹⁹Na mu kiluumbu kyabitatu, bo basundula makuunsi ma bwaatu mu myooko mya bo-meene.

²⁰Mu biluumbu byalaka, ntaangu na bambwetete byasii pala ko; kiteembu kyasii kuluka ti mwaa-kwantele ko, na nsiitu ya kubvuuka yaba yeki yo pe.

²¹Byandya byaba bimwaawa na kidzika. Pawulo, bu kateleme ha kakati dya bo, waleele ti: "Ho! Banduku, bwaba bwayelemini ti beenu lunwiila; twaketyee kuyisika Kerete ko, mu kuhele kusuumbuka na kuhele kuhoomboso byobinso bi.

²²Mu lumalu me nyiluloombo ti lwaatee kibakala. Kuri muutu mu beenu wufwa ko, ngo bunu bwaatu bubvukuna.

²³Mukwongo, Nzaambi yi bakiri me, na yi nkoosalila me, mbasi yaandi yiisiryee kumonokono me, mu butsuku

²⁴na yileeriryee kuri me ti: "Pawulo ya baa na boomo ko, ye yelemini kuteleme ha busu bwa Kayisari; na mono, Nzaambi wukusiiriri bweese na bobanso ba luri mu budyeengi.

²⁵Hango nkuumbu, banduku beenee na kibakala, me nyiri na nsiitu mu Nzaambi; mamo ma kaleeriryee kuri me, sa mayirima.

²⁶Buri bwabubwete ti tutelemee ha yulu kibuma.

²⁷Butsuku bubwo bwaba bweki bwa kuumi na bina, na twaba tumwaawumuka wa Adirya. Mu kakati dya butsuku, bisari bya mu bwaatu, babaka kitsimi ti kampe tukokisiri bebele na butoto.

²⁸Bo badiimba musundu, na babaka mankwaanga makuumi moolo; bu bayende ha mankula, babweese kudiimba, na babaka mankwaanga kuumi na mataanu.

²⁹Bo bamono boomo, ti bwee tukakiri mu matari, basundula binko bina ku mambisa ma bwaatu, na basuka mutima ti nkani bwiisi buwasula mu kukya.

³⁰Bisari bya bwaatu baba na nzala kuyitika; bu basundula mwaa-bwaatu bwa lubakusu, ku mutu bwaatu, bo kuleele ti binko bakwee yirika.

³¹Pawulo waleele kuri mukuutu nkama bayongolo na bayongolo ti: "Mbuti baatu ba bahele kuba munsa bwaatu, lo beenu lubangusina kubvuuka ko."

³²Haho bayongolo batabula misiinga myaba myakolokoso mwaa-bwaatu bwa lubakusu na badipatula dyayende mu maampa.

³³Tekesele bwiisi bukya, Pawulo wasyaamisa bobanso ti nkani badya, waleele ti: "Kiluumbu ki kyakuumi na bina, luri mu kukiinga na lwahele kudya.

³⁴Hango nkuumbu me nyilusyaamisa mu kuholo byandya, bukuri mvuukulu yeenu yiri mu byo, na kuri ti lufu lumosi lwa mitu myeenu ludziimbila ko."

³⁵Nde kaleelaa mimyo, waholo mpa, wabvutula matoondo kuri Nzaambi, ha busu bwa bobanso, na bu kabukuna, wabaandika kudya.

³⁶Bobanso babaka makwa, na bo se baholo byandya mu kudya.

³⁷Munsa bwaatu, twaba nkama dzoolo na makuumi nsaamu na baatu basaamunu.

³⁸Bu bayukuta, bo balooso masaangu mu mubu mu kuleengese bwaatu.

³⁹Bwiisi bu bwakya, basii bweese kuyaaba butoto ko, ngo batalila mwaa-waanga diri na kibeendu kyapalila munyeenge. Bo bakaanga kitsimi kya kweende ku simu, mbuti babangusini kusindukila bwaatu.

⁴⁰Bu bapatula binko, bayende ha yulu mubu, mu ntaangu yomosi, banyanguna misiinga mya kisuunguki, bataanda nsaanda ya ku mankula ma bwaatu, mpisi heki kiteembu kibasindukila ku simu.

⁴¹Bo babwa ha kikuma kya munyeenge, kiri ha kakati dya mubu; bo basaka bwakweendekile ku simu, ngo mutu wakakimina kunsa munyeenge, bwaatu bwaba bwa kutembekele pe. Kitsuri kya mambisa kyatsyaamuka mu ntoono makwa ma[mipaku].

⁴²Kutya kwa bayongolo kwaba ti badzusa maboroko, mpisi heki ti dimosi dihele kubwa mu mubu na kubvuuka ha mambisa ma kutsaya.

⁴³Mukuutu nkama bayongolo bu katiiri kuyitikisa Pawulo, wabakabikisa kitsimi kikyo. Nde watuma kuri babo babangusina kutsaya, mu kubwa batete mu maampa na beende ku simu.

⁴⁴Heki mu babo basiiri, babamosi basalila mabaya, bakaka basalila mabaya ma bayisila mu bwaatu. Bubwo bobanso batubuka ku simu, mpee-mpolo.