Read Beembe Lom 14 Bible Online

Lom 14 - Beembe bible

Lom 14

¹Taambulee wunde wuri na bubolo mu kanyi, kwahele kusaana ma kakweleele.

²Wamosi wutsima ti, lo diiri kwaandi byobinso; wakaka bu kari na bubolo wukwedya binkoolo.

³Wukoodyaa, yaa kanyaafuna wuri kakoodyaa ko. Wuri kakoodyaa ko, yaa katsuundisa wukoodyaa, bukuri Nzaambi wamutaambula.

⁴Ye na wuri, mu kutsuundisa kisari kya ŋani? Kaba wateleme bunu pe wabwa, lo mitariri mfumu yaandi. Ngo sa kaba wateleme, bukuri Mfumu wuri na lutumu mu kumutelemese.

⁵Mukwongo, wamosi wusoolo kiluumbu ki kabvuriri kutya ti na kiluumbu kyakaka; wakaka wusoolo kiluumbu ngo kiluumbu; mpisi muutu wasingumina mu kitsimi kya nde-meene.

⁶Wunde wukweswaasisa biluumbu, wubiswaasisa mu ntoono Mfumu; wunde wukwedya, wudya mu ntoono Mfumu, bukuri wubvutulaa matoondo kuri Nzaambi; wunde wahele kwedyaa, wahele kudya mu ntoono Mfumu, na nde se wubvutulaa matoondo kuri Nzaambi.

⁷Mukwongo, kuri ti mosi ko mu beetu wuri bumwooyo mu nde-meene, na kuri se ti mosi ko wufwa mu nde-meene.

⁸Bukuri, mbuti turi bamwooyo, lo turi bamwooyo mu ntoono Mfumu; na mbuti tufwiiri, lo mu ntoono Mfumu tufwiila. Ngo ti hayuku turi bamwooyo, ti hayuku turi bafwa, lo turi baatu ba Mfumu.

⁹Bukuri mu didyo, Kiristo kari kafwiila na kari wamwooyo, mpisi heki kaba na lutumu ha yulu bafwa na bamwooyo.

¹⁰Ye buri wutsuundisa mpaangi yaaku? Bunu pe, ye buri wunyaafuna mpaangi yaaku? Mukwongo, beetu-banso sa twateleme ha busu bwa mutsuundu wa Nzaambi.

¹¹Bukuri diri dyatinu ti: «Me nyiri mwooyo, bu leele Mfumu: maboongo momanso sa matsukumina me, na ndima dzodzinso sa dzaha nkeembu kuri Nzaambi.»

¹²Hango-nkuumbu, mpisi muutu mu beetu sa katambikisa mabuungu ma nde-meene [kuri Nzaambi].

¹³Ngo yaa twetsuundisinee beetu na beetu ko; kasi tumonee dyo mufunu mu kuhele kusiila mbaasi nkakusulu, bunu pe mu kuhele kumubumisa makya.

¹⁴Me nyaari, na nyiri na nsiitu mu Mfumu Yesu, ti kuri kyasumuka mu kyo-meene ko; ngo mbuti muutu habaanaa wusa kitsimi ti kitotolo ki kyasumuka, lo mu nde kyeki kyasumuka.

¹⁵Ngo mbuti mu ntoono byandya, mpaangi yaaku wuri na ngebe, lo ye wahele kudyaatila bunu buri ntiilu. Mu ntoono ya byandya, yaa suumbula wunde wuri Kiristo wamufwiila ko.

¹⁶Kikyo kiri kyakibwe kuri beenu, yaa kiba kitoolo kya nsaanunu kuri bambaasi ko.

¹⁷Mukwongo, Kimfumu kya Nzaambi kiri mu byandya na mu nwiinu ko, ngo nsungumunu, kiyeengi, na kiminu mu Mpeeve Yangisi.

¹⁸Wunde wusalila Kiristo mu kiteesu kikyo, lo wabweeye kuri Nzaambi, na wataambulu kuri baatu.

¹⁹Hango-nkuumbu, hemese tusakee mamo ma kiyeengi, na ma ntuungulu ya beetu na beetu.

²⁰Mu ntoono byandya, yaa dzusa kisalu kya Nzaambi ko. Mukwongo, byobinso byatsyeemeke, ngo kasi buri bwabubi kuri muutu mu kudya byandya, mbuti wubumisa mbaasi makya.

²¹Buri bwabubwete mu kuhele kudya toongo, na kuhele kunwa malu, na kubisa byobinso biri lo bibwiisiri mpaangi yaaku mu masumu.

²²Kebe kanyi di wuri na dyo mu ye-meene, ha busu bwa Nzaambi. Kiminu kuri wunde wahele kubaka kibila mu ma katambukiri nde-meene.

²³Wunde wuri na maketi-keti mu bi kadya, lo wuri na kibila, bukuri ma kayirika mahele kufumuna mu kanyi. Mpisi mahele kufumuna mu kanyi, lo masumu mari.