Read Beembe Lom 5 Bible Online

Lom 5 - Beembe bible

Lom 5

¹Ngo twayeki twaluulukusu mu kanyi, turi kiyeengi na Nzaambi, mu Mfumu yeetu Yesu Kiristo;

²mu nde se turi twabaka miswa, mya kutaambula mu kanyi mu bweese bubwo, bu turi twatelemene, na turi twasiila kimweese kyeetu, mu nsiitu ya nkeembu Nzaambi.

³Kari bunubwo kitsu ko, ngo beetu tusiila kimweese kyeetu mu mpasi, bu tuyaari ti mpasi dzibutaa kifiki.

⁴Kifiki kibuta ndulukulu mu nsindukulu, na ndulukulu mu nsindukulu yibuta nsiitu.

⁵Nsiitu dzadzusaa muutu nsoni ko, bukuri kuri Mpeeve Yangisi yibari batuha, yatsaamuna ntiilu ya Nzaambi mu mitima myeetu.

⁶Mukwongo, mu ntaangu yi twaba twakiri makwa pe, Kiristo wafwiilila mu bangaa-masumu mu ntaangu yayelemene.

⁷Mukwongo, diri dya mpasi ti muutu kataambula kufwa mu ntoono wasuunguma; kampe mu wamubwete se, lo muutu tamburi kufwa.

⁸Nzaambi wasoongo ntiilu yaandi mu beetu, bukuri, bu twaba twakiri bangaa-masumu, Kiristo watufwiila.

⁹Hango mu lumalu, bu tweki twalulukusu mu makila maandi, lo dibvuriri bubwete diri nde sa katubvuukisa mu nkesi dza Nzaambi.

¹⁰Mukwongo, mbuti ha twaba bataatu, Nzaambi wasuusa nyukusunu ha kakati dya nde na beetu, mu lufwa lwa Mwaana waandi, lo dyaburi tuhele kubvula kuba babvuukusu mu bumwooyo bwaandi, ha tumwaayukusuna na nde?

¹¹Kari mu mini mimyo kitsu ko, ngo beetu twasa kimweese kyeetu mu Nzaambi, mu nkuumbu ya Mfumu yeetu Yesu Kiristo, mu nde turi twataambula nyukusunu lumalu.

¹²Hango nkuumbu, bunu bwakotolo masumu mu nsi mu muutu mosi, na lufwa se mu ntoono masumu, bunubwo se lufwa lwakotolo mu baatu bobanso, bukuri bobanso babwa mu masumu.

¹³Mukwongo, natee mu ntaangu yaba mangisi, masumu maba mu nsi, ngo maba mahele mu lutaangu, bukuri mangisi maba mo pe.

¹⁴Koomosoko, kuholosono mu ntaangu ya Adami natee ya Moose, lufwa lwaba se mu baatu, bari basii yirika masumu mafwanikina na kusinina kwa mangisi kwa Adami ko. Nde wuri kifwaani kya wunde waba wuri mu kwiisa.

¹⁵Kasi, kikabu kya bweese kyahele kuba bunu buri kiteesu kya lumvuki. Ngo mbuti heki mu lumvuki lwa muutu mosi, lufwa luri lwakoto mu baatu balaka, lo dibvuriri mufunu diri bweese bwa Nzaambi, na kikabu kya bweese, mu muutu mosi, ngo Yesu Kiristo, bari baheele byo kwa mansaalisi kuri baatu balaka.

¹⁶Ngo kikabu kyahele kuba, bunu buri kiteesu kya muutu mosi wayirika masumu. Mukwongo, nkesulu mukanu yayisa mu mutsuundu wa muutu mosi; ngo kasi ndulukulu yayisa mu kikabu, ha mambisa ma lumvuki lwalaka.

¹⁷Ngo mbuti mu lumvuki lwa muutu mosi, lufwa lwatuma lwolukaka, lo dibvuriri mufunu diri ti, mu Yesu Kiristo kitsu, baatu bataambula kwa mansaalisi bweese na kikabu kya nsungumunu, sa batuma mu bumwooyo.

¹⁸Hango bukuri, mu lumvuki lwa muutu mosi, bobanso bari kunsa mukanu; bwobumosi se, mu nsungumunu ya muutu mosi, bobanso bataambula nsungumunu ya bumwooyo;

¹⁹bunubwo se buri, mu nko dza muutu mosi, balaka babwa mu masumu, bwobumosi se mu bintambukulu bya muutu mosi, balaka sa baba balulukusu.

²⁰Mangisi mayisa mpisi heki lumvuki lufunina; ngo haho hafunina masumu, hanaho se ha buukulaa bweese,

²¹mpisi heki, bunu bwaba masumu kuri mari na lutumu mu lufwa, bunubwo se bweese buri na lutumu mu nsungumunu, mu kuha kidziingu kyahele manunu, mu Yesu Kiristo, Mfumu yeetu.