Read Beembe Lom 12 Bible Online

Lom 12 - Beembe bible

Lom 12

¹Hango me nyisyaamisa beenu bampaangi, mu kyaari kya Nzaambi, mu kuyekele manyutu meenu bunu kikabu kyamwooyo, kyangisi na kyabweeye kuri Nzaambi. Yiyo ngo nsambukulu yangwanwa kuri beenu.

²Yaa lunama bifu bya ntaangu yimayi ko, ngo kasi beenee bakituka mu nkitukulu ya kiluunsi, mpisi lufyongokono bunu buri kutya kwa Nzaambi, kwakubwete, kwatya na kuri na nyirimunu yakuka.

³Mukwongo, me nyileele ti, mu bweese bu bari baha kuri me, kuri mpisi muutu mu beenu, mu kuhele kuba na ndyaatulu ya masiiku, yalutila kiteesu, ngo beenee na ndyaatulu ya madyeele, bunu buri kiteesu kya kanyi, dyaha Nzaambi kuri muutu-muutu.

⁴Mukwongo, bunu bu turi na binamu byalaka mu nyutu mosi, ngo binamu byobinso byahele kuba na kisalu kimosi,

⁵bunubwo se, beetuneenu turi balaka, ngo turi nyutu mosi mu Kiristo, na mpisi muutu wuri kinamu mu nyutu mbaasi.

⁶Turi na bikabu byasobokono, bunu buri bweese bu bari batuha. Mbuti mbikululu, lo yiba bunu bu yelemini mu kanyi;

⁷mbuti kisalu, lo mu kisalu; mbuti muyikisi, lo mu nyikusulu;

⁸mbuti musyaamisi, lo mu nsyamusunu; mukabiri, lo kaheele mu mutima-kikabu; mutwaalisi, lo katwaalisila mu kuheme; ngaa-ngebe, lo kasalila mu kiminu.

⁹Ntiilu yiba yahele na bumpitu-bumpyoongo. Yitikee mamabi, kaangamee mu mamabwe.

¹⁰Mu mitariri ntiilu ya kimpaangi, beenee na bundeembu beenu na beenu, silisineenu bukwa beenu na beenu kunsa lukiinsu.

¹¹Beenee na kuheme nkani ka bulyeebu ko, salilee Mfumu mu mpeeve ya bumfifu.

¹²Beenee na kiminu mu nsiitu, beenee na nkindusulu-mutima mu mpasi, beenee basyaama mu lusaambulu.

¹³Bakisee bangisi mu manzala maaku, namitinee mu ntambukulu banzeense.

¹⁴Sakumunee babo bakwelukwaamisa, basakumunee yaa lubabulula mampopi ko.

¹⁵Monee kiminu na babo bari mu kiminu, dilee na babo bari mu kudila.

¹⁶Beenee na nyukusunu beenu na beenu, yaa luba na masiiku ko, ngo tambukilee ma kuluka. Yaa lumonoko ba bangaa-madyeele mu beenu-meene ko.

¹⁷Yaa lwebvutula bubi mu bubi kuri muutu ko, sakee kuyirika mamabwe ha busu bwa baatu bobanso;

¹⁸mbuti bwadzuka, na diri mu miswa mya beenu, lo beenee na kiyeengi na baatu bobanso.

¹⁹Banduku ba mutima, yaa lubvutula kitete ko, ngo hemesee nkesi dza Nzaambi dzisala, bukuri dyatinu ti: «Me nyibvutula kitete, me nyikabula museendu,» bu leele Mfumu.

²⁰Kasi mbuti mutaatu waaku wuri na nzala, lo muha byandya; mbuti wuri na mpwiisu, lo wumuha maampa ma kunwa; bukuri wubaanaa wuyirika ma bubwo, lo makeengele ma mbaawu, wuri mu kukutukisa ha yulu mutu waandi.

²¹Yaa tala ko ti mamabi makubwiisa, ngo ye bwiisa mamabi mu mamabwe.