Read Beembe Biy 7 Bible Online

Biy 7 - Beembe bible

Biy 7

¹Mukuutu bangaanga-nzaambi wamufuula ti: "Buri mamo mari mangwanwa?"

²Estefano wabvutula: "Bampaangi na bataayi, yukeenu. Nzaambi ya nkeembu wamonikini kuri Abalaami, taayi dyeetu bu kaba ku Mesopotamya tekesele kadzakala ku Karana.

³Nzaambi waleele kuri nde ti: "Pala mu nsi yaaku, [kunsa] kaanda dyaaku, na yende ku nsi yiyo yi nyikusoongo me."

⁴Haho nde wapala mu nsi ya bari Bakaledayo, watuunga ku Karana. Tumi ha mambisa ma lufwa lwa taayi dyaandi, bamunata mu nsi yi, yi luri lwa dzakala mu lumalu.

⁵Nzaambi wahele kumuha saala ti dimosi, ti kibeendu kya kusuusa lutaambi; ngo wataasila kumuha nsi yimayi, kuri yiba saala kuri babutuka mu nde. Mu ntaangu yiyo Abalaami waba wakiri mwaana pe.

⁶Nzaambi wadzoonso bumabu: "Bilesi bya ye sa byadzakala mu nsi ya bunzeense, sa baba bankutu na sa babakwaamisa mu nkama na dza bibvu.

⁷Nzaambi wabweese kuleele ti, me sa nyatsuundisa kaanda didyo dyabasiiri mu bunkutu. Ha mambisa haho, bo sa basaambila me, ha kibeendu kimaki.

⁸Nzaambi wamuha lulelusunu mu nteendulu bubakala; na ha keki butaana Isaki, na nde wamuteende bubakala mu kiluumbu kyampoomo, na Isaki wasa bwobumosi kuri Yakobe, na Yakobe kuri bankaaka bo kuumi na boolo.

⁹"Bankaaka babakila Yosefi musoki, na bamuyarika ku Ngipiti. Ngo Nzaambi waba na nde,

¹⁰nde wamukuula mu manyoongi maandi momanso, na wamuha bweese na madyeele ha busu bya Falaho, mbyaasi ya ku Ngipiti, wamusuusa mfumu mu Ngipiti na [mu] nzo yaandi yoyinso.

¹¹Nzala yayisa mu Ngipiti yoyinso, na ku Kanana. Manyoongi maba malaka, na bataayi ba beetu baba bahele kubaka byandya.

¹²Yakobe bu kayuka ti ku Ngipiti kuri byandya, nde waheeke bataayi ba beetu mbala yatete,

¹³mu mbala yadzoolo, Yosefi wayabakana kuri bampaangi baandi, na kitsuumbu [kya] Yosefi, kyayabakana kuri Falaho.

¹⁴Yosefi watumisa Yakobe taayi dyaandi na kaanda dyodinso, baatu makuumi nsaamu na bataanu.

¹⁵Yakobe wayende ku Ngipiti na wafwiila kukwo na bataayi ba beetu.

¹⁶Bo banata biyisi bya bo ku Sikeme, na babidziika mu mampeembe, ma basuumba Abalaami mu mboongo, kuri baala ba Emoro ku Sikeme.

¹⁷"Ntaangu ya lulelusunu ya sooriri Nzaambi, kuri Abalaami bu yakokosolo, kaanda dyabutuna na dyafununa ku Ngipiti,

¹⁸natee kwayookiri mbyaasi yikimi [ku Ngipiti], yiri yahele kuyaaba Yosefi.

¹⁹Mbyaasi yiyo yawuna kitsuumbu kya beetu, na wakwaamisa bataayi [ba beetu] mu kudzusa baala batsoombo.

²⁰Mu ntaangu yiyo Moose kabutuka, nde waba wabweeye kuri Nzaambi. Mangoondo matatu nde kari kasa mu nzo taayi,

²¹bu bamuyekele, mwaana Falaho wa mukyeetu, wamuholo na wamubukusa bunu mwaana waandi.

