Read Beembe 1 Kol 8 Bible Online

1 Kol 8 - Beembe bible

1 Kol 8

¹Mu musamu wutariri toongo twaha mu kikabu kuri biteki, tuyaari kuri ti beetu-banso turi na nyaabulu, ngo nyaabulu yihaanaa masiiku, kasi ntiilu yihaanaa ntuungulu.

²Mbuti muutu wutsima ti nde yaari kitotolo, lo wakiri wahele kuyaaba, bunu bu bayelemini kuyaaba.

³Ngo mbuti muutu tiiri Nzaambi, lo nde wayabakana kuri Nzaambi.

⁴Mu mitariri ndiilu ya toongo twaha mu kikabu kuri biteki, tuyaari kuri ti kiteki kiri kitotolo ko mu nsi, na ka kuri nzaambi yikimi ko, mbuti ka yomosi kitsu ko.

⁵Mukwongo, ti bukuri kuri bi bakweleele ti banzaambi ku yulu na ha butoto, mu didyo lo banzaambi balaka bari, na bamfumu se balaka bari.

⁶Ngo kasi, mu beetu lo Nzaambi yomosi yiri, Taayi, mu nde byobinso biri byafumuna, na beetu turi ba nde; Mfumu se yomosi yiri, Yesu Kiristo, byobinso byayirimina mu nde, na beetu turi mwooyo mu nde.

⁷Kasi nyaabulu yahele mu bobanso, babamosi bakiri bayuku mu kwesaambila biteki natee lumalu, bakwedya toongo mu kitsimi kiri ti, twaha mu kikabu kuri biteki, na nsimunu bo yiri na buyonsi, yasumuka.

⁸Kari byandya bisa kuri ti tukokosolo kuri Nzaambi ko: mbuti twahele kubidya, lo kuri bi tuhelele ko; na mbuti tubidiiri, lo kuri se bi tubvula kubaka ko.

⁹Seenee madyeele, kuri heki miswa mi luri na myo, mihele kubumisa makya kuri bari na buyonsi.

¹⁰Bukuri, mbuti muutu wumono ye wuri na nyaabulu, wuri mu kudya mu nzo yi basaambilaa biteki, buri lo nsimunu nde yiri na buyonsi, yahele kumutwaalisa mu kudya toongo twaha mu kikabu kuri biteki?

¹¹Mukwongo, mu ntoono nyaabulu ya ye, muutu wuri na buyonsi lo dziimbiri, mpaangi yiyo yiri Kiristo wamufwiila.

¹²Mu didyo, lubaanaa lukweyirika masumu kuri bampaangi, na kwebumisa makya kuri nsimunu bo yiri na buyonsi, lo luyirika masumu kuri Kiristo.

¹³Hango-nkuumbu, mbuti kyandya kibumisa mpaangi yaami makya, lo ngwanwa me mbweese kudya toongo mu mantaangu momanso ko, mpisi heki me mpelele kubumisa mpaangi yaami makya.