Read Beembe 1 Kol 9 Bible Online

1 Kol 9 - Beembe bible

1 Kol 9

¹Buri me nyiri na bunsaalisi ko? Buri me nyiri ntumu ko? Buri me nyasii mono Mfumu yeetu Yesu ko? Buri beenu luri kisalu kya me mu Mfumu ko?

²Mbuti mu bakaka me nyiri ntumu ko, lo mu beenu ngo bari me nyiri ntumu; bukuri beenu luri kinyemu kya kisalu kyaami kya buntumu mu Mfumu.

³Kukalila kwa nyutu yaami, kuri babo bari mu kwensuundisa kuri bumabu.

⁴Buri beetu twahele na miswa mu kudya na mu kunwa?

⁵Buri beetu twahele na miswa mu kwenata kibusi kiri mukasi, bu kwesa bantumu bakaka, na bampaangi ba Mfumu, na Kefa?

⁶Hoti wuni me, beetu na Barnaba, twahele na miswa mu kuhele kusala?

⁷Na wayeki sala kisalu kya buyongolo mu mboongo dza nde-meene? Na wayeki kuna bviinya kwahele kudya bimbutu? Bunu pe na wayeki buungula bangoombo kwahele kudya toongo bunu pe kunwa beene dya ngoombo?

⁸Buri mu kimuutu me nyiri mu kuleele mimyo, hoti mangisi se mahele mu kudzoonsolo mu misamu mimyo?

⁹Mukwongo, mu mangisi ma Moose diri dyatinu ti: «Yaa kaanga munwa ngoombo ko, mbuti yiri mu kudzabata mankono.» Buri Nzaambi lo wutsimina bangoombo?

¹⁰Buri mimyo ngwanwa kari mu beetu kari mu kuleele ko? Mukwongo, mu ntoono beetu miri myatinu ti: wunde wutsabaa nseke, yelemini kutsaba kuri wuri na nsiitu na wunde wudzabata mankono se yelemini kuba na nsiitu ya kubaka kikuuku kya nde.

¹¹Mbuti beetu twakunini bya kimpeeve mu ntoono beenu, buri lo weki musamu wamunene, mbuti beetu tutoriri bya ha butoto kuri beenu?

¹²Mbuti bakaka bari na miswa mu beenu, buri beetu lo twahele kubvula miswa? Kasi beetu twasii salila miswa mimyo ko, ngo beetu twakuundiri momanso, mpisi tuhele kutelemese bikaku mu Musamu Wamubwete wa Kiristo.

¹³Buri beenu lwahele kuyaaba ti babo bakoosalaa mu Nzo-nzaambi, kudyaanaa bifumuna mu Nzo-nzaambi, na babo bakooyokaa bikabu ha yulu dziku bakooholaa kikuuku kya bo?

¹⁴Bunubwo se, Mfumu kari katuma kuri ti, babo bakweyaabisa Musamu Wamubwete, kidziingu kwebakila mu Musamu Wamubwete.

¹⁵Me ngo wuri nyahele kusalila ntoono ti mosi, mu mi nyiri na miswa. Me nyahele kutina mamama mu kuri ti miba mya me. Mukwongo, bubwete bu mfwiiri ti na kuri ti. Kuri muutu ti mosi wukitula kimweese kya me, bunu kitotolo kyabuunu ko.

¹⁶Mukwongo, mbuti me nyikweyaabisa Musamu Wamubwete, lo yiri ntoono ya kimweese kuri me ko, bukuri me nyabiinduma mu mamo; ngo kyaari kuri me, mbuti nyahele kuyaabisa Musamu Wamubwete.

¹⁷Mukwongo, mbuti me nyikwesala mu kutya kwa me-meene, lo me mbakiri mufutu; ngo mbuti kari mu kutya me-meene ko, lo kini kisalu kibari bampa nyikwesala.

¹⁸Hango museendu me nki nde? Mu kuha kwa mungengi, Musamu Wamubwete wu nyikweyaabisa, mu kuhele kusalila miswa mi nyiri na myo mu Musamu Wamubwete.

¹⁹Bukuri me nyiri mu bunsaalisi kuri bobanso, ngo kasi, me-meene nyataambula kuba nkutu ya bobanso, mpisi heki me mbaka baatu balaka.

²⁰Kuri Bayudayo, me nyayeki bunu Muyudayo, mpisi heki me mbaka Bayudayo; kuri baatu bari kunsa mangisi, bunu me nyiri kunsa mangisi, ti hayuku me-meene nyahele kunsa mangisi, mpisi heki me mbaka babo bari kunsa mangisi;

²¹kuri bahele na mangisi bunu me nyahele na mangisi, mpisi heki me mbaka babo bahele na mangisi; ti hayuku me nyahele kuba, muutu wahele na mangisi ma Nzaambi, ngo wuri kunsa mangisi ma Kiristo.

²²Me nyayeki kuri bari na buyonsi bunu me nyiri na buyonsi, mpisi heki me mbaka babo bari na buyonsi; me nyayeki myominso kuri bobanso, mpisi heki mu nzelu ngo nzelu, me mvuukisa babamosi.

²³Me nyikweyirika momanso mamo, mu ntoono Musamu Wamubwete, mpisi heki me mbaka kikuuku.

²⁴Buri beenu lwahele kuyaaba ti badzumuni ba ntiinu, bobanso bakoodzumunaa ntiinu kunsa mbasi, ngo kasi muutu mosi kitsu wubaka kimbwanga? Beenu se dzumukineenu bubwo, mpisi lubaka kimbwanga.

²⁵Mpisi wukotaana mu kimpa kya ntiinu, lo wukebaanaa mangisi mu myominso. Bo bayirikaa mimyo, mpisi bataambula lukoongolo lukoobiiyaa, ngo kasi beetu luri lwabiiya ko.

²⁶Ngo mu bubwo, me nyiri mu kudzumuna, kari bunu ti mu muyooyolo ko, mu bubwo me nyiri mu kulatila, kari bunu ti mu kingye-kingye ko;

²⁷ngo me nyiri mu kwebamisa nyutu me-meene, na nyayidzitikila misiinga, mpisi heki me-meene mpele kuba ha luteke, ha mambisa ma kuyikisa bakaka.