²²Moose wayika [kunsa] madyeele momanso ma bari Ngipiti, nde waba na mpinu mu maampu, na mu biyiriki byaandi.

²³Bu kakukisa mibvu makuumi mana, nde wabaka kitsimi mu kweemono bampaangi baandi, baala ba Isaheli.

²⁴Bu kamono bari mu kukwaamisa mpaangi mosi, nde wamukala na wabvutula kitete, na wadzusa wa ku Ngipiti.

²⁵Nde watsima ti kampe bampaangi ba nde, sa babakula ti Nzaambi wubakuula mu kooko kwaandi, kasi bo basii bakula ko.

²⁶Kiluumbu kikimi, nde wamono bampaangi baandi bari mu kunwaana. Nde wasaka bwa kusa nyukusunu ha kakati dya bo, waleele ti: "Baatu ba, beenu ti bampaangi luri, nki luri mu kwebakana beenu na beenu?"

²⁷Kasi wunde wabakwaamisa mbaasi wamusindikila na waleele ti: "Na wa kusiiri mukuutu na mularimi ha yulu beetu?

²⁸Buri ye tiiri kudzusa me se, bu wadzusiri wa ku Ngipiti dzoono?"

²⁹Moose, kayukaa maampu mamo, wayitika ku nsi ya Madyani, wadzakala ku nsi yiyo, na kukwo wabuta baala boolo.

³⁰"Mibvu makuumi mana bu myakuka, mbasi yamumonokono mu mulaka mbaawu, mu bvuunda dya miti, ku nsi yankatu ku mulaandu wa Sinayi.

³¹Moose bu kamono, wakimuka mu mamono-miisu, nde wakokosolo mu kukyeese kwakubwe, ngo mbeembu Mfumu yaleele ti:

³²"Me ngo Nzaambi bataayi baaku, Nzaambi ya Abalaami, na Isaki Na Yakobe". Moose wabwiilila kinkuuku, wakoono kukyeese.

³³Mfumu wamuleele ti: "Yisila masapaatu mu miilu myaaku, bukuri kibeendu ki wuri wateleme kikyo kiri kyangisi.

³⁴Me nyamwiini bu bari mu kukwaamisa kaanda dyaami mu Ngipiti; na me nyayukiri nkuumunu yaaku. Na me nsundukiri mu kubakuula; na mu lumalu yende, me nyikuheekiri ku Ngipiti."

³⁵Moose wunde wu batunini na wu baba leele ti: "Na wa kusiiri mukuutu na mularimi?" Wunde Nzaambi [se] kari kaheeke bunu mukuutu na mupalisi, mu lubakusu lwa mbasi, yamumonokono mu bvuunda dya miti.

³⁶Moose wabapalisa, mu nyirikulu bidiimbu mu nsi ya Ngipiti, ha Mubu Wabeenge na mu nsi yankatu mu makuumi mana ma bibvu.

³⁷Wumawu ngo Moose waba leele kuri baala ba Isaheli ti: "Nzaambi sa katelemese, ha kakati dya bampaangi ba beenu, mubikiri wuba bunu me.

³⁸Mu ntaangu yaba yakutukuna baatu ku nsi yankatu, nde waba wateleme mu kuyuka myaba leelaana mbasi ku yulu mulaandu, na kutubula kuri bataayi beetu. Nde wataamburi maampu ma mwooyo, mu kuha kuri beenu.

³⁹Ngo bataayi ba beetu basii tya kutumuma kuri nde ko, bamutekiri mbisa na batalisiri bitsimi bya bo ku nsi ya Ngipiti.

⁴⁰Bo baleele kuri Aaloni ti: "Yirikila beetu banzaambi bakweyende ha busu bweetu; bukuri Moose wapalisiri beetu ku nsi ya Ngipiti, twahele kuyaaba ma kabwanikinyee na mo."

