Read Beembe Lom 15 Bible Online

Lom 15 - Beembe bible

Lom 15

¹Beetuneenu turi na makwa, tuyelemini kukuunda bubolo bwa babo bahele na makwa, na kuhele kweyirika mabweeye kuni kuri beetu-meene.

²Mpisi muutu mu beetuneenu kayirika ma kiminu kuri mbaasi yaandi, mu ntoono mamabwe mu ntuungulu.

³Mukwongo, Kiristo kasii saka ma kiminu mu nde-meene ko, ngo kasi bunu bu diri dyatinu: «Bitari bya babo batuka ye, byabwiilikila mu me.»

⁴Mukwongo, momanso ma batekisiri kutina, bamatinini mu ntoono nyikusulu ya beetuneenu, mpisi heki, tubaka nsiitu mu kifiki na mu nsyamusunu ya Matinu.

⁵Nzaambi ya kifiki na ya nsyamusunu, kasa kuri ti beenu luba na nyukusunu beenu na beenu, bunu buri kutya kwa Kiristo Yesu,

⁶mpisi heki, mu mutima mosi na mu munwa mosi, beenu lukeembese wuri Nzaambi na Taayi dya Mfumu yeetu Yesu Kiristo.

⁷Hango-nkuumbu, yendee lwetaambula bambaasi beenu na beenu, bunu bwa lutaambula Kiristo se mu ntoono nkeembu Nzaambi.

⁸Mukwongo, me nyileele ti, Kiristo wayisa kuba kisari kya bateende bubakala, mu ntoono ngwanwa ya Nzaambi, mu kukukisa nsiilulu dzi basiriri bataayi.

⁹Makaanda ngo mari, makeembese Nzaambi mu ntoono mutima waandi wangebe, bunu bu diri dyatinu: «Hango-nkuumbu, me sa nyadumusa ye ha kakati dya makaanda, na me sa nyayimbila mu ntoono nkuumbu yaaku.»

¹⁰Matinu mabweese kuleele ti: «Makaanda, monee kiminu, kintwaari na baatu baandi!»

¹¹Na ti: «Makaanda momanso, siikeenu Mfumu, na baatu bobanso bamudumusa.»

¹²Esaya wubweese kuleele ti: «Sa kwapala mutwiikila mu Yesayi, wuteleme mu kutuma makaanda, na makaanda sa masa nsiitu mu nde.»

¹³Hemese Nzaambi ya nsiitu kaluulusa mu kiminu kyokinso, na kiyeengi mu kanyi, mpisi luba lwabuukula mu nsiitu, mu mpinu dza Mpeeve Yangisi!

¹⁴Mu mitariri beenu, bampaangi baami, me nyirikiri kuyaaba ti, beenu se lwaluula mu mutima-bubwe, lwaluulusu mu nyaabulu yoyinso, na lwakuka mu kwelubusina beenu na beenu.

¹⁵Me nyalutinini mu kibakala mwamumosi, mu nzala kulubaambula mwooyo, mu ntoono bweese bwa mpa Nzaambi,

¹⁶mu kuba mu kisalu kya Kiristo Yesu, mu ntoono makaanda, bu nyayekele nyutu mu ntoono Musamu Wamubwete wa Nzaambi, mpisi makaanda maba kikabu kyataambulu, kyasakumunu kuri Mpeeve Yangisi.

¹⁷Hango, me nyiri na kimweese mu Kiristo Yesu, mu mya Nzaambi.

¹⁸Mukwongo, mbuti me nyitsiitsa kudzoonso, lo mu mya yirikiri Kiristo mu me, mu kuri ti makaanda matumuma, mu maampu na mu biyiriki,

¹⁹mu mpinu dza bidiimbu na dza bimaangu, mu mpinu dza Mpeeve ya Nzaambi. Mu didyo, me kuholosono ku Yerusalemi na ku lumperi natee ku nkoonsi ya Iluriko, nyakukisila kuyaabisa Musamu Wamubwete wa Kiristo.

²⁰Mu didyo, me nyaba na musoongo mu kweyaabisa Musamu Wamubwete, mumwo muri bakiri bahele kutaanguna Kiristo, mpisi heki me mpele kutuunga ha yulu lufulu lwa ŋani.

²¹Ngo kasi, bunu bu diri dyatinu: «Babo bari basii kubayaabisa nde ko, sa bamumono, na babo bari basii kuyuka badzoonsolo mu nde ko sa babakula.»

²²Mu didyo, me bankakisila mbala dzalaka mu kwiisa kuri beenu.

²³Ngo kasi mu lumalu, bukuri nsiiri na kibeendu kya kusalila mu mankoonsi mamo ko, nyiri na musoongo walaka mu kwiisa kuri beenu, kuholosono mibvu myalaka.

²⁴Mu ntaangu yi nyikweende me ku Espanya, mukwongo, nyitsima ti sa nyalumono ha nyiluta, na bumeeni kumono kiminu mu kuba na beenu mwaa-ntaangu, tumi lumpa biri mufunu mu budyeengi bwaami kukwo.

²⁵Mu lumalu, me nyeensi ku Yerusalemi, mu kweesalila bangisi.

²⁶Mukwongo, bari Makedonya na bari Akaya, bamwiini ti buri bwabubwete, mu kusoongo kintwaari mu ntoono bawelu bangisi ba ku Yerusalemi.

²⁷Bo bamwiini ti buri bwabubwete, na babee na kibiimbu kuri bo; bukuri mbuti makaanda mataamburi mamabwe ma kimpeeve kuri bo, lo mo se mayelemini kubasalila, mu bya mbakulu ya muswinyi.

²⁸Me manaa kuyirika mamo, na manaa kubaha lubakusu lulwo, me sa ndutula kuri beenu ha nyikweende ku Espanya.

²⁹Me nyaari ti, ha nyikwiisa kuri beenu, me sa nyiisa kuri nyaluula mu lusakumunu lwa Kiristo.

³⁰Bampaangi, me nyilusyaamisa, mu Mfumu yeetu Yesu Kiristo, na mu ntiilu ya Mpeeve, mu kunwaana kintwaari na me, mu nsaambulu kuri Nzaambi, mu ntoono me.

³¹Mpisi heki me mvuuka mu myooko mya bangooyi bari ku Yudaya, na lubakusu lu nyinata me ku Yerusalemi, luba lwataambulu kuri bangisi.

³²Mpisi heki me nyiisa mu kiminu kuri beenu, na mu kutya kwa Nzaambi, me mpuuma na beenu.

³³Hemese Nzaambi ya kiyeengi kaba na beenu-banso! Amene.