Read Beembe Lom 1 Bible Online

Lom 1 - Beembe bible

Lom 1

¹Pawulo, nkutu Yesu Kiristo, wataambula mbila mu kuba ntumu na wu bari basoolo mu ntoono Musamu Wamubwete wa Nzaambi.

²Nzaambi watekisiri kusa nsiilulu kuri babikiri baandi mu Matinu Mangisi,

³mu mitariri Mwaana waandi, wabutukila mu kaanda dya Davidi mu muswinyi,

⁴wu kari kasa Mwaana Nzaambi, mu mpinu, bunu buri Mpeeve ya bungisi, mu mfulukulu ya bafwa, ngo Yesu Kiristo Mfumu yeetu.

⁵Mu nde turi twataambula bweese na buntumu, mu kuri ti makaanda momanso matumuma mu kanyi, mu nkuumbu yaandi,

⁶munsa mo beenu se luri baatu, bataambula mbila Yesu Kiristo.

⁷Kuri banduku ba Nzaambi bobanso ba mutima, bari ku Loma, bataambula mbila mu kuba bangisi: bweese na kiyeengi bifumunaa kuri Nzaambi, Taayi dyeetu, na kuri Mfumu Yesu Kiristo, biba na beenu.

⁸Hatete, me nyibvutula matoondo kuri Nzaambi yaami mu Yesu Kiristo, mu ntoono beenu bobanso, bukuri kanyi dyeenu bakwedzoonsolo mu dyo, mu nsi yansiina.

⁹Mukwongo, Nzaambi mbaangi yaami, nde wu nyisalilaa me mu mpeeve yaami, mu nyabusulu Musamu Wamubwete wa Mwaana waandi: me nyibambukilaa beenu mwooyo kwahele kuhoto,

¹⁰mu nsaambulu dzaami, mu mantaangu momanso. Me nyiri mu kuloombaana mpisi mbaka, mu kutya kwa Nzaambi, mpwaani ya kwiisa kuri beenu.

¹¹Bukuri nyiri na musoongo walaka wa kulumono, mpisi heki nyilutubukila kikabu kyakimpeeve, mpisi luba bakumusu.

¹²Mimyo mu kuri ti tubeenee basyaamusu ha kimosi, ha nyiba kuri beenu, mu kanyi dyantwaari kuri beenu na kuri me.

¹³Bampaangi, me ntii ko ti beenu luba kunsa lubu. Mantaangu malaka me nkootsimaa kwiisa, mu kutolo bimbutu kuri beenu na kuri makaanda makaka, ngo natee mu lumalu me bankabikisa.

¹⁴Me nyiri na ma nyelemini kuyirika kuri Bahelene na kuri banzeense, kuri bangaa-madyeele na kuri madzeeke se.

¹⁵Mu didyo, me nyiri na musoongo wa kuyaabisa Musamu Wamubwete kuri beenu se bari Loma.

¹⁶Mukwongo, me nyahele na nsoni mu Musamu Wamubwete, bukuri nde ngo mpinu dza Nzaambi, mu mvuukulu ya mpisi wunde wusiila kanyi, ha tete kuri Bayudayo tumi kuri Bahelene.

¹⁷Bukuri nsungumunu ya Nzaambi yayabakana mu nde, mu kanyi na mu ntoono kanyi bunu bu diri dyatinu: «Ngaa-kusuunguma sa kaba mwooyo mu kanyi.»

¹⁸Mukwongo, kunu kinsongi-yulu, nkesi dza Nzaambi dzimonokinaa mu baatu bahele na kinzaambi, na bari na bubayi, basweekaa ngwanwa kunsa bubayi,

¹⁹ngo mari lo bayaaburi mu Nzaambi, mari mamonokono kuri bo, bukuri Nzaambi wabasoongo mo.

²⁰Mukwongo, bitotolo bya nde byahele kumonokono, mpinu dzahele manunu na bunzaambi, kuholosono nyirikulu nsi, biri byamonokono mbuti babimwiinini mu biyiriki byaandi. Ngo bo ka babaka mpemisi ko,

²¹bukuri bu bayaaba Nzaambi, ka basii kumukeembese bunu Nzaambi ko, bunu pe kubvutula matoondo kuri nde ko. Kasi bayeki bamikangala mu nsimunu yaaku, na mitima mya bo mya buwulu miri kunsa mampimbisi.

²²Bo batsima kuba bangaa-madyeele, ngo bilawuku bari,

²³na bayeki baha nkeembu Nzaambi yiri yafwaa ko, kuri biteki biri mu kifwaani kya muutu wufwaanaa, kya banoni, kya bibulu na kya banyoko.

²⁴Hango-nkuumbu, Nzaambi kari kabayekele mu nsumukunu mu nzila ya nyiimunu dza mitima myaaku, mu kuhele kukiinsa manyutu ma bo-meene.

²⁵Bo bakituri ngwanwa ya Nzaambi yeki mpya, badumusini na basaambiri kiyiriki ha kibeendu kya Muyiriki, nde wuri wasakumunu kwahele manunu. Amene.

²⁶Hango-nkuumbu, Nzaambi kari kabayekele mu mantiilu mansoni. Mukwongo, bakyeetu ba bo bahotiri kwepala na babakala, mu kwesakisina na bambaasi bakyeetu.

²⁷Bwobumosi se babakala, bahotiri kwepala na bakyeetu, basangumiki mu mampwiisu ma bo na bo, mu kweyirika myansoni babakala na babakala, na kutaambula mufutu wayelemene na nzimbukulu ya bo-meene.

²⁸Ngo bukuri bahele na musoongo wa kuyaaba Nzaambi mu ngwanwa, Nzaambi wabayekele kunsa madyeele maaku mamabi, mu kweyirika mahele kuyelemene.

²⁹Bayeki baluula mu momanso ma bubayi, mu mutima-bubi, mu ntiki-mboongo, mu nyirikulu mamabi; baluula mu musoki, nzusulu baatu, mu mayumu, mu mawunu, mu ndyaatulu dzadzibi. Bo bangaa-saana,

³⁰bangaa-makele, bataatu ba Nzaambi, bangaa-kinwa, bangaa-masiiku, bangaa-nzala-kubila, bari na madyeele mu nyirikulu myamibi, bari na tungu kuri bataayi na banguri.

³¹Bo bahele na madyeele, bahele na ngwanwa, bahele na musoongo mu bambaasi, bahele na mutima wangebe.

³²Bo bayaari mukesu wa Nzaambi, ti bayirikaa ma bubwo lo bayelemeni kubadzusa; ngo kasi kari kunu kuyirika bari mu kumiyirika ko, ngo bari mu kwesyaamisa se baatu bakwemiyirika.