Read Beembe Biy 28 Bible Online

Biy 28 - Beembe bible

Biy 28

¹Bu babvuuka mpee-mpolo, bo bayuka ti kibuma kya butoto ki batubukiri kikyo nkuumbu Melite.

²Bangaa-bula bubwo batubwaana mu ntiilu yayinene. Bu banamuka mbaawu, batuteele ku kuyoto, mu ntoono mbvula yaba yimwaanoko, na mu ntoono kyoosi.

³Pawulo bu katolo bitsootso byalaka, wabituba ku mbaawu, mpiri yapala, mu ntoono nyangala, na yamutatika mu kooko.

⁴Bangaa-bula bu bamono nyoko yiri mu kutsinga mu kooko kwa Pawulo, bo na bo baleele ti: "Ngwanwa muutu wu mudzusi kari. Nde pariryee mpee-mpolo mu mubu, ngo nsundusulu dza Nzaambi dzimuha miswa ko mu kuba mwooyo.

⁵Hango nde kakubulaa kooko, nyoko yabwa ku mbaawu; nde wahele kumono mpasi ti dzimosi.

⁶Baatu baba kiingilaa ti kooko bee kumutuundiri, bunu pe bee fwiiri na sisuu. Bo bakiingila kidzika kyalaka, na bahele kumono dya mpasi dimutubukila. Bo bayiinga nzoonsulu, beki leele ti muutu wu nzaambi kari.

⁷Bebele na kibeendu kikyo, kwaba bula bwa muutu mosi, mukuutu kibuma, nkuumbu yaandi Popilyo, watutaambiri, mu kimbaasi ku nzo yaandi, mu biluumbu bitatu.

⁸Ngo taayi dya Popilyo wabeele baawu, na mwooyo wa makila, waneŋene. Pawulo wayende kuri nde, wasaambila, wamutetekele myooko, na wamutsinikisa.

⁹Mamo bu mamonoko, baatu bakimi ku kibuma, baba na babeeru bakokosolo, na batsiinika.

¹⁰Bo batuhololo mu lukiinsu lwolunso; bu twaba tweki mu kweende, batuha bi twaba na nzala byo mu budyeengi.

¹¹Ha lumbisa lwa mangoondo matatu, beetu twaholo bwaatu bwa ku Alekanderi, bwalutisiri ntaangu ya kyoosi ku kibuma. Bisoni byatina mu bwaatu byaba «Dyoskuro.»

¹²Bu twatubuka ku Sirakusayi, beetu twalutisa biluumbu bitatu haho.

¹³Bu twayisika haho, twatubuka ku Lengyoni. Ha mambisa ma kiluumbu kimosi, kiteembu kya sude kyatubuka, na bukyaanaa twatubuka ku Potyolo,

¹⁴kukwo, twabaka bampaangi, batuteele mu kudzakala kuri bo, mu biluumbu nsaamu; bubwo twatubukila ku Loma.

¹⁵Bampaangi ba ku Loma, bu bayuka mi twabwanikini na myo, bayisa tubwaana natee ku dzaandu dya Apyo, na ku Manzo Matatu. Pawulo bu kabamona wabvutula matoondo kuri Nzaambi, na walwaata kibakala.

¹⁶Mu ntaangu yi twakoto mu Loma, baha miswa kuri Pawulo mu kuba kwa nde-kaka na muyongolo waba kemukebaana.

¹⁷Ha mambisa ma biluumbu bitatu, Pawulo wateele bakuutu batete ba Bayudayo ba ku Loma, ku nzo yi kaba. Bu bakutukuna, nde waleele kuri bo ti: "Bampaangi baami, me nyahele kuyirika lumvuki ti lumosi kuri kaanda, bunu pe kuri bifu bya bataayi beetu. Bu nyabee mu boroko ku Yerusalemi, me banyekele mu myooko mya bari Loma.

¹⁸Bo bamfuulaana, baba batiiri kumpatula, mu ntoono yiri bahele kumono kibila ki badzusila me.

¹⁹Ngo kasi, Bayudayo basii tya ko, na me nya kati kuloombo ti Kayisari kansuundisa, kuri nyahele na kitsimi kya kufuunda kaanda dyaami.

²⁰Mu ntoono yiyo me ndoombiryee mu kulumono, na mu kuyolo na beenu. Mu ntoono nsiitu ya Isaheli, me nyiri mu bikonyi bi nyiri na byo bi.

²¹Bo bamuleele ti: «Mu mitariri ye, beetu twahele kutaambula mukaanda ti mosi, wafumuni ku Yudaya; kwahele se ti mosi mu bampaangi bayisiri kumaku, watuyaabisa bunu pe wadzoonso mamabi mu ye.

²²Ngo beetu tutiiryee kuyuka ye-meene, ma wutsima ye, mu mitariri kabu dya minsaambiri myahaambuka, bukuri dyayabakana ku turi beetu, na mwomunso bari mu kudinwaanisa.»

²³Bu bakaanga laki na Pawulo, bo bayisa mu lutaangu lwalaka ku nzo yaandi. Kuri bo kayaabisa mu nteelulu kimbaangi kya Kimfumu kya Nzaambi, mu kubayukusa mu mitariri Yesu, kabandukila mu Mangisi ma Moose, natee mu babikiri, baholosonaa kipari natee nsinsika.

²⁴Babamosi basiila kanyi mu ma kaba leelaana, bakaka babisa kusa kanyi.

²⁵Bu baba kuyukusuna pe bo na bo, batsamukina. Pawulo waleele dyaambu dimosi ti: «Bwabubwete, Mpeeve Yangisi yadzoonsiri mu Esaya kuri bataayi beenu,

²⁶yaleele ti: "Yende leele kuri kaanda didyo: Beenu sa lwayuka, ngo ka lubakula ko; beenu sa lwakyeese, ngo ka lumono ko.

²⁷Bukuri mutima kaanda di weki wakuba; bari na mpasi mu kuyuka mu makutu, bakaangiryee miisu myaaku, mpisi bahele kumono mu miisu, na bahele kuyuka mu makutu, na bahele kubakula mu mutima, na bahele kuyiinga madyeele, kuri me nyibatsinikisa."

²⁸Ngo diba dyayabakana kuri beenu ti, mvuukulu ya Nzaambi yi, yeki yaheeku, kuri bangooyi; bo se sa bayuka!» [

³⁰Pawulo wadzakala mibvu myoolo mu nzo ya kufutila. Nde waba taambulaana bobanso baba kweemumonaa.

³¹Nde wayaabisa Kimfumu kya Nzaambi, na wayikisa mitariri Mfumu Yesu Kiristo, mu nsiitu dzodzinso, kwahele bikakusulu.