Read Beembe Lom 3 Bible Online

Lom 3 - Beembe bible

Lom 3

¹Hango mufunu wa kuba Muyudayo wuri hari, bunu pe ndaandu ya nteendulu bubakala yiri hari?

²Yiri yayinene mu monso. Bukuri kuri Bayudayo batekisiri kuha maampu ma Nzaambi.

³Heki mu nki? Mbuti babamosi basii ba bakwiikama ko, buri kuhele kukwiikama kwa bo, lo kuyaariri nkwikumunu ya Nzaambi?

⁴Ti bele na dyo pe! Nzaambi ngaa-ngwanwa, ngo kasi mpisi muutu wuri na mpya, bunu bu diri dyatinu: «Ye yelemini kuba wasuunguma mu nzoonsulu yaaku, mpisi ye luuluka ha bakutsuundisa.»

⁵Ngo mbuti kunsa bubayi bwa beetu nsungumunu ya Nzaambi yimonokono, lo nki tuleele? Buri Nzaambi kabaka nkesi, lo weki ngaa-bubayi? Me mu kimuutu nyiri mu kudzoonsolo.

⁶Ti bele na dyo pe! Lo dyaburi Nzaambi mbasi-tsuku katsuundisila nsi?

⁷Ngo mbuti mu mpya dza me, ngwanwa ya Nzaambi yimonokono na kensekelee mu ntoono nkeembu yaandi, lo mu nki babweese kutsuundisa me bunu ngaa-masumu?

⁸Hango, mamabi tuyirikee kweetu mpisi mamabwe miisa, kindeele babo bakwetufutukila, ti beetu turi mu kweeleele bubwo? Mutsuundu wu bataambula bo, wayelemene mu bo.

⁹Ngo nki? Buri beetu tubvuriri bweese ti na bambaasi? Pele! Mukwongo, beetu twatswiikisiri ti: na Bayudayo, na Bahelene bobanso bari kunsa lutumu lwa masumu;

¹⁰bu diri dyatinu: «Kuri muutu wasuunguma ko, kuri ti mosi ko,

¹¹kuri ti mosi ko wuri na madyeele, kuri ti mosi ko wukwesaka Nzaambi.

¹²Bobanso badziimbisa nzila, mu kintwaari bobanso basaala mufunu ko; Kuri ti mosi ko wuyirikaa mamabwe, nkati kwahele ti mosi.

¹³Miwiri mya bo, mampeembe mamwaasi, bakwesalila ndima dza bo mu kwewuna, mu bibori bya bo muri misya mya mpiri;

¹⁴minwa mya bo myaluula mu mampopi na mu misamu myankari;

¹⁵miilu mya bo myaleenge mu kwetsaamuna makila,

¹⁶mfukusulu na manyoongi biri mu manzila ma bo,

¹⁷bahele kuyaaba nzila ya kiyeengi.

¹⁸Kibvumi kya Nzaambi kyo pe ha miisu mya bo.»

¹⁹Tuyaari ti myominso mi leele mangisi, mitariri bari kunsa mangisi, mpisi bobanso bakaanga minwa, na nsi yansiina yitaambula kibila ha busu bwa Nzaambi.

²⁰Hango-nkuumbu, kuri muutu ko wuba walulukusu mu biyiriki bya mangisi, bukuri mangisi yini nyaabulu masumu makoohaanaa.

²¹Mu lumalu, Nzaambi mwaasoongo buri nde kaluulukisa kwahele mangisi, didyo dyatswiikusu mu mangisi na babikiri:

²²Nzaambi wuluulukisa bobanso, mu kanyi mu Yesu Kiristo. Mukwongo, kwahele nsobokoso,

²³bukuri bobanso bayirika masumu na bahelele nkeembu Nzaambi,

²⁴ngo nde wabalulukisa kwa mungengi mu bweese, mu nzila ya nkuululu yiyo yiri mu Kiristo Yesu.

²⁵Nde, Nzaambi kari kayakisa bunu kikori mu makila maandi mu nzila ya kanyi, mu kusoongo nsungumunu yaandi bu kahemisini masumu matekisiri,

²⁶mu ntaangu ya nkindusulu-mutima waandi. Nde wuri mu kusoongo nsungumunu yaandi, mu ntaangu ya lumalu, mpisi kaba wasuunguma nde-meene na kaluulukisa wunde wuri na kanyi mu Yesu.

²⁷Ngo masiiku mari hari? Mari ko. Mu nkya ngisi? Ya biyiriki? Pele, ngo mu ngisi ya kanyi.

²⁸Mukwongo, beetu tutsimini ti, muutu wuri walulukusu mu kanyi, kwahele biyiriki bya mangisi.

²⁹Buri Nzaambi ya bani Bayudayo yiri? Buri kari ya makaanda se ko? Bunubwo! Ya makaanda se yiri.

³⁰Ngo bukuri Nzaambi mosi kitsu, yiluulukisa mu kanyi, bateende bubakala na bahele kuteende bubakala.

³¹Ngo tuyisilee kwaandi mangisi mu ntoono kanyi? Pele! Yaa buba bubwo ko, ngo kasi beetu tutswiikisa mangisi.