Read Beembe 1 Kol 2 Bible Online

1 Kol 2 - Beembe bible

1 Kol 2

¹Bampaangi, ha nyayisiri me kuri beenu, nyasii kwiisa mu kuluyaabisa mpaanu dza Nzaambi, mu lunaaku lwa nzoonsulu bunu pe lwa madyeele ko.

²Bukuri me nyasii tsima kuyaaba kitotolo ti kimosi ha kakati dya beenu ko, mbuti ka Yesu Kiristo, wu bakomini ha yulu kuruwa.

³Na ha busu bwa beenu, me nyaba na buyonsi, na boomo, na mantekete.

⁴Mu maampu na mu nyaabusulu dzaami, mwaba mwahele nzoonsulu dza madyeele dziri lo baatu bataambula, ngo kasi nsoongulu ya mpinu dza Mpeeve,

⁵mpisi heki kanyi dya beenu di hele kuba kunsa madyeele ma baatu, ngo diba kunsa mpinu dza Nzaambi.

⁶Madyeele ma turi mu kweyikisa beetu ha kakati dya baatu babuuka, mari madyeele ma ntaangu yimayi ko, mari se ma bamfumu ba ntaangu yimayi, bari mu kweende kumfukusulu ko;

⁷ngo kasi, beetu turi mu kweyikisa madyeele ma Nzaambi masweeku kunsa mpaanu, mari Nzaambi watekisiri kutaasila mo mu nkeembu yeetu tekesele mu bibvu.

⁸Kuri ti mosi mu bamfumu ba ntaangu yimayi wayaaba mo ko; bukuri, mbuti baba bayaaba, nkani basii komono Mfumu ya nkeembu ha yulu kuruwa ko.

⁹Kasi, bunu bu diri dyatinu ti: «Mimyo miri miisu mya hele kumono, makutu ma hele kuyuka na miri muutu wahele kutsima mu mutima, Nzaambi wayirikisa myo mu ntoono babo bamutiiri.»

¹⁰Ngo kuri beetu, Nzaambi kari kayaabisa myo mu Mpeeve; bukuri Mpeeve wufyongokinaa myominso, ti hayuku myamusundu mya Nzaambi.

¹¹Mukwongo, nani mu baatu yaari mya muutu, mbuti ka mpeeve ya muutu yiri mu nde-meene ko? Bunubwo se, mya Nzaambi kuri muutu wu mi yaari ko, mbuti ka Mpeeve ya Nzaambi ko.

¹²Ngo beetu twahele kutaambula mpeeve ya nsi; kasi Mpeeve yafumuna kuri Nzaambi, mpisi heki tuyaaba bikabu bya bweese bwa Nzaambi.

¹³Ngo mamo ma turi mu kweleele beetu, kari mu bitoolo biyikisa madyeele ma kimuutu ko, ngo mu bitoolo biyikisa Mpeeve. Beetu tukwebaangula mya Mpeeve mu kimpeeve.

¹⁴Muutu wuri na bitsimi bya kimuutu, lo kataambula mya Mpeeve ya Nzaambi ko; bukuri kuri nde bubwo bulawuku, nde lo katsiitsa kuyaaba ko, bukuri mimyo mu kimpeeve bayelemini kumifyongokono.

¹⁵Muutu wa kimpeeve wutsuundisa myominso, ngo nde-meene kuri muutu wumutsuundisa ko.

¹⁶Mukwongo, «na wayaaba kitsimi kya Mfumu? Na wutsiitsa kumuyikisa?» Beetu ngo bari, turi na kitsimi kya Kiristo.