Read Beembe 1 Kol 1 Bible Online

1 Kol 1 - Beembe bible

1 Kol 1

¹Me, Pawulo, nyataambula mbila bunu buri kutya kwa Nzaambi, mu kuba ntumu Kiristo Yesu, beetu na mpaangi Sosetene,

²tutina kuri dibuundu dya Nzaambi diri ku Korinto, kuri ba bari basakumuna mu Yesu Kiristo, bataambula mbila mu kuba bangisi, kintwaari na bobanso bateelaa nkuumbu ya Mfumu yeetu Yesu Kiristo, mu mpisi kibeendu, Mfumu bo, yiri ya beetu se.

³Bweese na kiyeengi bifumunaa kuri Nzaambi taayi dyeetu, na kuri Mfumu Yesu Kiristo biba na beenu.

⁴Me nyibvutulaana matoondo mantaangu momanso, kuri Nzaambi yaami mu beenu, mu ntoono bweese bwa luha Nzaambi mu Kiristo Yesu,

⁵bukuri mu nde, beenu lwayeki bisina mu momanso, mu maampu momanso na mu nyaabulu yoyinso.

⁶Mu didyo beenu luri lwasa kanyi dya makwa, mu kimbaangi ki bari bata mu Kiristo ha kakati dya beenu,

⁷kuri lo beenu luri ti na kikabu kimosi ki luri kyo pe ko, buluri mu kwekiingila monokunu ya Mfumu yeetu Yesu Kiristo.

⁸Nde ngo wulukumisa natee kunu manunu, mpisi heki luba bahele maseembu mu kiluumbu kya Mfumu yeetu Yesu Kiristo.

⁹Nzaambi wakwiikama, nde waluteele mbila mu kuba kintwaari na mwaana waandi Yesu Kiristo, Mfumu yeetu.

¹⁰Bampaangi, me nyiluyingukila mu nkuumbu ya Mfumu yeetu Yesu Kiristo, yukusuneenu beenu na beenu, na yaa kuba nkabunu ha kakati dya beenu ko; beenee kintwaari mu mpeeve mosi na mu kitsimi kimosi.

¹¹Mukwongo, bampaangi, me nyayukiri kuri baatu ba mu kaanda dya Kolowe ti, kuri nkalikisi ha kakati dya beenu.

¹²Bu ntiiri kuleele ti: ha kakati dya beenu, wamosi wuleele ti: «me nyiri kwaami wa Pawulo»; wakaka ti: «me wa Apolo»; wakimi ti: «me wa Kefa»; wuni ti: «me wa Kiristo».

¹³Buri Kiristo wakabulu? Buri Pawulo bakomini ha yulu kuruwa mu beenu? Hoti mu nkuumbu ya Pawulo beenu bari balubotoko?

¹⁴Me nyitoondo kuri Nzaambi, bukuri nyahele kubotoko ti mosi mu beenu, mbuti ka wunu Kirispo na Ngayo ko;

¹⁵Mu didyo, kuri wutsiitsa kuleele ko ti, mu nkuumbu me beenu luri lwataambula mbotokulu.

¹⁶Kindeele, me nyabotikiri se kaanda dya Estefana. Ha mambisa haho, nsimini ti kuri muutu mukimi wu nyiri nyabotoko me ko.

¹⁷Mukwongo, Kiristo wahele kuheeke me mu kubotoko, kasi mu kuyaabisa Musamu Wamubwete, ngo kwahele kusalila madyeele ma nzoonsulu, mpisi heki kuruwa dya Kiristo di hele kuba dyabuunu.

¹⁸Mukwongo, maampu ma kuruwa bubwo bulawuku, kuri baatu bari mu kudziimbila; kasi mu beetu turi babvuukusu lo dzidzo mpinu dza Nzaambi.

¹⁹Bukuri diri dyatinu ti: «Me sa nsyaamuna nyaabulu ya bangaa-nyaabulu, me sa ndooso madyeele ma bangaa-madyeele.»

²⁰Ngaa-nyaabulu wuri kuri? Mutini-mangisi wuri kuri? Ngaa-bunzoonsi mu ntaangu yi wuri kuri? Buri Nzaambi wahele kukitula nyaabulu ya nsi yimayi kuri yeki bulawuku?

²¹Mukwongo, bukuri nsi mu nyaabulu ya nde-meene wahele kuyaaba Nzaambi, kunsa nyaabulu ya Nzaambi. Nzaambi wamono dyo dyadibwete mu kubvuukisa, mu bulawuku bwa nyikusulu, baatu basiila kanyi.

²²Bayudayo baloombo bidiimbu, na Bahelene basaka nyaabulu.

²³Ngo kasi beetu, turi mu kweyaabisa Kiristo wakomono ha yulu kuruwa, Bayudayo babumina makya mu musamu wunde, na bangooyi bamono ti bulawuku,

²⁴kasi kuri bataambula mbila, Bayudayo na Bahelene, Kiristo ngo mpinu na nyaabulu ya Nzaambi.

²⁵Bukuri bulawuku bwa Nzaambi bubvuriri madyeele ti na baatu, na buyonsi bwa Nzaambi bubvuriri makwa ti na baatu.

²⁶Bampaangi, monee mbeti mbila beenu: ha kakati dyabeenu kwahele bangaa-madyeele balaka mu muswinyi, kwahele bangaa-mpinu balaka, kwahele balaka bari mu lwambwe.

²⁷Kasi, Nzaambi wasoolo bitotolo bya bulawuku ha nsi, mu kudzusa bangaa-madyeele nsoni; Nzaambi wasoolo bya buyonsi ha nsi, mu kudzusa bangaa-makwa nsoni;

²⁸Bitotolo bya hele mufunu na bya nyaafunu ha nsi, bya hele kuyirima, Nzaambi wabisoolo mu kuri ti katsyaamuna bibyo byayirima,

²⁹mpisi heki muutu ka hele kusa masiiku ha busu bwa Nzaambi.

³⁰Nde wasa kuri ti beenu luba mu Kiristo Yesu, wuri wayeki nyaabulu yeetu yifumuna kuri Nzaambi, nsungumunu, bungisi na nkuululu,

³¹mpisi heki diba bunu bwatinu ti: «mpisi wusa kimweese, lo kasiila kyo mu Mfumu.»