Read Beembe Biy 3 Bible Online

Biy 3 - Beembe bible

Biy 3

¹Petelo na Yowane baba toomboko ku Nzo-nzaambi, mu kilookolo kyawa kya lusaambulu.

²Mu mpisi kiluumbu, baatu baba nataana mubakala mosi, wabutuka kikata, na baba musuusaana, ha mweelu Nzo-nzaambi, wubateelaa ti «Wamubwe», mu kuloombo lubakusu kuri baba kotaana mu Nzo-nzaambi.

³Nde bu kamono Petelo na Yowane beki saka kukoto mu Nzo-nzaambi, wabaloombo lubakusu.

⁴Petelo bo na Yowane bamusungumina kisoosi, tumi Petelo wamuleele ti: «Tala beetu.»

⁵Muutu wunde wayirika kubatala, na wakiingila ti kampe bakiri kitotolo kuri bo.

⁶Petelo waleele ti: «Me nyahele na mboongo, nyahele na woolo; ngo bi nyiri na byo, bibyo nyikuha; mu nkuumbu Yesu Kiristo wa ku Nadzareti, [teleme na] dyaata!»

⁷Bu kamukwaata mu koko kwa lubakala, nde wamutelemese; hanaho se kinamu kyaandi na makonsi maandi mabaka makwa.

⁸Bu kadya nkaaka, wateleme, wadyaata, na wakoto kintwaari na bo mu Nzo-nzaambi, wadyaata, wadumuka mankaaka na wadumusa Nzaambi

⁹Baatu bobanso bamumono kuri, wu kweyende na wu kwedumusa Nzaambi.

¹⁰Baatu baba bamuyaari, ti nde wabee loombaana lubakusu ha mweelu Wamubwe, wa Nzo-nzaambi, babwiilila nkinkuuka na bakimuka mu mamo mayirimini mu nde.

¹¹Muutu wunde wakaangama na Petelo na Yowane, na baatu bobanso bakuka hari bo, ha mweelu wu bateelaa «Wa Solomo», bakimuka.

¹²Petelo bu kamono wabvutula kuri baatu ti: «Baatu ba Isaheli, ha buri luri mu kukimuka mamama? Bukuri nki beenu luri mu kutala beetu, kuri bunu ti mu mpinu dza beetu-meene, bunu pe mu kinzaambi, beetu tusiiri ti muutu wu keyende?

¹³Nzaambi ya Abalaami, [Nzaambi] ya Isaki, na [Nzaambi] ya Yakobe, Nzaambi ya bataayi beetu, keembisiri kisari kyaandi Yesu, wu lwayekiri, na wu lwatunini beenu ha busu bwa Pilato, koomosoko nde waba watsima kumupatula;

¹⁴kasi beenu lwatuna wangisi na wasuunguma, na lwaloombo balupatukila mudzusi.

¹⁵Beenu lwadzusiri mfumu bumwooyo, ngo Nzaambi wamufulukisi mu bafwa, beetu turi bambaangi ba nde.

¹⁶Mu ntoono kanyi mu nkuumbu yaandi, wu lumono beenu wu, na wuluyaari, katsiinikini, na mu kanyi didyo, nde kataamburi makwa ha busu bwa beenu-banso.»

¹⁷«Ngo mu lumalu bampaangi, me nyaari ti kunsa lubu beenu lwasii mamo, bwobumosi bamfumu ba beenu se;

¹⁸mamo ma tekisiri kuyaabisa Nzaambi mu minwa mya babikiri bobanso, ti Kiristo dyaandi sa kamono mpasi, nde wamakukisiri.

¹⁹Hango, yiingeenu madyeele na seenee kanyi, mpisi heki masumu ma beenu maba mayaalu,

²⁰na mpisi heki mantaangu ma mpuumunu mafumuna kuri Mfumu miisa, na kaheeke mu ntoono beenu, wunde wu kalutaasiri, Kiristo Yesu.

²¹Nde yulu kabweese kutaambula, natee ntaangu yi babweese kuyirika byobinso byamoono, bwa dzoonsiri Nzaambi mu minwa mya babikiri baandi bangisi, kuholosono mantaangu mahele kuwa.

²²Moose waleele ti: "Mfumu Nzaambi sa katelemese, mu ntoono beetu, mubikiri ha kakati dya bampaangi beenu, wuri bunu me; luyelemini kumuywiila mu momanso ma kaluleele.

²³Mpisi wunde wuhele kuywiila mubikiri wunde, sa kaba wayisila ha kakati dya baatu."

²⁴Na babikiri bobanso, kuholosono Samweli, na babo banemi, badzoonsolo mu biluumbu bi.

²⁵Beenu luri baala ba babikiri, na ba lulelusunu lwasiiri Nzaambi na bataayi beenu, ha kabaleele kuri Abalaami ti: "Mu babutuka mu ye, makaanda momanso ma ha butoto, sa maba masakumunu."

²⁶Kuri beenu Nzaambi katekisiri kutelemese kisari kyaandi; nde wamuheeke mu kusakumuna beenu, mpisi muutu-muutu mu beenu, kasiisa bubi bwaandi.»