Read Beembe 1 Kol 16 Bible Online

1 Kol 16 - Beembe bible

1 Kol 16

¹Mu mitariri ntolulu mboongo mu ntoono bangisi, beenu se yirikeenu bunu bu nyatumini me, kuri mabuundu mari ku Ngalatya.

²Mpisi kya lumiingu, muutu-muutu mu beenu kawuunguka ku nzo yaandi, bibyo bi kabangusini kukebe, mpisi bahele kukiinga ku nyikwiisa me mu kutolo mboongo.

³Mu ntaangu yi nyitubuka me, me sa nyaheeke baatu ba luri lwasoolo, na mikaanda mpisi banata bikabu bya beenu ku Yerusalemi.

⁴Mbuti bwayelemene ti me se nyeende, lo sa beende kintwaari na me.

⁵Me sa nyiisa kuri beenu ha nyilutila ku Makedonya; bukuri me ku Makedonya nyilutila.

⁶Mbuti buri bwadzuka, lo me sa nyadzakala kuri beenu, kampe sa nyalutisa se ntaangu ya kyoosi, mpisi lumbakisa mu kunamitina budyeengi bwaami, kwo ngo kwo ku nyibangisina kwe.

⁷Bukuri me nyahele kutya kulumono hani ha nyiluta mu nzila, nyiri na kitsimi kya kudzakala mwaa-mantaangu kuri beenu, mbuti Mfumu heeri miswa.

⁸Me sa nzakala ku Efeso, natee haba munkeembu wa Pantekote,

⁹bukuri mweelu weki wadzibula kuri me na waangalaa, mu kusala kwakubwe, ti bukuri bataatu balaka.

¹⁰Mbuti Timoteho wiisiri kuri beenu, lo talee, yaa kaba na boomo ko kuri beenu; bukuri nde wuri mu kwesala kisalu kya Mfumu bunu me.

¹¹Muutu yaa kamunyaafuna ko, ngo mubakisee mu kunamitina budyeengi bwaandi mu kiyeengi, mpisi nde kiisa kuri me, bukuri me nyiri mu kumukiinga, me na bampaangi.

¹²Nkani mu mitariri mpaangi yeetu Apolo, me nyamusyaamisini kwalaka, mpisi kiisa na bampaangi kuri beenu, ngo nde wahele kutya kwiisa mu lumalu, kabakaa ntaangu tumi mbasi-tsuku kiisa.

¹³Beenee naana, teleme na keketee mu kanyi, lwatee kibakala, beenee na makwa.

¹⁴Hemese myominso mya beenu myeyirimina kunsa ntiilu.

¹⁵Me nyilusyaamisa bampaangi: beenu luyaa kuri ti baatu ba mu nzo Estefana, ngo batete bayiingiri madyeele mu Akaya; na bo bayekele manyutu mu kisalu kya bangisi.

¹⁶Beenu se beeneenu batumuma kuri baatu ba bubwo, na kuri mpisi wunde wukwesala na kwemono mpasi kintwaari na bo.

¹⁷Me nyimono kiminu mu nyisulu Estefana, na Fortunato, na Akayako, bukuri bo bayisiri mu kuyiingisa beenu luri bo pe.

¹⁸Mukwongo, bo badzuunisini bitsimi bya me na bya beenu se. Yabukilee baatu ba bubwo.

¹⁹Mabuundu ma ku Asya maluheekiri mamboto. Akila bo na Piriska, na dibuundu dikutukunaana mu nzo bo, baluheekiri mamboto malaka mu Mfumu.

²⁰Bampaangi bobanso baluheekiri mamboto. Helesenee mamboto beenu na beenu mu nyumutunu yangisi.

²¹Taambuleenu mboto ya mu kooko kwa me-meene Pawulo.

²²Mbuti kuri wuri katii Mfumu ko, lo kabwilikila mpopi! Marana ta!

²³Bweese bwa Mfumu Yesu buba na beenu.

²⁴Me nyilutiiri beenu-banso mu Kiristo Yesu.