Read Beembe Lom 10 Bible Online

Lom 10 - Beembe bible

Lom 10

¹Bampaangi, ma nyitiisila me kunsa mutima waami, na mu lusaambulu lwaami kuri Nzaambi mu bo, kuri ti baba babvuukusu.

²Mukwongo, me nyita kimbaangi mu bo ti bari na kuheme mu Nzaambi, ngo kasi bahele na nyaabulu.

³Mukwongo, babaanaa bahele kuyaaba nsungumunu ya Nzaambi, na bakwesaka kusalila nsungumunu ya bo-meene, lo bahele kuba batumuma mu nsungumunu ya Nzaambi.

⁴Bukuri Kiristo ngo nsukulu ya mangisi, mu ntoono nsungumunu, ya mpisi wunde wusa kanyi.

⁵Mukwongo, Moose watina mu mitariri nsungumunu ya mangisi ti: «Muutu wumasalila, sa kaba wamwooyo mu mo.»

⁶Ngo kasi, nsungumunu mu kanyi yiri mu kuleele bumabu: «Yaa leele mu mutima waaku ko ti: Na wunde wunwaata ku yulu?» Mbangukulu lo ti: mu kusundula Kiristo.

⁷Bunu pe ti: «Na wusunduka ku nsi ya bafwa?» Mbangukulu lo ti: mu kutoombolo Kiristo mu bafwa.

⁸Ngo nki diri mu kuleele? «Maampu mari bebele na ye, mari munsa munwa waaku, na munsa mutima waaku.» Mamo ngo maampu ma kanyi ma turi mu kweyaabisa.

⁹Mbuti ye leeriri mu munwa waaku ti Yesu ngo Mfumu, na siiriri kanyi mu mutima waaku, ti Nzaambi wamufulukisa mu bafwa, lo ye sa bvuuka.

¹⁰Mukwongo, mu mutima bakoosiilaa kanyi mu kubaka nsungumunu, na mu munwa bakootambukilaa mu kubaka mvuukulu.

¹¹Mukwongo, Matinu maleele ti: «Mpisi wunde wusiila kanyi mu nde, lo kafwa nsoni ko.»

¹²Mukwongo, kwahele nsobokoso ha kakati dya Muyudayo na Muhelene. Bukuri bobanso Mfumu mosi, wuri kisina kuri bobanso bakoomuteelaa mbila.

¹³Mukwongo: «Mpisi wunde wuteele nkuumbu ya mfumu, lo sa kaba kabvuuka.»

¹⁴Ngo dyaburi bateelele wunde wuri bahele kumusiila kanyi? Dyaburi basiila kanyi mu wunde wuri bahele kuyuka badzoonsolo mu nde? Dyaburi bayukila, mbuti kwahele wuyaabisa?

¹⁵Na buri bayabisila, mbuti bahele kubaheeke? Bunu bu diri dyatinu ti: «Miri myamibwete, miilu mya babo bakweyaabisa misamu myamibwete!»

¹⁶Ngo kasi, bobanso bahele kutumuma mu Musamu Wamubwete. Mukwongo, bunu buleele Esaya ti: «Mfumu, na wasiiriri kanyi mu ma kayukiri kuri beetu?»

¹⁷Hango, kanyi difumunaa mu mi bayukaa, mi bayukaa mu maampu ma Kiristo.

¹⁸Kasi me nyifuula ti: buri basii kuyuka ko? Heehe bayukiri kwaandi! «Mbeembu bo yayukukuna mu nsi yansiina; na maampu ma bo matubuka natee mwasukuna butoto.»

¹⁹Kasi me nyifuula ti: buri Isaheli wuri kasii bakula ko? Moose ngo watete mu kuleele ti: «Me sa nyalusa bangaa-bukwa, mu babo bahele kuba kaanda; me sa nyalubakisa nkesi, mu kaanda dyahele na nyukulu.»

²⁰Esaya se wutsiitsa kuleele ti: «Babo bari bahele kwesaka me, banzuukiri; na me nyamonikini kuri babo bari bahele kwemfuula.»

²¹Ngo kuri Isaheli nde wuleele ti: «Mpisi kiluumbu, me nyalaamburi myooko myaami, kuri baatu bari na nko, na bari na tungu.»