⁴¹Na bo batsula mwaana ngoombo mu biluumbu bibyo, badzusa kibulu mu kikabu kuri kiteki kikyo, na bamono kiminu mu biyiriki bya myooko myaaku.

⁴²Nzaambi wabatekele mbisa na wabayekele, mpisi basaambila bambwetete ba yulu, bunu bu diri dyatinu mu mukaanda babikiri: "Nzo ya Isaheli, buri kari kuri me beenu luri luha bikabu, na bibulu bya kudzusa mu mibvu makuumi mana ku nsi yankatu ko?

⁴³Beenu lwaneti musaampu Moloko na mbwetete ya nzaambi [yeenu] Layifana, biteki bibyo beenu luri lwayirika, na luri lwasaambila. Mu ntoono yiyo me sa nyalunata ku bunkutu ku Babiloni."

⁴⁴"Bataayi ba beetu baba na musaampu wa kimbaangi ku nsi yankatu, bunu bwa batuma Nzaambi kuri Moose, mu kuyirika musaampu mu kifwaani bunu bu kamwiini.

⁴⁵Bataayi beetu, ha mambisa ma kumutaambula, bakotiso nde mu lutumu lwa Yoswa mu mansi, ma baheeri Nzaambi, ha mambisa ma kubinga makaanda, natee mu biluumbu bya Davidi.

⁴⁶Nde wabakiri bweese ha busu bwa Nzaambi, Na waloombo miswa mya kutuunga nzo yangisi kuri bilesi bya Yakobe.

⁴⁷Ngo Solomo wamutuungila nzo.

⁴⁸Ngo Mwa-yulu ka koodzakala mu manzo matuunguma mu myooko mya baatu ko, bunu buleele mubikiri ti:

⁴⁹"Yulu ngo mboloko yaami, na butoto ngo nkata-miilu yaami. Nkya nzo beenu lutuungila me, bu leele Mfumu; bunu pe, nkya kibeendu kya mpuumunu beenu luyirikila me?

⁵⁰Buri kari myooko mya me myayirika byobinso bibyo ko?"

⁵¹Beenu baatu luri bangaa-tungu, luri na mitima na makutu makaangu, beenu lutungukilaa Mpeeve Yangisi mu mantaangu momanso, bunu bwaba bataayi beenu!

⁵²Nkya mubikiri wuri bataayi beenu bahele kukwaamisa? Bo badzusiri batekisiri kudzoonsolo mu nyisulu wasuunguma, mu lumalu mu wunde beenu lwakitukiri bayariki na badzusi.

⁵³Beenu lwataamburi mangisi kuri bambasi, ngo lwahele kumakebe."

⁵⁴Bu bayuka mamo, babaka mankesi munsa mitima mya bo, na bamukweetele miinu.

⁵⁵Estefano, bu kaluula mu Mpeeve Yangisi, watala ku yulu, wamono nkeembu Nzaambi, na wamono se Yesu wateleme ha lubakala lwa Nzaambi,

⁵⁶waleele ti: "Mono, me nyiri mu kumono mayulu mari mwaasi, na Mwaana muutu wateleme ha lubakala lwa Nzaambi.

⁵⁷Bu bafula misaakulu mu mbeembu yamakwa, baduka makutu ma bo, na mu mutima mosi, bo babwa mu nyutu Estefano.

⁵⁸Bo bamutuba ku mbisa bula, na bamudzusila mu matari. Bambaangi basuusaa biyuungu bya bo ha miilu mya kituuti kimosi, nkuumbu yaandi Sawulo.

⁵⁹Bo badzusa Estefano mu matari. Estefano wasaambila waleele ti: "Mfumu Yesu! Taambula kiluunsi kyaami."

⁶⁰Bu katsukuma, wafula musaakulu mu mbeembu yayinene ti: "Mfumu, yaa bataangula sumu dimadi ko." Bu kaleele mamo, Nde wabwa tolo.