Read Beembe Lom 4 Bible Online

Lom 4 - Beembe bible

Lom 4

¹Hango nki tuleele mu Abalaami mwaa-nkaaka yeetu? Nki kari kataambula mu muswinyi?

²Mbuti Abalaami mu biyiriki kari walulukusu, lo wuri na miswa mu kuba na masiiku; ngo ka ha busu bwa Nzaambi ko.

³Mukwongo, nki Matinu mari mu kuleele? «Abalaami kasaana kanyi mu Nzaambi, mu didyo kari walulukusu.»

⁴Ngo kuri wunde wuri mu kusalaa, mufutu lo wahele kumonoko bunu bweese, ngo bunu kitotolo ki kari na miswa.

⁵Kasi kuri wunde wahele mu kusala, ngo wasa kanyi mu wunde wululukisaana wa mungooyi, lo kanyi dyaandi dimonokini mu nsungumunu.

⁶Mu didyo se, Davidi kari mu kudzoonsolo mu lwambwe, lwa muutu wuri Nzaambi wamululukisa kwahele biyiriki:

⁷«Kiminu kuri babo bataambula mpemisi mu lumvuki lwaaku, na bari masumu maaku mahemusunu!

⁸Kiminu kuri muutu wunde wuri Mfumu wahele kumutaangila masumu!»

⁹Buri muutu wuri mu kiminu kikyo, wuni wateende bubakala, hoti wunde se wahele kuteende bubakala? Mukwongo, beetu bu tuleele ti: «Kanyi dya Abalaami dyamonokini bunu nsungumunu».

¹⁰Mu nkya ntaangu kanyi didyo dyamonokini bubwo? Mu ntaangu yiri weki wateende bubakala, hoti mu ntaangu yiri wakiri bubakala kuteende pe? Pele! Kari kuri mwaateende bubakala ko, ngo kuri wakiri bubakala kuteende pe.

¹¹Nde wataamburi kidiimbu kya nteendulu bubakala, bunu kinyemu kya ndulukulu yi kataamburi mu kanyi, ha kaba wakiri wahele kuteende bubakala, mpisi heki kaba taayi dya bobanso basaa kanyi, bakiri bubakala kuteende pe, kuri heki bo se, babamono bunu basuunguma.

¹²Na nde kaba taayi dya bateende bubakala, kari dya bani bateende bubakala ko, ngo se bakwenama bitaambi bya kanyi dya taayi dyeetu, Abalaami bu kaba wakiri bubakala kuteende pe.

¹³Mukwongo, kari mu nzila ya mangisi ko, ngo mu nzila ya ndulukulu mu kanyi, bari basa lusiilulu kuri Abalaami, bunu pe kuri bapalila mu nde, mu kuba mukondiri saala dya nsi.

¹⁴Mukwongo, mbuti bakoondiri ba saala, kubakula dyo mu mangisi, lo kanyi dyeki dyamukangala, na lusiilulu lusii ko.

¹⁵Mukwongo, mangisi mabutaa nkesi; haho hahele mangisi, lo halele se kusinina kwa mo.

¹⁶Hango-nkuumbu, saala kubakila mu nzila ya kanyi, mpisi heki mu bweese lusiilulu luba lwatswiikama kuri bobanso bapalila mu Abalaami, kari bani bapalila mu mangisi ko, ngo bapalila se mu kanyi dyaandi. Nde wuri taayi dya beetu-banso,

¹⁷bunu bu diri dyatinu: «Me nyasa ye taayi dya makaanda malaka.» Nde wuri ha busu bwa Nzaambi, yi kari kasiila kanyi, Nzaambi yibvutulaa bafwa mu bumwooyo, na yiyirika bitotolo biri bibeeri byo pe.

¹⁸Nde wasii kanyi, bu kasiiriri nsiitu mu mimyo myahele na bwa kusiila nsiitu, mpisi kaba «taayi dya makaanda malaka», bunu bu diri dyaleelu ti: «Bapalila mu ye sa baba balaka.»

¹⁹Nde kasii yekele kanyi dyaandi ko, ti bukuri waba weki na mpaangi-pe nkama mibvu, miilu myeki mu bulu, na Sara mwooyo wafwa.

²⁰Nde kasii yekele kanyi na kusa mpaka ko, mu nsiilulu dza Nzaambi, ngo kasi wabaka makwa mu kanyi, na waha nkeembu kuri Nzaambi.

²¹Nde waba nkati na nsiitu dzakuka, ti Nzaambi wakuka mu kuyirika mamo, ma kari kasa nsiilulu.

²²Hango-nkuumbu, «mu didyo bari bamwiinina ti wasuunguma».

²³Mamo mahele kuba matinu mu wunu nde kitsu ti: «Mu didyo, bari bamwiinina ti wasuunguma.»

²⁴Ngo kasi, mu beetu se, bari bayelemini kumono bubwo, basiilaa kanyi mu wunde wafulukisi Yesu, Mfumu yeetu, mu bafwa.

²⁵Nde bamuyekele mu ntoono masumu meetu, na Nzaambi wamufulukisi mpisi tuba basuunguma.