Read Beembe Lom 13 Bible Online

Lom 13 - Beembe bible

Lom 13

¹Mpisi muutu kaba watumuma kuri batumi ba kikuutu. Bukuri kwahele lutumu, mbuti kari lwafumuna kuri Nzaambi ko. Ntumu dzodzinso Nzaambi wadzisuusa.

²Hango, wunde wutungukila lutumu, lo telemisi kitaatu kuri lutumu lwa Nzaambi; na babo bangaa-tungu sa babwa mu mutsuundu bo-meene.

³Mukwongo, batumi bari ba kumwiinina boomo ko, mbuti mu biyiriki byabibwe, ngo mu biyiriki byabibi. Buri ye tiiri kubata lutumu ko? Yirika mamabwe, na ye sa wataambula masiiku kuri lutumu;

⁴bukuri lwo luri mu kisalu kya Nzaambi, mu ntoono bubwe bwa ye. Mbuti ye wuyirika mamabi, lo bata, bukuri kari kwa buunu ko, lutumu lukwenata mbeesi yayila. Mukwongo, lwo luri mu kisalu kya Nzaambi, lubvutulaa kitete mu nkesi kuri wunde wuyirika mamabi.

⁵Hango-nkuumbu, diri mufunu mu kutumuma, kari munu mu kubata nkesi ko, ngo kasi mu dyaambu ditariri nsimunu.

⁶Mu ntoono yiyo se, beenu lukoofutaa mpaku; bukuri bo se bari mu kisalu kya Nzaambi, na bakaangama mu kisalu kikyo.

⁷Bvutuleenu kuri bobanso bi bari na miswa: mpaku kuri wu luyelemini kufuta mpaku; mukesu kuri wu luyelemini kufuta mukesu; kibvumi kuri wu luyelemini kubvumina; lukiinsu kuri wu luyelemini kukiinsa.

⁸Yaa lweba na bibiimbu bya baatu ko, mbuti ka kya kutilisina beenu na beenu ko, bukuri wutyaanaa mbaasi, wukukisaa mangisi.

⁹Mukwongo, mangisi mari ti: «Yaa ta kimpala ko, yaa dzusa ko, yaa yiba ko, yaa nyiima ko», na makaka, mari makufuka mu maampu mamama: «Tya mbaasi yaaku, bunu ye-meene.»

¹⁰Ntiilu yaa yirikaa mamabi kuri mbaasi ko; ntiilu ngo nkukusulu mangisi.

¹¹Yabee kuri ti, ntaangu yimwaatubuka, kyeki kilookolo ki luyelemini kuba naana, bukuri mu lumalu, mvuukulu yeki yibvuriri bebele na beetuneenu, ti na mu ntaangu yi twasiiriri kanyi.

¹²Butsuku bweki la, bwiisi bweki bebele mu kukya. Ngo tulooseenu biyiriki bya mampimbisi, na tulwaatee binwaanunu bya buungi.

¹³Twedyaatileenu bunu buyelemini mu mwiini-ngeembe: kwahele ndiilu ya mawaamba, nkolulu malu, kimpala, buyala, mayumu na musoki,

¹⁴ngo kasi lwaateenu Mfumu Yesu Kiristo, na yaa lweyirika ma tiiri muswinyi ko, mu kuhele kuyukutisa nyiimunu.