Read Beembe 2 Kol 1 Bible Online

2 Kol 1 - Beembe bible

2 Kol 1

¹Pawulo, ntumu Kiristo Yesu mu kutya kwa Nzaambi, na Timoteho mpaangi, kuri dibuundu dya Nzaambi diri ku Korinto, na kuri bangisi bobanso bari mu Akaya dyodinso.

²Bweese na kiyeengi bifumunaa kuri Nzaambi, Taayi dyeetu, na kuri Mfumu Yesu Kiristo, biba na beenu.

³Kaba wasakumunu, Nzaambi, Taayi dya Mfumu yeetu Yesu Kiristo, Taayi diri na ngebe na diri na mboondulu yoyinso,

⁴nde kookutuboondaa mu mpasi dzeetu dzodzinso, mpisi heki mu mboondulu yi tutaambula beetu-meene kuri Nzaambi, tubangisina kuboondo babo bari kunsa mpasi dza bitsuumbu-bitsuumbu.

⁵Mukwongo, bunu bufununa mpasi dza Kiristo mu beetu, bunubwo se bufununa mboondulu yeetu mu Kiristo.

⁶Ngo mbuti beetu turi mu mpasi, lo mu kuri ti beenu lubaka mboondulu na mvuukulu; mbuti turi na mboondulu, lo mu kuri ti beenu lubaka mboondulu, yiluha makwa ma kukuunda mpasi dzodzimosi, dzi turi mu kumono beetu se.

⁷Na beetu turi na nsiitu ya makwa mu ntoono beenu, bu tuyaari kuri ti, bunu bu luri kintwaari na beetu mu mpasi, bunubwo se luri kintwaari mu mboondulu.

⁸Mukwongo, bampaangi, beetu tutii ko ti beenu luba kunsa lubu, mu mpasi dzi twamono beetu ku Asya: beetu twabamini mu kiteesu kibvuriri makwa, na twaba na kitsimi ko ti, lo tubweesiri kuba bamwooyo.

⁹Kasi beetu mu beetu-meene, twataamburi mukanu wa lufwa, mpisi heki tuhele kusiila nsiitu mu beetu-meene, ngo mu Nzaambi wufulukisaa bafwa.

¹⁰Nde watukuuriri mu lufwa lwa bubwo, na mbasi-tsuku wutukuula, mu nde turi twasa nsiitu ti sa kabweese kutukuula.

¹¹Beenu se luri kintwaari, bu luri mu kusaambilaa mu beetu, mpisi heki bweese bu tutaambula beetu, mu ntoono lusaambulu lwa baatu balaka, buba dyaambu dya mvutukulu matoondo kuri beetu.

¹²Mukwongo, kimweese kyeetu ngo kimbaangi kya nsimunu yeetu, beetu twadyaatiri ha nsi, na ha busu bwa beenu, mu nkulukulu na mu nsyemukunu ya Nzaambi, kari mu madyeele ma kimuutu ko, ngo mu bweese bwa Nzaambi.

¹³Beetu turi na misamu mikimi mi tulutinina ko, ha yulu mi luri mu kutaanga na kubakula; ngo me nsimini ti beenu sa lwayirika kubakula kwakubwe,

¹⁴bunu bu lumwaabakula kwa ndaambu, ti beetu turi kimweese kya beenu, bunu bu luba beenu se kuri beetu, mu kiluumbu kya Mfumu yeetu Yesu.

¹⁵Mu nsiitu dzidzo, me nyabee nyatya kutekesele kwiisa kuri beenu, mpisi heki lutaambula bweese mu lwadzoolo.

¹⁶Tumi nyisikaa kuri beenu, nyeende ku Makedonya, na nyisikaa ku Makedonya mbweese kwiisa kuri beenu, na beenu lumbakisa mu kunamitina budyeengi bwaami, ku Yudaya.

¹⁷Buri me ntyaanaa bubwo kuyirika, lo budzeeke nyiri mu kusoongo? Hoti ma ntii me mamo, mu kimuutu me nyimatiiriri, mpisi heki mu me muba: «heehe lo heehe» na «pele lo pele»?

¹⁸Nzaambi wakwiikama, ma turi mu kuleele kuri beenu, mahele kuba «heehe» na «pele».

¹⁹Bukuri, Mwaana Nzaambi, Yesu Kiristo wu turi twayaabisa kuri beenu, me na Silvano na Timoteho, nde kasii kuba: «heehe» na «pele» ko.

²⁰Mukwongo, nsiilulu dza Nzaambi dzodzinso mu nde dini «heehe» diri, Mu didyo se beetu tukooleelaa ti «Amene» kuri Nzaambi, mu kumuha nkeembu.

²¹Wunde wukookumisaa beetu na beenu mu Kiristo, na watukila maasi, ngo Nzaambi;

²²nde se watusa kinyemu kyaandi, na wasuusa bidiimbu bya Mpeeve munsa mitima myeetu.

²³Nzaambi mbaangi yaami, me nyilaba maalu mu kidziingu kya me-meene ti: me nyasii bweese kwiisa ku Korinto ko, mu kulubatisa misamu.

²⁴Kari kuri ti beetu, turi na lutumu mu kanyi dya beenu ko, ngo beetu tukwesala kintwaari na beenu, mu kuri ti beenu lumono kiminu, bukuri beenu lwateleme na keketee mu kanyi.