Read Beembe Lom 11 Bible Online

Lom 11 - Beembe bible

Lom 11

¹Hango me nyifuula ti: buri Nzaambi wayekele baatu baandi? Ti bele na dyo pe! Mukwongo, me Mu-isaheli, nyapalila mu Abalaami, mu mwooyo wa Benyamini.

²Nzaambi wahele kuyekele baatu baandi ba katekisiri kuyaaba. Hoti beenu lwahele kuyaaba ma leele Matinu mu Eliya, ha kari mu kunyoongono Isaheli kuri Nzaambi?

³«Mfumu, badzusiri babikiri ba ye, batsyaamini madziku maaku na me me-kaka nyasiiri, na basaka kunzusa.»

⁴Ngo kasi, nkya mvutu Nzaambi kari kamuha? «Me nyasweeke mu ntoono ya me-meene, mafuunda nsaamu ma baatu, bari bahele kutsukumina Baali.»

⁵Ngo bwobumosi se mu ntaangu yimayi, kuri ndaambu Baatu yasaala, bunu buri nsoolulu ya bweese.

⁶Ngo mbuti mu bweese, lo kusii kuri ko ti mu biyiriki, bukuri bweese, lo busii bweese ko.

⁷Hango buri? Bikwesaka Isaheli, wahele kubibaka; ngo kasi wunde wu bari basoolu wabibaka; ngo bakaka babakubisa mutima,

⁸bunu bu diri dyatinu: «Nzaambi wabaha mpeeve ya mbwiilu tolo, miisu mu kuhele kumono, na makutu mu kuhele kuyuka, natee mu kiluumbu kya lu.»

⁹Na Davidi wuleele ti: «Hemese ndiilu yaaku yiba kuri bo mweete na siinga, mpwaani ya kubwa mu masumu na ya kutaambila maseembu.

¹⁰Hemese miisu mya bo miba mampimbisi, mpisi bahele kumono; na sa kuri ti mambisa ma bo maba ma koromo mu mpisi ntaangu.»

¹¹Ngo me nyifuula ti: buri bo babumuna kya ngo bari babwa? Ti bele na dyo pe! Kasi mu lumvuki lwa bo, ngo makaanda mari mabaka mvuukulu, mpisi heki bo basa bukwa kuri makaanda.

¹²Ngo mbuti heki lumvuki lwa bo ngo busina bwa nsi, na mbwiilu bo ngo busina bwa makaanda, lo dyaburi bahele kutaambula mibvuriri bubwete, mu ntaangu yiri bobanso bakukiri?

¹³Kuri beenu makaanda me nyeki dzoonso: Mu bukuri me nyiri ntumu kuri makaanda, nyikeembese kisalu kyaami,

¹⁴mbuti heki mu bubwo, lo me nsii kuri ti, baturi mu kaanda dya muswinyi basa bukwa, na me mvuukisa babamosi mu bo.

¹⁵Mukwongo, mbuti kusuusa kwa bo ha luteke, ngo nyukusunu na nsi, lo buri bubeele mvutukulu bo, mbuti ka bumwooyo mu bafwa ko?

¹⁶Mbuti ndaambu mbanda yiri yangisi, lo mbanda yoyinso se yangisi; na mbuti mwaansi wangisi, lo bimpaala se byangisi.

¹⁷Ngo mbuti mu muti wu bakunini, bimpaala byabimosi byatabulu, na ye wuri muti wa ku musitu, bakukwiikiri mu muti wunde, mu kuba kintwaari na bimpaala byasaala, na kutaambula maampa mafumuna mu myaansi,

¹⁸lo yaa sa kimweese ko kuri bimpaala byatabulu. Mbuti ye wusa kimweese, lo yaaba kuri ti, kari myaansi myamene mu ye ko, ngo ye wamene mu myaansi.

¹⁹Ye kampe sa leele ti: «Bimpaala bibyo babitabula, mpisi heki me mba nyakwiiku.»

²⁰Bwabubwete; bimpaala bibyo babitaburi bukuri byahele na kanyi, ngo kasi ye wakangimina mu kanyi. Yaa ba na masiiku ko, ngo ba na boomo.

²¹Bukuri, mbuti Nzaambi kasii wuungula bimpaala bya muti wamene mu nde-meene ko, lo ye se kakuwuungula ko.

²²Ngo moneeti buri mbweeyulu-mutima, na nkubulu mutima ya Nzaambi: nde wuri na nkubulu mutima kuri babo babwa, ngo wuri na mbweeyulu-mutima kuri ye, mbuti ye namitini kuba kunsa mbweeyulu mitima yiyo, mbuti ka bubwo ko, lo ye se sa bakuyusula.

²³Bo ngo bari, mbuti bahele kunamitina mu mpelulu kanyi, lo bo se sa baba bakwiiku; bukuri Nzaambi wakuka mu kubweese kubakwiika.

²⁴Mukwongo, mbuti ye kimpaala kya muti wa musitu, bakutabula na bakukwiika mu muti wakunu, lo buri dihele kubvulila bubwete mu bo, mu kuba bakwiiku mu muti wa bo-meene.

²⁵Bampaangi, me ntii ko ti beenu luba kunsa lubu, mu mitariri mpaanu yimayi, mpisi luhele kumonoko bunu bangaa-madyeele mu beenu-meene, bukuri nkubulu mutima ya ndaambu kaanda dya Isaheli sa yaba, natee makaanda momanso makotiri.

²⁶Na mu bubwo, Isaheli dyodinso diba dyabvuukusu, bunu bu diri dyatinu: «Wunde wukuula baatu sa kafumuna ku Syoni, sa kayusula tungu mu Yakobe.

²⁷Bubwo buba lulelusunu lu nyisa na bo, mu ntaangu yi nyiyisila masumu ma bo.»

²⁸Mu mitariri Musamu Wamubwete, bo bataatu mu ntoono beenu; ngo mu mitariri nsoolulu, bo banduku ba mutima mu ntoono bataayi,

²⁹bukuri bikabu na mbila Nzaambi bayisila ko.

³⁰Mukwongo, mu ntaangu yayikulu, beenu lwasiiri nko kuri Nzaambi, ngo kasi mu lumalu, beenu balubakila ngebe, ha lumbisa lwa nko dza bo.

³¹Bunubwo se, bo mu lumalu, basa nko ha lumbisa lwa ngebe dzi bari babakila beenu, mpisi heki bo se bababakila ngebe mu lumalu.

³²Mukwongo, Nzaambi wakaangisa bobanso kunsa nko, mpisi heki kabakila bobanso ngebe.

³³Busina, madyeele na nyaabulu ya Nzaambi biri na musundu; nsundusulu dzaandi dziri na bwa kufyongokono ko, na manzila maandi mari na bwa kukotolo ko.

³⁴Mukwongo, «Na wayaaba kitsimi kya Mfumu? Bunu pe na waba muhe-mandoongi kuri Mfumu?

³⁵Bunu pe, na waha kuri nde, mpisi nde kamubvutukila?»

³⁶Bukuri byobinso kuri nde, mu nde na bya nde. Kuri nde kuba nkeembu mu bibvu! Amene.