Read Beembe 1 Kol 12 Bible Online

1 Kol 12 - Beembe bible

1 Kol 12

¹Bampaangi, mu ntoono ya bikabu bya kimpeeve, me ntii ko ti beenu luba kunsa lubu.

²Ha lwaba lwakiri bangooyi, beenu luyaari dyaburi lwaba luri lwatwaalusu, mu kweyende kuri biteki, byahele na mbeembu.

³Hango-nkuumbu, me ntii kuluyaabisa ti, kuri muutu ko mu Mpeeve ya Nzaambi wuleele ti: «Yesu kabwilikila mpopi!», na kuri muutu ko wutsiitsa kuleele ti: «Yesu Mfumu!», mbuti Mpeeve Yangisi yahele kumutwaalisa.

⁴Bikabu bya bweese biri mu bitsuumbu-bitsuumbu, ngo Mpeeve yiniyo;

⁵Bisalu biri mu bitsuumbu-bitsuumbu, ngo Mfumu yiniyo;

⁶Biyiriki biri mu bitsuumbu-bitsuumbu, ngo Nzaambi yiniyo, yiyirikaa momanso mu bobanso.

⁷Kuri muutu-muutu Mpeeve yamonokono mu kikabu, mu ntoono ya mamo mari mufunu.

⁸Mukwongo, kuri wamosi Mpeeve waha maampu ma madyeele, kuri wakaka maampu ma nyaabulu bu tiiri Mpeeve yiniyo,

⁹kuri mukimi kanyi mu Mpeeve yiniyo, kuri wakaka se bikabu bya kubelekise babeeru, mu Mpeeve yo yimosi,

¹⁰kuri wakaka nyirikulu bimaangu, kuri wakaka mbikululu, kuri wakaka mfyongokunu mampeeve, kuri wakaka mandiinga ma bitsuumbu-bitsuumbu, kuri wakaka kubaangula mandiinga.

¹¹Myominso mimyo, yini Mpeeve yo yimosi na yiniyo yikwemiyirika, na yikwekabula bunu bu katiiriri kuri muutu-muutu.

¹²Mukwongo, bunu buri nyutu yiri mosi ngo binamu byalaka, na bunu buri binamu bya nyutu biri byalaka ngo mu nyutu mosi, bunubwo se buri mu Kiristo.

¹³Bukuri beetu-banso batubotoko mu Mpeeve yomosi, mu nyutu yomosi, ti Bayudayo, ti Bahelene, ti bankutu, ti baatu bari na bunsaalisi, na beetu-banso batunwiisa mu Mpeeve yomosi.

¹⁴Mukwongo, nyutu yahele kuba kinamu kimosi, ngo binamu byalaka.

¹⁵Ngo mbuti kuulu kuleeriri ti: «Me bukuri nyiri kooko ko, lo me nyahele mu nyutu», buri mu bubwo lo nde hotiri kuba mu nyutu?

¹⁶Na mbuti kutu dileeriri ti: «Me bukuri nyiri diisu ko, lo me nyahele mu nyutu», buri mu bubwo lo nde hotiri kuba mu nyutu?

¹⁷Heki mbuti nyutu yoyinso kuba diisu, lo kuyukula buri? Na mbuti kuba kutu, lo mfuku kuyukila buri?

¹⁸Ngo mu lumalu, Nzaambi wasuusa mpisi kinamu mu nyutu bunu bu katiiriri.

¹⁹Mbuti byobinso byaba kinamu kimosi, lo nyutu hari yaketi kuba?

²⁰Kasi mu lumalu, binamu byalaka biri, ngo nyutu yomosi.

²¹Diisu lo dibangusina kuleele kuri kooko ko ti: «Me nyiri na nzala ye ko!», Bunu pe mutu se, lo kabangusina kuleele kuri miilu ko ti: «Me nyiri na nzala beenu ko!»

²²Ngo kasi binamu bya nyutu, byamonokono kuri ti bibvuriri buyonsi, biri mufunu.

²³Bibyo bi tumono kuri ti, bya lukiinsu lwantele mu nyutu, bibyo ngo bi turi mu kuha lukiinsu lwalunene; na bibyo bya kibvumi kyantele, ngo bi tubvuminaa kwalaka,

²⁴ngo bya kibvumi kyalaka byahele na nzala kibvumi kyeetu. Kasi Nzaambi wayirika nyutu mu kiteesu kya kuha lukiinsu lubvuriri bunene, kuri binamu byahele na lwo,

²⁵mpisi kuhele kuba nkabunu mu nyutu, ngo kasi binamu biba na kintwaari, na kwetsimina bambasi byo na byo.

²⁶Mu didyo, kinamu kimosi kibaanaa kimono mpasi, lo binamu byobinso bimono mpasi; na kinamu kimosi kibaanaa kyakeembusu, lo binamu byobinso bimono kiminu.

²⁷Beenu luri nyutu Kiristo, na mpisi muutu kinamu kya nyutu.

²⁸Mu dibuundu, Nzaambi bakasuusiri, dyatete bantumu, dyamoolo babikiri, dyamatatu bayikisi, tumi bangaa-bimaangu, bari na bikabu bya kutsinikisa babeeru, bya kubakisa baatu, bya kutwaalisa, bya mandiinga ma bitsuumbu-bitsuumbu.

²⁹Buri bobanso bantumu? Buri bobanso babikiri? Buri bobanso bayikisi? Buri bobanso bangaa-bimaangu?

³⁰Buri bobanso bari na bikabu bya kutsinikisa babeeru? Buri bobanso bakwedzoonso mandiinga? Buri bobanso bakwebaangula mandiinga?

³¹Beeneenu na kuheme mu bikabu bibvuriri bunene. Tumi me mbweese kulusoongo nzila yibvuriri bubwete.