Read Beembe Biy 8 Bible Online

Biy 8 - Beembe bible

Biy 8

¹Sawulo wamono ti bwabubwe bu badzusa Estefano. Mu kiluumbu kikyo, kwabwa nkwamusunu dzadzinene mu dibuundu dya Yerusalemi. Bobanso batsyamikina mu mansi ma Yudaya na ma Samariya; ha yulu bani bantumu bari basii yitika ko.

²Baatu bari na kinzaambi kyangwanwa badziika Estefano na bamudila mu ngebe dzalaka.

³Sawulo waba kwetsaamuna dibuundu; nde waba kwekoto mu nzo-nzo, waba kwepalisa mu makwa babakala na bakyeetu, na kubasoko mu boroko.

⁴Bobanso baba tsyamikisi bayaabisa Musamu Wamubwete mu baba kweyendaana.

⁵Filipo wasunduka ku bvula [dimosi] dya mu nkoonsi ya Samariya, mu kuyaabisa Kiristo kuri baatu.

⁶Mu mutima mosi, mampuumbu ma baatu maba makaangama mu nyikusulu dza Filipo, mu kuyuka na kumono bidiimbu bi kaba kwesa.

⁷Mukwongo, mampeeve mamabi maba mu baatu balaka mapala, kuri makwefula misaakulu myaminene. Balaka babobo binamu na babeele miilu batsiinikini.

⁸Kiminu kyalaka kyamonikini munsa bvula didyo.

⁹Mubakala mosi, nkuumbu yaandi Simoni watekisiri kuba ha bulu bubwo, waba kwesalilaana bungaanga, na baatu bari Samariya baba pamukaana mu mi kaba kweyirikaana. Nde-meene waba kwetsimaana ti nde muutu wamunene.

¹⁰Bobanso, kuholosono bakuutu natee bilesi, baba bakaangama mu nde, na baba kweleelaa ti: "Muutu wumawu ngo mpinu dza Nzaambi, dzi bateelaa ti "Dzadzinene"."

¹¹Bo baba bakaangama mu nde, mu ntoono yiri ti, kuholosono na kidzika, mu mukisi waandi, nde waba kwebapamunaana.

¹²Mu ntaangu yi basiiri bo kanyi mu Filipo wayaabisiri Musamu Wamubwete, wa Kimfumu kya Nzaambi, na wa nkuumbu ya Yesu Kiristo, babakala na bakyeetu bataambula mbotokulu

¹³Simoni nde-meene se wasa kanyi na wataambula mbotokulu. Nde wakaangama na Filipo na wapamuka, bu kaba kwemonaana bidiimbu na bimaangu byabinene byaba kweyirimaana.

¹⁴Bantumu basiiri ku Yerusalemi, bu bayuka ti bari Samariya bataambirye maampu ma Nzaambi, baheeke Petelo na Yowane kuri bo.

¹⁵Bu basunduka, basaambila mu bo mpisi bataambula Mpeeve Yangisi.

¹⁶Mukwongo, Mpeeve Yangisi yaba yakiri kubwa pe ti mu mosi mu bo, kunu kubotoko baba bamwaabotoko mu nkuumbu Mfumu Yesu.

¹⁷Hanaho, ba Petelo na Yowane babatetekele myooko, na bataambula Mpeeve Yangisi.

¹⁸Simoni bu kamono ti, Mpeeve bayiha mu ntetukulu myooko mya bantumu, wabaha mboongo,

¹⁹waleele ti: "Heenee me se lutumu lulwo, mpisi kuri wunde wunyitetekele me se myooko, kataambula Mpeeve Yangisi."

²⁰Petelo waleele kuri nde ti: "Mboongo dzaaku kintwaari na ye fuukeenu, bukuri ye kutsima ti kikabu kya Nzaambi kusuumba mu mboongo!

²¹Ye wahele na ndaambu, wahele se na kikuuku mu maampu mamama, bukuri mutima ye wahele kusuunguma ha busu bwa Nzaambi;

²²Hango yiinga madyeele mu bubi bwaaku, na saambila Mfumu, kampe bakuhemisini bitsimi bya mutima waaku.

²³Me nyimono ti ye wuri na lubelu na bubayi."

²⁴Simoni wabvutula waleele ti: "Beenu-meene saambikilee me kuri Mfumu, mpisi mpele kubwilikila dyaambu ti dimosi, mu ma luleeriri beenu."

²⁵Hango bo, bu bata kimbaangi na kuyaabisa maampu ma Mfumu, babvutuka ku Yerusalemi. Bo bayaabisa Musamu Wamubwete mu mabula malaka ma ku Samariya.

²⁶Mbasi Mfumu yadzoonso kuri Filipo, waleele ti: "Teleme na holo nzila ya ku sude, yisunduka ku Yerusalemi natee ku Ngadza, nzila yiyo yahele na baatu."

²⁷Bu kateleme wayende. Na mono, muutu mosi wampokoro wa ku Etyopi, kisari kyakinene kya Kandake, mukebi busina bwa mbyaasi ya mukyeetu ya ku Etyopi, wayensi ku Yerusalemi mu kusaambila.

²⁸Nde waba weki mu kubvutuka, na wadzakala munsa kikokolo kyaandi, wukwetaanga mubikiri Esaya.

²⁹Mpeeve yaleele kuri Filipo ti: "Kokosolo na bakila kikokolo kikyo.

³⁰Bu kadzumuna, Filipo wayuka, nde wuri mu kwetaanga mukaanda wa mubikiri Esaya, waleele ti: "Buri wuri mu kuyuka ma wuri mu kwetaanga?"

³¹Nde waleele ti: "Dyaburi nyiyaabila, mbuti muutu wahele kubaangula kuri me? Na nde wateele Filipo mu kunwaata na wadzakala ha mpele nde.

³²Maampu ma kaba kwetaanga maba mamama: "Nde waba bunu kimeeme ki bari mu kunata ku kudzusa, na bunu mwaana kimeeme wahele na mbeembu, ha busu bwa wuri mu kumutebe myoosi. Nde wahele kudzibula munwa waandi.

³³Kusa kusaana kubamusaanini, nde kasii baka wumukalila buungu ko. Na wuyaabisa kiseendu kyaandi? Bukuri kidziingu kyaandi basukisiri ha butoto."

³⁴Mpokoro muutu bu kadzibula munwa waleele ti: "Leele me, mubikiri mu na kari mu kudzoonsolo? Mu nde-meene hoti mu mukimi?

³⁵Filipo wabaandika mu kuyikisa matinu, wayaabisa Musamu wamubwete wa Yesu kuri nde.

³⁶Bu baba mu kweyende mu nzila, batubuka hari maampa. Mpokoro muutu waleele ti: "Mono maampa moma, nki bi kakisila ye mu kubotoko me?" [

³⁸Nde watelemese kikokolo, Filipo na muutu wampokoro basunduka bo boolo mu maampa, na Filipo wamubotoko.

³⁹Bu bantoomboko ku nkoto, Mpeeve ya Mfumu yayisila Filipo; muutu wampokoro kasii bweese kumumono ko. Nde wanamitina nzila yaandi mu kiminu.

⁴⁰Filipo bamumono ku Adzoti, mu kweyikisa Musamu mu mabvula momanso natee watubuka ku Kayisareya.