Read Beembe 1 Kol 10 Bible Online

1 Kol 10 - Beembe bible

1 Kol 10

¹Bampaangi, me ntii ko ti beenu luba kunsa lubu: bakuutu beetu bobanso baba kunsa mposi ya tuti, na balutila ha kakati dya mubu.

²Bobanso bataambula mbotokulu mu Moose, kunsa tuti na mu mubu.

³Bobanso badiiri byandya byobimosi bya kimpeeve,

⁴na bobanso banwa maampa momamosi ma kimpeeve; bukuri bo baba kwenwaa maampa mu tari dya kimpeeve, dyaba kweyendaa na bo; tari didyo dyaba Kiristo.

⁵Kasi balaka mu bo, bari Nzaambi kasii mono kiminu mu bo ko, bukuri bawii kufwa mu nsi yankatu.

⁶Misamu mimyo ngo kifwaani kuri beetu, kuri heki tuhele kuba bakwenyiima mamabi, bunu bwaba kwenyiimaana bo.

⁷Yaa luba bakwesaambila biteki ko, bunu babamosi mu bo, bunu bu diri dyatinu: «Baatu bamanaa kudzakala mu kudya na kunwa, ha batelemini mu kusakana.»

⁸Yaa tuyekelee manyutu mu buyala ko, bunu bwayirikiri babamosi mu bo, kuri mu kiluumbu kimosi, mafuunda makuumi moolo na matatu ma baatu bafwiiri.

⁹Yaa tubwiisa Kiristo mu nsindukulu ko, bunu bwaba sa babamosi mu bo, na bafwiiri mu misya mya banyoko.

¹⁰Yaa lumunguta ko, bunu babamosi mu bo bamungutini, na mufuukisi wubadzusiri.

¹¹Misamu mimyo myayirimini mu bo, mpisi miba kifwaani, na miri myatinu mu kuba nyikusulu kuri beetu, bari tweki mu mantaangu ma manunu.

¹²Mu didyo, wunde wutsima ti wateleme, kasa madyeele kahele kubwa.

¹³Nsindukulu dzi lubwanikina na dzo, dzahele kuba dzaluta kiteesu, ngo dzayelemene mu baatu. Nzaambi wakwiikama, nde kaha miswa ko ti beenu luba lwasindukulu mu kiteesu kibvuriri makwa na beenu, ngo kunsa nsindukulu, nde sa kuluha mpwaani ya kupalila, kuri lubangisina kukuunda.

¹⁴Hango-nkuumbu, banduku baami ba mutima, ya lwekokosolo ku bakwesaambila biteki ko.

¹⁵Me nyiri mu kuludzoonsolo bunu ti kuri baatu bari na nyukulu, fyongokineenu beenu-meene mi nyileele me.

¹⁶Mbasa ya lusakumunu yi tusakumunaana, yiri kintwaari na makila ma Kiristo. Mpa yi tubukunaana yiri kintwaari na nyutu Kiristo.

¹⁷Bukuri, mpa mosi kitsu yiri, ngo beetu turi balaka mu nyutu mosi kitsu, bukuri tukabulaana mpa yo yimosi.

¹⁸Monee meti Isaheli mu muswinyi: babo badyanaa byaha mu bikabu, bari kintwaari na dziku.

¹⁹Ngo me ndeele ti kwe? Buri toongo twaha mu kikabu turi mufunu, hoti biteki biri mufunu?

²⁰Bu ntii kuleele ti, bi bakoohaanaa bibyo, kuri mampeeve mamabi babihaanaa, nkani ka kuri Nzaambi ko. Ngo me ntii ko ti beenu luba kintwaari na mampeeve mamabi.

²¹Beenu kalutsiitsa kunwa mbasa ya Mfumu, na mbasa ya mampeeve mamabi ko; beenu kalutsiitsa kudya kintwaari ha taabala na Mfumu, na kudya se kintwaari ha taabala na mampeeve mamabi ko.

²²Hoti bukwa bwa Mfumu tutii kubvulumina? Buri beetuneenu tubvuriri makwa na nde?

²³Myominso miri miswa, ngo myominso myahele mufunu; myominso miri miswa, ngo myominso myahele kutuunga.

²⁴Muutu yaa kesaka ndaandu yini ya nde-meene ko, ngo kesaka se ya mukimi.

²⁵Dyeenee mpisi bi bayarikaa ha dzaandu, kwahele kweha bifuuri, ngo kuri mutima waholo;

²⁶bukuri butoto, na byobinso biri ha butoto, biri bya Mfumu.

²⁷Mbuti mosi mu bangooyi, wuluteeriri mbila na lutaamburi kweende, lo dyeenee mpisi bi baluheeri, kwahele kuha bifuuri, ngo beenee na mu mutima waholo.

²⁸Kasi mbuti muutu wululeeriri ti: «Tu toongo tuha mu kikabu kuri biteki», lo yaa ludya ko, mu ntoono nde wuluyaabisiri, na mu ntoono nsimunu.

²⁹Nsimunu yi nyiri mu kudzoonsolo me, kari ya nde-meene ko, ngo ya muutu mukimi. «Bukuri nki, bunsaalisi bwa me buri bwatsuundusu mu nsimunu ya muutu mukimi?

³⁰Mbuti me nyibvutulaa matoondo mu bi nyidya, lo buri bateesele me mamabi, mu mi nyiri mu kubvutula matoondo?»

³¹Ngo ti hayuku luri mu kudya, ti hayuku luri mu kunwa, ti hayuku ntoono yikimi luri mu kuyirika, lo yirikeenu momanso mu nkeembu ya Nzaambi.

³²Yaa lwebumisa baatu makya ko, ti Bayudayo, ti Bahelene, ti dibuundu dya Nzaambi,

³³ngo beenee bunu me, wuri mu myominso, nyisakaa kubweeye kuri bobanso. Me nyahele kusaka ndaandu ya wunu me-meene kitsu, ngo ndaandu ya balaka, mpisi baba babvuukusu.