Read Beembe Biy 6 Bible Online

Biy 6 - Beembe bible

Biy 6

¹Mu biluumbu bibyo, bayiki baba beki balaka. Mvungutulu ya Bahelene mu Bahebeleho yayukukuna, bukuri bakyeetu babo bafwiiri balumi baba banyaafunu mu nkabukulu byandya, ya kiluumbu ngo kiluumbu.

²Bo kuumi na boolo, bateele mpuumbu bayiki, baleele ti: "Bwahele kuyelemene ti beetu tubwoongolo maampu ma Nzaambi mu kisalu kya kabula byandya.

³Saakeenu bampaangi nsaamu, ha kakati dya beenu, bari na kimbaangi kyakibwete, baluula mu Mpeeve na mu madyeele, batuheenee kisalu kikyo.

⁴Beetu ngo bari, tunamitina mu lusaambulu na mu kisalu kya kuyikisa.

⁵Mpuumbu yoyinso yamono kiminu mu musamu wunde. Bo basoolo Estefano, muutu waluula mu kanyi, na mu Mpeeve Yangisi, basoolo Filipo, Porokoro, Nikanoro, Timoni, Paremena na Nikolayo munsaambiri wa ku Antyoke.

⁶Tumi ha babasoongo kuri bantumu, bu basaambila, babatetekele myooko.

⁷Maampu ma Nzaambi maba kwetsamikinana kwalaka, na lutaangu lwa bayiki lwaba kwefununa kwalaka ku Yerusalemi, na mpuumbu bisari bya mu Nzo-nzaambi yatumuma mu kanyi.

⁸Estefano waba waluula mu bweese na mu mpinu, waba kweyirika bimaangu na bidiimbu byabinene, ha kakati dya baatu.

⁹Ngo kwateleme mwaa-ndaambu baatu ba nzo-nkutukunu, yi bakooteela ti ya baatu bakuuluka, bari ku Kirene, bari Alekanderi, bari Kilikya, na bari Asya basa nkalikisi na Estefano.

¹⁰Bo baba bahele na makwa ma kutungukila madyeele na mpeeve byamonoko mu nzoonsulu Estefano.

¹¹Bo baha mboongo kuri baatu, mpisi baleele ti beetu twayukiri, nde wusa nzoonsulu dza nsaanunu mu Moose na mu Nzaambi.

¹²Bo basinda baatu, bakulu ba babakala na batini ba mangisi; bu batubuka, bakwaata Estefano na bamunata ku kikuutu.

¹³Bo batelemese bambaangi bampya mu kuleele ti: "Muutu wumawu wahele kuhoto kwedzoonsolo bwabubi mu Kibeendu kyangisi [ki] na mu Mangisi.

¹⁴Beetu twamuyukiri wukweleele ti, Yesu wa ku Nadzareti sa katsyaamuna Kibeendu kyangisi ki, na sa kayiinga bifu bya tusisikila Moose.

¹⁵Bobanso baba badzakala ha kikuutu bamusungumina kisoosi, na bamono kidziri kyaandi bunu kidziri kya mbasi.